સગીરાને ધરારથી સંબંધ રાખવા પજવણી કરતા શખ્સનો અદાલતમાં ફરમાવાયો છૂટકારો

Author: નોબત સમાચાર

સગીરાને ધરારથી સંબંધ રાખવા પજવણી કરતા શખ્સનો અદાલતમાં ફરમાવાયો છૂટકારો

આરોપી પક્ષ દ્વારા રજૂ થયેલી દલીલો ગ્રાહ્યઃ

જામનગર તા. ૯: જામનગરના એક શખ્સ સામે થોડા વર્ષ પહેલાં સગીરાની પજવણી કરવા અને ધરારથી સંબંધ રાખવા દબાણ સર્જવા બાબતે પોલીસમાં ફરિયાદ કરાતા પોક્સો એક્ટ હેઠળ ગુન્હો નોંધાયો હતો. તે કેસ ચાલી જતા અદાલતે આરોપી તરફથી રજૂ થયેલી દલીલો ગ્રાહ્ય રાખી આરોપીનો છૂટકારો ફરમાવ્યો છે.

જામનગરના એક વિસ્તારમાં વસવાટ કરતા પરિવારની ચૌદ વર્ષની સગીર પુત્રી પોતાના ઘરેથી નીકળે ત્યારે માર્ગમાં મયુર (ઉ.વ.રપ) નામનો શખ્સ આ તરૂણીને ઈશારા કરવા ઉપરાંત મશકરી કરતો હતો. તે દરમિયાન આ શખ્સે તે તરૂણીને મોબાઈલ ફોન આપી પોતાની સાથે વાત કરવા માટે દબાણ કર્યું હતું. તેની સગીરાએ પિતાને જાણ કરતા તેણીના પિતા તથા ફઈ સમજાવટ કરવા ગયા હતા.

આમ છતાં મયુરે તે સગીરાની પજવણી યથાવત રાખતા તેની સામે સિટી એ ડિવિઝન પોલીસ સ્ટેશનમાં જે તે વખતે ફરિયાદ કરવામાં આવી હતી. પોલીસે પોક્સો એક્ટ હેઠળ ગુન્હો નોંધી આરોપીની ધરપકડ કરી હતી. ઉપરોક્ત કેસ ખાસ અદાલતમાં ચાલવા પર આવતા ફરિયાદ પક્ષે સાક્ષીઓની જુબાની તથા ભોગ બનનારની જુબાની રજૂ કરી હતી. તેની સામે આરોપી પક્ષે તમામ જે વ્યક્તિઓએ જુબાની આપી છે તેમાં એક શબ્દ પણ ઉપર-નીચે થયો નથી તેથી જુબાની સત્ય હોવાનું માની ન શકાય તેમજ ન્યુટ્રલ વિટનેશ કેમ મળી શક્યા નથી તે બાબત ધ્યાનમાં લેવા રજૂઆત કરાઈ હતી અને આરોપી તેમજ સગીરાના પિતા વચ્ચે કામ બાબતે માથાકૂટ ચાલતી હોવાનું પણ રેકર્ડ પણ આવ્યું છે. તેવી દલીલ કરવામાં આવી હતી. અદાલતે તે દલીલ ગ્રાહ્ય રાખી આરોપી મયુરનો છૂટકારો ફરમાવ્યો છે. આરોપી તરફથી વકીલ રાજેશ ગોસાઈ, વિશાલ જાની, એચ.આર. ગોહિલ, રજનીકાંત નાખવા, નિતેશ મુછડીયા, કરણ પટેલ રોકાયા છે.

જો આપને આ પોસ્ટ ગમી હોય તો શેર કરો...