નયારા પાસે ઈંધણની પાઈપલાઈનમાં પ્રચંડ વિસ્ફોટ થતા ત્રણ કર્મચારીને ઈજાઃ સુરક્ષા સતર્કતા ચકાસાઈ

Author: નોબત સમાચાર

નયારા પાસે ઈંધણની પાઈપલાઈનમાં પ્રચંડ વિસ્ફોટ થતા ત્રણ કર્મચારીને ઈજાઃ સુરક્ષા સતર્કતા ચકાસાઈ

દ્વારકા જિલ્લાના વહીવટી તંત્ર દ્વારા નયારાના સહાયતાથી મોકડ્રીલ

ખંભાળિયા તા. પઃ નરારા પોર્ટ પાસે ઈંધણ પાઈપલાઈનમાં આગ અને વિસ્ફોટ થવાની દુર્ઘટનામાં બચાવ કામગીરી અંગેની સતંર્કતા ચકાસણી કવભૂમિ દ્વારકા જિલ્લા વહીવટી તંત્ર અને નયારા એનર્જીના સંયુક્ત ઉપક્રમે મોકડ્રીલનું આયોજન કરવામાં આવ્યું હતું. જેમાં સુરક્ષા વ્યવસ્થા સાથે સંકડાયેલા સમગ્ર તંત્રની સતર્કતા ચકાસાઈ હતી.

નયારા એનર્જીના સહયોગથી યોજાયેલી મોકડ્રીલમાં નરારા નજીક આવેલી ઈંધણ પાઈપલાઈનમાં સમારકામ કામગીરી દરમિયાન આગ અને ત્યારપછી વિસ્ફોટ થવો અને તેમાં ત્રણ કર્મચારીને ઈજા થયાની ઘટનાને આકાર આપવામાં આવ્યો હતો. જેમાં અલગ અલગ કંપની અને વિભાગમાંથી ઓબઝર્વર તરીકે જોડાયેલા અધિકારીઓએ મોકડ્રીલ દરમિયાન કરાયેલી ત્વરિત કામગીરીની નોંધ લઈ તે અંગે સૌને અવગત કરાવ્યા હતાં. ભવિષ્યમાં કોઈ દુર્ઘટના સર્જાય ત્યારે સાવચેતી માટે સૌ કોઈએ સાથે મળીને તેમાં કઈ રીતે શ્રેષ્ઠ બચાવ કાર્ય કરી શકાય તેની માહિતીની આપ-લે કરી હતી.

મોકડ્રીલમાં નાયબ કલેક્ટર શ્રી રિદ્ધિ રાજ્યગુરુ, ખંભાળિયા મામલતદાર શ્રી વિક્રમ વરૂ, મામલતદાર શ્રી વિશાલ પટેલ, તાલુકા વિકાસ અધિકારી, ગુજરાત પ્રદૂષણ નિયંત્રણ વિભાગ, વન વિભાગ, ફેક્ટરી ઈન્સ્પેક્શન વિભાગ, માર્ગ અને મકાન વિભાગ, આરોગ્ય વિભાગ સહિતના વિભાગોના અધિકારીઓ ઉપસ્થિત રહી મોકડ્રીલનું નિરીક્ષણ કર્યું હતું.

મોકડ્રીલમાં નયારા એનર્જીના રિફાઈનરી હેડ અમર કુમાર, કેપ્ટન આલોક કુમાર સહિતના ઉચ્ચ અધિકારીઓ સામેલ થયા હતાં. મોકડ્રીલ દરમિયાન મ્યુચ્યુલ એઈડ સ્કીમના ભાગીદાર રિલાયન્સ ઈન્ડસ્ટ્રીઝ, ભારત પેટ્રોલિયમ કોર્પોરેશન લિમિટેડ, દિનદયાળ પોર્ટ ઓથોરિટી, ઈન્ડિયન ઓઈલ કોર્પોરેશન, દિગ્વિજય સિમેન્ટ કંપની, ગુજરાત સ્ટેટ ફર્ટિલાઈઝર એન્ડ કેમિકલ્સ, ગુજરાત ગેસ વગેરેના અધિકારી, ફાયર વિભાગ, એમ્બ્યુલન્સ સ્ટાફ જોડાયો હતો અને દુર્ઘટના સમયે કઈ પ્રકારની કાર્યવાહી કરી શકાય તે મોકડ્રીલમાં પ્રદર્શિત કરી હતી.

જો આપને આ પોસ્ટ ગમી હોય તો શેર કરો...