ભાણવડના ગ્રામ્ય પંથકના અત્યંત બિસ્માર માર્ગોની મુલાકાતઃ જાત નિરીક્ષણ

Author: નોબત સમાચાર

ભાણવડના ગ્રામ્ય પંથકના અત્યંત બિસ્માર માર્ગોની મુલાકાતઃ જાત નિરીક્ષણ

આમઆદમી પાર્ટીના પ્રદેશ પ્રમુખ દ્વારા

જામનગર તા. ૮: દેવભૂમિ દ્વારકા જિલ્લામાં રસ્તા ખરાબની સ્થિતિ અંગે જાત તપાસ કરવા આવેલા આમઆદમી પાર્ટીના રાજ્ય પ્રમુખ ઈશુદાન ગઢવી દ્વારા ભાણવડના મુખ્ય રસ્તા અત્યંત બિસ્માર, ખાડા જેવા હોવાની વાસ્તવિક સ્થિતિ વીડિયો દ્વારા રજૂ કરી હતી.

તેમણે જણાવેલ કે ભાજપવાળા પેરીસ જેવા રોડની ફાકા ફોજદારી કરે છે ત્યારે ગુંદા-જામપર રસ્તા પરથી ડામર રોડ જ ગાયબ થઈ ગયો છે. માત્ર કાંકરા જ છે જેના પર ગાડીઓને નુકસાન થાય છે. ટુ-વ્હીલ વાળાને અકસ્માત થાય છે. તો પીઠના દર્દો વ્યાપક થયા છે.

અઢાર ગામોને જોડતા આ રસ્તા વિશે અવાર નવાર અગ્રણીઓ તથા ગામ સરપંચો દ્વારા રજૂઆતો કરવા છતાં કોઈ કાંઈ જ કરતું નથી ! રસ્તા, બ્રિજ, ડામર રોડ બધું ખવાઈ જાય છે. વ્યાપક ભ્રષ્ટાચાર થાય છે અને જો કોઈ અવાજ ઉઠાવે તો અરાજકતા ફેલાવો છો કહીને તેના પર પોલીસ કેસ થાય છે.

જનતાને હાથ જોડીને જાગવા વિનંતી કરીને આ ભ્રષ્ટાચારીઓને લાત મારીને કાઢવા તથા ૨૦૨૭માં આ ભ્રષ્ટાચારીઓનો હિસાબ વ્યાજ સાથે કરવા પણ જણાવ્યું હતું. ભાજપના નેતાઓ ગૌચરની જમીનો પણ દબાવી ગયાના આક્ષેપો પણ કર્યા હતા. જનતા નહીં જાગે તો આ લોકો કશું વધવા નહીં દે તેવો પણ કટાક્ષ કર્યો હતો.

જો આપને આ પોસ્ટ ગમી હોય તો શેર કરો...