જામનગરમાં ૧૦૦ કરોડના જીએસટી કૌભાંડમાં અન્ય સીએની સંડોવણી

Author: નોબત સમાચાર

જામનગરમાં ૧૦૦ કરોડના જીએસટી કૌભાંડમાં અન્ય સીએની સંડોવણી

બોગસ બીલીંગ, ક્રેડીટ ઈનપુટ દ્વારા કૌભાંડ

જામનગર તા. ૬: જામનગરમાં ચારેક દિવસથી જીએસટીની ટૂકડીએ ધામા નાંખ્યા છે અને સીએ દ્વારા સિમેન્ટ કૌભાંડ આચરવામાં આવ્યું હોવાનું ચર્ચાઈ રહ્યું છે.

આ સી.એ. દ્વારા અનેક પેઢીના નામે બોગસ બીલીંગ કૌભાંડ આચરવામાં આવતા આશરે ૮૦ થી ૧૦૦ કરોડનું આ કૌભાંડ થયું છે. જો કે, હજુ સુધી સત્તાવાર રીતે કોઈ વિગતો જાહેર થઈ નથી.

જીએસટીની અમદાવાદ, જુનાગઢ, ભાવનગર, રાજકોટના અધિકારીઓની ટીમ દ્વારા જામનગરમાં દરોડાની કાર્યવાહી કરવામાં આવી રહી છે. છેલ્લા ચારેક દિવસથી તપાસનો ધમધમાટ ચાલી રહ્યાં છે. સીએ અલ્પેશ દ્વારા અનેક પેઢીના નામે બેનામી વ્યવહારો કરવામાં આવ્યા છે. આ સમગ્ર પ્રકરણની તપાસમાં એક મહિલાના નામની પેઢીનો પણ ઉપયોગ થયા હોવાનું અને અન્ય એક-બે સીએની પણ સંડોવણી ખૂલ્લી હોવાનું ચર્ચાઈ રહ્યું છે.

ગઈકાલે રવિવારે રજાનો વાર હતો છતાં તપાસનો ધમધમાટ યથાવત રહ્યો હતો. હાલ તો આ પેઢીના સંચાલકો નાસી ગયા છે. જેઓનો હાલ કોઈ પત્તો નથી.

આશરે બે ડઝન જેટલી પેઢીના વ્યવહારો તપાસવામાં આવી રહ્યાં છે. મળતી માહિતી મુજબ અમુક પેઢીના સંચાલકોને પોતાની પેઢીના નામે થયેલા વ્યવહારો અંગેની કોઈ જાણકારી જ નથી. એટલે કે, સમગ્ર કૌભાંડ સીએ દ્વારા આચરવામાં આવ્યું છે.

ઉપરાંત અમુક ફક્ત કાગળ ઉપર ચાલતી પેઢીના પણ ખૂલાસા થયા છે. ત્યારે હવે સત્તાવાર રીતે કોઈ વિગતો જાહેર થાય પછી જ સમગ્ર કૌભાંડની સત્ય વિગતો પ્રકાશમાં આવી શકે છે, હાલ તો ૮૦ થી ૧૦૦ કરોડનું કૌભાંડ હોવાનું ચર્ચાઈ રહ્યું છે.

જો આપને આ પોસ્ટ ગમી હોય તો શેર કરો...