જામનગરની નર્સિંગ કોલેજને બંધ કે રફેદફ કરવાનું ષડ્યંત્ર?

Author: નોબત સમાચાર

જામનગરની નર્સિંગ કોલેજને બંધ કે રફેદફ કરવાનું ષડ્યંત્ર?

નિવૃત્ત કર્મચારીનો આક્રોશઃ

જામનગર તા. ૩૦: જામનગર જિલ્લાની એક માત્ર શિક્ષણ સંસ્થા સરકારી નર્સિંગ કોલેજમાં અપૂરતા શિક્ષણ સ્ટાફના અભાવે શિક્ષણ કાર્ય ઉપર ગંભીર અસર જોવા મળી રહી છે. આ અંગે નિવૃત્ત સરકારી નર્સિંગ કર્મચારી (હેડ નર્સ) દ્વારા ઉચ્ચ કક્ષાએ રજૂઆત કરવામાં આવી છે.

જી.જી. હોસ્પિટલ કેમ્પસમાં સરકારી નર્સિંગ કોલેજ ર૦૦૮ થી કાર્યરત છે. એ પહેલા નર્સિંગ સ્કૂલ હતી. જેને સરકાર દ્વારા અપગ્રેડ કરવામાં આવી હતી. જામનગર અને ગુજરાતની એક માત્ર સંસ્થા છે, જ્યાં પોસ્ટ બેઝીક બી.એસ.સી. નર્સિંગ કોર્સ ચલાવવામાં આવે છે.

અહિં બેઝીક બીએસસી નર્સિંગ કોર્સ નર્સ પ્રેક્ટીશનર્સ મીડલાઈફ, એ.એન. એમ. કોર્સ ચલાવવામાં આવે છે, અને આશરે ર૮૦ થી ૩૦૦ વિદ્યાર્થીઓ અભ્યાસ કરે છે.

અહિં અનુભવી ટીચીંગ સ્ટાફનો ઘટ છે. લાંબા સમયથી ભરતી થવા પામી નથી. અનેક નિવૃત્ત થયા છે. જેની અસર શિક્ષણ ઉપર થઈ રહી છે. જરૂર હોય ત્યારે અનુભવીને ડેપ્યુટેશનમાં અહિં નિમણૂક કરવાનો પરિપત્ર પણ અગાઉ થયો છે, પરંતુ જવાબદારો દ્વારા તેનું પાલન થતું નથી.

અહિં. જિલ્લાનું એક માત્ર સરકારી હેલ્થ સેન્ટર હતું. જેનો અન્ય જિલ્લાના લોકો લાભ લેતા હતાં, પરંતુ જાણી જોઈને અમુક દ્વારા અહિંના સ્ટાફનું ડેપ્યુટેશન રદ્ કરી નાખવામં આવ્યું છે. જેથી આ હેલ્થ સેન્ટર બંધ છે. આથી ના છૂટકે વિદ્યાર્થીને ખાનગી સંસ્થાની સેવા લેવી પડે છે. જ્યાં ગેરમાર્ગે દોરવામાં આવે છે.

અહિંના પ્રિન્સિપાલને પણ કામગીરીમાં ખાસ રસ નથી તેવો અન્ય કામગીરીમાં વ્યસ્ત રહે છે. મોટાભાગના સમયમાં તેવો હાજર હોતા નથી, જેથી આ કોલેજને બંધ કે નબળી પડી જાય તેવી રીતે રફેદફે કરવાનું ષડ્યંત્ર હોય તેમ જણાય છે.

આ સમગ્ર પ્રકરણની તપાસ કરાવવી જોઈએ, તાત્કાલિક ધોરણે અનુભવી સ્ટાફને નિમણૂક આપવી જોઈએ અને શિક્ષણને થતી નુક્સાની અટકાવવી જોઈએ.

જો આપને આ પોસ્ટ ગમી હોય તો શેર કરો...