રિક્ષાના બાકીના હપ્તા ભરવાની બબાલમાં યુવાનની હત્યા કરનાર સાળા-બનેવી ઝડપાયા

Author: નોબત સમાચાર

રિક્ષાના બાકીના હપ્તા ભરવાની બબાલમાં યુવાનની હત્યા કરનાર સાળા-બનેવી ઝડપાયા

ગઈકાલે લાલવાડી વિસ્તારમાં થઈ હતી હત્યાઃ

જામનગર તા. ૨૦: જામનગરના ગુલાબનગર રોડ પર પેટ્રોલપંપ પાસે આવેલા રાધાક્રિષ્ના પાર્કમાં રહેતા અખ્તર રફીકભાઈ ખીરા (ઉ.વ.૩પ) નામના ગેરેજ સંચાલક યુવાને વર્ષ ૨૦૨૩માં લાલવાડી વિસ્તારમાં આવેલા જૂના આવાસમાં રહેતા હુસેન દાઉદ જુણેજા પાસેથી જીજે-૧૦-ટીઝેડ ૨૫૦ તથા જીજે-૧૦-ટીઝેડ ૬૭૦૦ નંબરની બે રિક્ષા ખરીદી હતી.

આ વેળાએ રિક્ષાની લોન ભરવાની બાકી હતી પરંતુ વેચનાર તથા ખરીદનાર વચ્ચે થયેલી સમજૂતિ મુજબ આ રિક્ષાના બાકી હપ્તા હુસેન દાઉદે ભરપાઈ કરવાના હતા અને તેની સિક્યુરિટીમાં હુસેને ચેક આપ્યા હતા. તે પછી બાકી લોનના હપ્તા ભરવામાં ન આવતા અખ્તરને જાણ થઈ હતી તેથી તેણે પોતાની પાસે રહેલા ચેક બેંકમાં જમા કરાવ્યા હતા અને તે ચેક ખાતામાં બેલેન્સ ન હોવાના કારણે પરત ફર્યા હતા અને અખ્તરે તેની કોર્ટમાં ફરિયાદ નોંધાવી હતી ત્યારથી અખ્તર તથા હુસેન વચ્ચે વેરના વાવેતર થયા હતા.

તે પછી પૈસા બાબતે ઉઘરાણી થતી રહેતી હોવાથી હુસેન દાઉદે ગુરૂવારની રાત્રે વાત કરવા માટે અખ્તર ખીરાને પોતાના ઘરે બોલાવ્યા પછી વહેલી સવારે સાડા ચારેક વાગ્યે હુસેન તેમજ તેના સસરા મુસા, સાળા આબીદ મુસાએ ઉશ્કેરાઈ જઈને કોયતા, છરી, તલવાર વડે હુમલો કરી અખ્તરને માર માર્યાે હતો. જેમાં ગંભીર ઈજા પામેલા આ યુવાનનું મૃત્યુ નિપજ્યું હતું. ઉપરોક્ત બનાવની મૃતકના નાનાભાઈ સોયબ ખીરાએ પોલીસમાં ફરિયાદ નોંધાવી છે. શરૂ થયેલી તપાસમાં સિટી એ ડિવિઝન પોલીસ સાથે એલસીબીની ટીમ જોડાઈ હતી. પોલીસ ટીમે નૂરી ચોકડીથી માર્કેટીંગ યાર્ડ તરફના રોડ પરથી ગઈકાલે સાંજે આબીદ મુસા ચાડ, હુસેન દાઉદ જુણેજાને દબોચી લીધા છે અને મુસા ચાડના સગડ દબાવ્યા છે.

જો આપને આ પોસ્ટ ગમી હોય તો શેર કરો...