ડ્રગ્સ માફિયાઓને ડામવા શ્રીલંકા ફેઈમ કડક પગલાં ઉઠાવો હર્ષભાઈ... દારૂબંધી અને નશાબંધી ક્યારે સાર્થક થશે ?

Author: નોબત સમાચાર

ડ્રગ્સ માફિયાઓને ડામવા શ્રીલંકા ફેઈમ કડક પગલાં ઉઠાવો હર્ષભાઈ... દારૂબંધી અને નશાબંધી ક્યારે સાર્થક થશે ?

ગુજરાતમાં દારૂબંધી હોવા છતાં શરાબીઓ ઝુમતા જોવા મળી રહ્યા છે, તેવી જ રીતે નશાબંધી હોવા છતાં ડ્રગ્સના વ્યસનીઓ પકડાતા રહે છે. ગુજરાતમાં લાંબો દરિયા કિનારો હોવાથી આ રસ્તે ડ્રગ્સ ઘુસાડવાનો કોન્સેપ્ટ ડ્રગ્સ માફિયાઓને જૂના સ્મગલીંગના દરિયાઈ માર્ગોમાંથી મળ્યો હશે, પરંતુ હવે ડ્રગ્સ માટે ગુજરાત કદાચ ગેટ વે ઓફ ઈન્ડિયા બની ગયું છે, અને ગુજરાતમાં પણ ડ્રગ્સના પેડલર્સ અને એજન્ટો ઉપરાંત વ્યસનીઓ પણ વધી રહ્યા હોવાના સંકેતો મળતા રહે છે.

ગઈકાલે જ અહેવાલો આવ્યા હતા કે પોરબંદરના દરિયામાંથી કરોડોની કિંમતનું ૨૦૦ કિલો ડ્રગ્સ પકડાયું છે. આ પહેલાં પણ એપ્રિલમાં પોરબંદરથી લગભગ ૨૦૦ કિ.મી. દૂર એક બોટને આંતરીને પુછપરછ કરાતા ડ્રગ્સ તસ્કરો દરિયામાં જથ્થો ફેંકીને ભાગ્યા હતા, જેની કિંમત લગભગ ૧૮૦૦ કરોડ થતી હતી. વર્ષ ૨૦૨૪માં પણ ૮૬ કિલો ડ્રગ્સ પકડાયું હતું, જેની કિંમત રૂ।. ૬૦૦ કરોડ જેટલી અંદાજવામાં આવી હતી. તે પહેલાં આ વિસ્તારમાંથી જ અંદાજે ૨૦૦૦ કરોડની ૩૩૦૦ કિલો ડ્રગ્સ ઝડપાઈ હતી.

તાજેતરમાં જ એસઓજીએ ખાવડી નજીકથી એક હોટલમાંથી લગભગ ૮૩ લાખની હેરોઈન સાથે ચાર શખ્સોને દબોચ્યા હતા. તે પહેલા સપ્ટેમ્બર ૨૦૨૪માં જોડિયા તાલુકામાંથી રૂ।. ૨૫ લાખની કિંમતનું ૪૯૮ ગ્રામ ડ્રગ્સ, અને ઓકટોબરમાં દરિયાકાંઠેથી બે લાખથી વધુ કિંમતનું એમ.ડી. ડ્રગ્સ ઝડપાયું હતું.

વર્ષ ૨૦૨૪માં દ્વારકા જિલ્લામાં બિનવારસુ ડ્રગ્સનો સીલસીલો ચાલ્યો હતો, અને દરિયાકાંઠેથી જૂન ૨૦૨૪માં ૩૨ કિલો અફઘાની ડ્રગ્સ મળી આવ્યુ હતું, જેની કિંમત લગભગ રૂ।. ૧૬ કરોડની થવા જતી હતી. એટીએસ દ્વારા સલાયામાંથી ૧૨૦ કિલો હેરોઈન પકડાયેલું, જેના તાર પાકિસ્તાન સાથે જોડાયેલા હતા. મે ૨૦૨૩માં પણ ખંભાળીયામાંથી દોઢ લાખના ડ્રગ્સ સાથે મુંબઈનો સપ્લાયર ઝડપાયો હતો.

વર્ષ ૨૦૨૦થી વર્ષ ૨૦૨૫ દરમ્યાન ગુજરાતમાંથી લગભગ ૧.૩૦ લાખ કિલોથી વધુ નશીલા પદાર્થો ઝડપાયા છે, જેમાં ૭૧,૪૮૭ કિલો ગાંજો, ૫૬,૪૭૭ કિલો અફીણ, ૨૦૪૭ કિલો સિન્થેટિક ડ્રગ્સ અને ૨૦૪ કિલો કોકેઈનનો સમાવેશ થાય છે. ગુજરાત ડ્રગ્સનું પ્રવેશદ્વાર બની ગયું તેના કારણોની ચર્ચા પણ અવારનવાર થતી રહે છે.

શ્રીલંકામાં વર્ષ ૨૦૧૯માં રાજકીય ઉથલપાથલ થઈ અને મૈત્રીપાલ સિરિસેના ત્યાંના રાષ્ટ્રપતિ બન્યા, પછી ડ્રગ્સ માફિયાઓ અને તસ્કરો પર તવાઈ બોલાવી અને ડ્રગ્સના ગૂન્હામાં ઝડપાયેલા ચાર આરોપીઓને ફાંસીએ ચડાવાયા, શ્રીલંકામાંથી અફઘાનિસ્તાન અને પાકિસ્તાનના ડ્રગ્સ માફિયાઓ ઓસ્ટ્રેલિયા ખંડ તથા યુરોપના દેશોમાં ડ્રગ્સનો જથ્થો મોકલતા હતા. પરંતુ ત્યાંના કાયદા કડક થઈ જતા ડ્રગ્સ માફિયાઓની નજર ગુજરાતના ૧૬૦૦ કિ.મી. લાંબા દરિયા કિનારા પર પડી, ત્યાંથી ભૂતકાળમાં મોટા પાયે દાણચોરી થતી હતી. અને તે પણ ડ્રગ્સ માફિયાઓ ગુજરાતમાં થઈને કેટલાક રાજ્યોમાં થોડો જથ્થો મોકલે, પરંતુ મોટા ભાગનો જથ્થો બીજી બોટોમાં ભરીને લાઓસ, જામનગર, ઉઝબેકિસ્તાન, ઓસ્ટ્રેલિયા, અને યુરોપના દેશો તરફ મોકલવાની ડ્રગ્સ માફિયાઓની આખી આંતરરાષ્ટ્રીય સરકીટ કામ કરી રહી હોવાનું કહેવાય છે.ં

ભૂતકાળમાં હાલારના સલાયા અને ઓખા તથા કચ્છના માંડવી સહિતના સૌરાષ્ટ્રના બંદરે સોનુ, ઈલેકટ્રોનિક સામાન અને અદ્યતન ઘડિયાળો વગેરેની દાણચોરી થતી હતી અને પોરબંદરના ગોસાબારામાં આરડીએકસ તથા હથિયારોની ખેપ પણ ઉતરી હતી, અને જેનો ઉપયોગ મુંબઈમાં સિરિયલ બોમ્બ બ્લાસ્ટીંગ માટે થયો હતો. હવે આ જ રૂટ પર ડ્રગ્સની હેરાફેરી કરવાના પ્રયાસો થઈ રહ્યા છે, અને કેટલાક નવા સ્થળો પણ ડ્રગ્સ માફિયાઓ તથા તસ્કરોએ શોધી કાઢ્યા હોય, તેમ લાગે છે. લાંબા દરિયા કાંઠો, હજારો બોટો, સેંકડો નાના વહાણો તથા મોટા જહાજોની વિશાળ મહાસાગરમાં દેખરેખ કરવી એ પડકારરૂપ કામગીરી કોસ્ટગાર્ડ, નૌકાદળ, મરીન પોલીસ સહિતની એજન્સીઓ કરી રહી છે.

એવું કહેવાય છે કે અફીણનું સર્વાધિક ઉત્પાદન અફઘાનિસ્તાનમાં થાય છે, અને ગુજરાતના દરિયાકાંઠેથી પકડાતા ડ્રગ્સના જથ્થાઓમાં અફઘાનિસ્તાન ઉપરાંત પાકિસ્તાન તથા ઈરાન પણ સંડોવાયેલા હોવાના સંકેતો તથા કેટલાક પૂરાવાઓ પણ મળતા હોય છે. યુનોના એક રિપોર્ટ મુજબ દુનિયામાં થતા કુલ ઉત્પાદનમાં અફઘાનિસ્તાનના અફીણ ઉત્પાદનનો હિસ્સો ૮૦ ટકા જેટલો હોય છે, અને અફીણના જુદા જુદા બાય-પ્રોડક્ટસ આખી દુનિયામાં મોકલાય છે. અફીણનો મહત્તમ જથ્થો ગુજરાતના દરિયાઈ માર્ગે વિશ્વના દેશોમાં મોકલવાની નવી સાયકલ શરૂ થઈ હોય કે સરકીટ ગોઠવાઈ હોય, તો તેના છાંટા ગુજરાતના યુવાધન પર પડયા વિના રહેવાના નથી, તે પણ હકીકત છે.

જો કે, અફઘાનિસ્તાન જેવા દેશોમાંથી નશીલા પદાર્થોની દાણચોરી ઉપરાંત ગુજરાતમાં જ ડ્રગ્સ બનાવવાની મોડસ ઓપરેન્ડી પણ છેલ્લા કેટલાક વર્ષોથી જોવા મળી રહી છે. વર્ષ ૨૦૨૦માં ભરૂચ જિલ્લા સી ગામમાંથી એફેડ્રિન ડ્રગ્સ બનાવતી ફેકટરી ઝડપાઈ હતી, અને વર્ષ ૨૦૨૦માં સુરતના કડોદરામાંથી પણ ડ્રગ્સની ફેકટરી ઝડપાઈ હતી, તેના બીજા વર્ષે જ વલસાડના ડુંગરીમાંથી ડ્રગ્સનું કારખાનું ઝડપાયું હતું. વર્ષ ૨૦૨૨માં ભરૂચના પાનોલીમાંથી ૧૩૮૩ કરોડના જુદા જુદા ડ્રગ્સ પકડાયા હતા. તે પછી સાવલીના મોકસીન કેમિકલ ફેકટરીમાં ઉત્પાદિત થતા ડ્રગ્સનું કૌભાંડ ઝડપાયુ હતુુ, અને આ ડ્રગ્સની કિેંમત પણ એક હજાર કરોડથી વધુની હતી. ગુજરાતમાં જુદા જુદા સ્થળે ડ્રગ્સના ઉત્પાદન તથા હેરાફેરીના આ કિસ્સાઓ પછી "ઉડતા ગુજરાત"ના વ્યંગ સાથે આલોચનાઓ પણ થઈ હતી.

એક તરફ ગુજરાતના દરિયામાંથી ડ્રગ્સ આખી દુનિયાને સપ્લાય કરવાની "સિસ્ટમ" ગોઠવાઈ હોવાની ચર્ચા થઈ રહી છે, તો બીજી તરફ રાજ્યમાં ડ્રગ્સ એડિકટસ વધી રહ્યા હોવાની ચિંતાજનક આશંકાઓ પણ ધીમે ધીમે વાસ્તવિકતામાં ફેરવાઈ રહી હોય તેમ જણાય છે, ત્યારે ગૃહમંત્રી-કમ-નાયબ મુખ્યમંત્રી હર્ષભાઈ સંઘવી શ્રીલંકા ફેઈમ કડક કદમ ઉઠાવીને આ ખતરનાક ડ્રગ્સ સરકીટને તોડી પાડે અને રાજ્યની યુવાપેઢીને ડ્રગ્સના રાક્ષસથી બચાવે, તેવું ઈચ્છીએ.

ગુજરાતમાં દારૂબંધી અને નશાબંધીની સફળતા માટે સરકાર,સમાજ અને સંતોએ સહિયારા પ્રયાસો કરવા પડે તેમ છે, કારણ કે આ ઉધઈ જેવી બદી સરળતાથી ખતમ થાય તેમ નથી, આ માટે રાજ્ય સરકારે જ પહેલ કરવી પડે તેમ છે. અને "વાસ્તવિક" પ્રયાસો કરવા જોઈએ.

જો આપને આ પોસ્ટ ગમી હોય તો શેર કરો...