Author: નોબત સમાચાર
રોડ પર પડી ગયેલા અઢી તોલાના સોનાના ચેઈનને ગણતરીની કલાકોમાં પરત અપાવાયો
કમાન્ડ કંટ્રોલની ટીમે ઉઠાવવી પડી લાંબી જહેમતઃ
જામનગર તા. ૨૭: જામનગરના અંબર ટોકિઝ રોડ પર દિવાળીની બપોરે એક આસામીનો અઢી તોલાનો ચેઈન પડી ગયો હતો. તેઓએ કમાન્ડ એન્ડ કંટ્રોલ સેન્ટરનો સંપર્ક કર્યા પછી હરકતમાં આવેલી સેન્ટરની ટીમે લાંબી જહેમત પછી ગણતરીની કલાકોમાં તે સ્થળેથી જેને ચેઈન મળ્યો હતો તે બાઈકચાલકને શોધી કાઢી ચેઈન પરત અપાવ્યો હતો.
જામનગરના અજીતભાઈ રાઠોડ નામના આસામી દિવાળીની બપોરે કપડાની ખરીદી કરવા માટે બજારમાં આવ્યા પછી અંબર ટોકિઝ રોડ પર તેમનો અંદાજે રૂ.અઢી લાખની કિંમતનો સોનાનો અઢી તોલા વજનનો ચેઈન ક્યાંક પડી ગયો હતો.
આ આસામીએ શોધખોળ કર્યા પછી પણ ચેઈન નહીં મળતા પોલીસનો સંપર્ક કર્યાે હતો. જામનગર પોલીસના કમાન્ડ એન્ડ કંટ્રોલ રૂમના પીએસઆઈ બી.બી. સીંગલ તથા સ્ટાફના પરેશ ખાણધર, પી.જી. સોઢા, જેસાભાઈ ડાંગર, સંજય જોડ, મનિષા શુકલ, મિતલબેન વગેરેએ આ રોડના સીસીટીવી ફૂટેજ ચકાસ્યા હતા.
તે ફૂટેજમાં એક બાઈકચાલક ઉપરોક્ત ચેઈન ઉપાડતા નજરે પડ્યા હતા. તે બાઈકના નંબર પરથી આરટીઓનો ડેટા ચેક કરાતા આ બાઈકચાલક લાલપુર તાલુકાના ખડખંભાળિયામાં રહેતા હોવાનું ખૂલ્યું હતું પરંતુ તેમના કોન્ટેકટ નંબર ન હતા તેથી લાલપુર પોલીસને વિગતો આપવામાં આવી હતી અને લાલપુર પોલીસે તે બાઈકચાલકના મોબાઈલ નંબર પ્રાપ્ત કર્યા પછી આ બાઈકચાલકનો સંપર્ક કરાયો હતો અને તેની પાસેથી ચેઈન પરત મેળવી અજીતભાઈને પરત સોંપવામાં આવ્યો હતો. આ આસામીએ પોલીસનો આભાર વ્યક્ત કર્યાે હતો.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
