અગાઉની ફરિયાદનો ખાર રાખી યુવતીને રસ્તામાં રોકી લઈ ઝીંકી દેવાયા ફડાકા

Author: નોબત સમાચાર

અગાઉની ફરિયાદનો ખાર રાખી યુવતીને રસ્તામાં રોકી લઈ ઝીંકી દેવાયા ફડાકા

યુવતીના પતિએ ફોન કરતા તેને પણ ધમકીઃ

જામનગર તા. ૧૮: જામનગરના દિગ્જામ સર્કલ પાસે પોણા ત્રણ મહિના પહેલાં રાત્રિના સમયે એક યુવતીને રોકી એક શખ્સે ગાળો ભાંડી ફડાકા ઝીંકવા ઉપરાંત છરી બતાવી પતાવી દેવાની ધમકી આપી હતી, આમ ન કરવા માટે તે યુવતીના પતિએ ફોન કરતા તેને પણ ધમકી અપાઈ હતી. અગાઉ કરેલી પોલીસ ફરિયાદનો ખાર રાખી આ શખ્સે હુમલો કર્યાનું ફરિયાદમાં જણાવવામાં આવ્યું છે.

જામનગરના ઢીંચડા રીંગ રોડ પર વસવાટ કરતા એક સગીરાએ અગાઉ શંકરટેકરીના કાદરી ચોકમાં રહેતા સાગર કરશનભાઈ સોલંકી નામના શખ્સ સામે પોક્સો એક્ટ હેઠળ પોલીસમાં ફરિયાદ નોંધાવી હતી.

જે તે વખતે સાગર સોલંકી સામે ગુન્હો નોંધાયા પછી આ શખ્સ તે ફરિયાદના કારણે ઉશ્કેરાયેલો હતો. તે દરમિયાન આ સગીરા હાલમાં પુખ્ત વયની થયા પછી તેણીના લગ્ન થઈ ચૂક્યા છે. તેણી ગઈ તા.૨૪ જુલાઈની રાત્રે એક કાર્યક્રમમાંથી ઘેર પરત જતી હતી ત્યારે સમર્પણ સર્કલથી મહાકાળી સર્કલ વચ્ચે રસ્તા પર સાગર સોલંકીએ તેણીને રોકી લીધી હતી.

ત્યારપછી આ શખ્સે ગાળો ભાંડી ફડાકો ઝીંકવા ઉપરાંત જ્ઞાતિ પ્રત્યે હડધૂત કરી જાનથી મારી નાખવાની ધમકી આપી હતી. આ બાબતે તે યુવતીના પતિએ આમ નહીં કરવાનું સાગર સોલંકીને ફોન કરીને કહેતા આ શખ્સે તેને પણ પતાવી દેવાની ધમકી આપી હતી. આ યુવતીએ સિટી સી ડિવિઝન પોલીસ સ્ટેશનમાં ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...