શહેરમાં કુખ્યાત શખ્સ સહિત ચારે યુવાન પર લાકડી વડે કર્યાે હુમલો

Author: નોબત સમાચાર

શહેરમાં કુખ્યાત શખ્સ સહિત ચારે યુવાન પર લાકડી વડે કર્યાે હુમલો

ઉધાર મસાલો આપવાની ના પાડતા વેપારીને માર પડ્યોઃ

જામનગર તા. ૫: જામનગરના નવાગામ ઘેડમાં ઉધારમાં પાન-મસાલો આપવાનું કહી એક વેપારીને ત્રણ શખ્સે લમધારી નાખ્યો હતો. જ્યારે મચ્છર નગરમાં એક તરૂણને બે શખ્સે માર મારતા સમજાવવા ગયેલા તેના પિતાએ પણ ચાર શખ્સે માર મારી ગાળો ભાંંડી હતી.

જામનગરના નવાગામ ઘેડ વિસ્તારમાં આવેલી જશવંત સોસાયટીમાં રહેતા અને નવાગામ ઘેડમાં જ મિલન સોસાયટીમાં પાનની દુકાન ચલાવતા જયંતીભાઈ મણીલાલ ભટ્ટ નામના યુવાન શુક્રવારે રાત્રે દસેક વાગ્યે પોતાની દુકાન પર હતા ત્યારે ત્યાં આવેલા મિલન સોસાયટી વાળા વિક્રમસિંહ જાડેજા, ગંભીરસિંહ જાડેજા તથા મહેન્દ્રસિંહ જાડેજા ઉર્ફે લાલા નામના ત્રણ શખ્સે ઉધારમાં પાન મસાલો આપવા માટે કહ્યું હતું.

આ વેળાએ જયંતિભાઈએ ઉધાર આપવાની ના પાડતા આ વ્યક્તિઓએ ઉધાર નહીં આપે એમ? તેમ કહીને ગાળો ભાંડયા પછી ઝઘડો શરૂ કર્યો હતો. આ વ્યક્તિઓને ગાળો બોલવાની ના પાડતા ઉશ્કેરાયેલા મહેન્દ્રસિંહે પાઇપ વડે એક ફટકો માથામાં મારી દીધો હતો આ શખ્સો પોલીસ ફરિયાદ કરીશ તો જાનથી મારી નાખીશું તેવી ધમકી આપી નાસી ગયા હતા. આ બાબતની જયંતીભાઈએ બી ડિવિઝન પોલીસ સ્ટેશનમાં ફરિયાદ નોંધાવી છે.

જામનગરના ગાંધીનગર વિસ્તાર પાસે આવેલા પુનિત નગરની શેરી નં.૨માં રહેતા અબ્દુલભાઈ આમદભાઈ તુરીયા નામના યુવાનના પુત્ર અરમાનને શનિવારે સાંજે જ્યારે તે મચ્છરનગરમાં આવેલી પોતાની શાળાએ રીઝલ્ટ લેવા જતો હતો ત્યારે માર્ગમાં દિવ્યરાજસિંહ ઉર્ફે દીવલો ડોન તથા જગદીશસિંહ ઉર્ફે જગો સોઢા નામના બે શખ્સો ગાળો બોલતા હતા તેઓને અરમાને ગાળો બોલવાની ના પાડતા આ બંને શખ્સોએ અરમાનને ઢીકાપાટુ, લાકડીથી માર માર્યો હતો. આ બાબતની વાત ઘેર આવીને અરમાને કરતા અબ્દુલભાઈ સમજાવવા માટે ગયા હતા ત્યારે દીવલા ડોન તેમજ જગદીશ અને કુલદીપસિંહ વનરાજસિંહ રાઠોડ, શબ્બીર હુસન સંઘાર નામના ચાર શખ્સે ઢીકાપાટુથી માર મારી ગાળો ભાંડી હતી અને ત્યાં નજીકમાં પડેલા યુવરાજસિંહ ધર્મેન્દ્રસિંહ જાડેજા નામના આસામીના જીજે-૧૦-ડીએલ ૨૮૯૬ નંબરવાળા એક્ટિવા સ્કૂટરમાં પથ્થર મારી નુકસાન સર્જ્યું હતું.

જો આપને આ પોસ્ટ ગમી હોય તો શેર કરો...