જામનગર મનપાથી ૧૦૦ મીટર દૂર જ તળાવની પાળના ઢાળિયા ઉપર રેંકડીઓના બિન્દાસ દબાણ

Author: નોબત સમાચાર

જામનગર મનપાથી ૧૦૦ મીટર દૂર જ તળાવની પાળના ઢાળિયા ઉપર રેંકડીઓના બિન્દાસ દબાણ

પાર્કિંગની જગ્યા મળતી નથી, ત્યાં મોટી-મોટી રેંકડીઓ ખડકાય રહી છેઃ

જામનગર તા. ૧૪: જામનગર મહાનગરપાલિકા તંત્રમાં એસ્ટેટ વિભાગ લાલિયાવાડી, ભ્રષ્ટાચાર, હપ્તાખોરી અને ક્યાંક માત્ર પ્રસિદ્ધિના નાટક સાથેની બહાદુરીના કારણે લોકોમાં બદનામ થયું છે અને પરિણામે મનપાના શાસકો પ્રત્યે પણ આમજનતામાં કાયમ માટે નારાજગી તથા રોષ ફેલાયેલો રહે છે.

તળાવની પાળે શેખર માધવાણી હોલથી તળાવ તરફ જવાના ઢાળિયા ઉપર પાન-બીડી-સિગારેટ-ગુટકાની એક મોટી રેંકડી ખડકાઈ ગઈ છે. આ જ રેંકડીવાળાએ અગાઉ સ્પોર્ટસ સંકુલની દીવાલ પાસે રેંકડી રાખી હતી, પણ અખબારોમાં તંત્રનું ધ્યાન દોર્યા પછી આ રેંકડીવાળાએ સન્માનભેર સ્થળાંતર કર્યું, અને હવે ઢાળિયા ઉપર આરામથી ધંધો કરી રહ્યો છે. આમ જ બીજી એક રેંકડી વચ્ચેના ઢાળિયા ઉપર જ્યુસવાળાની મોટી રેંકડી ઊભી રહેવા લાગી છે.

આ બન્ને રેંકડીઓ ખૂબ જ મોટી અને વધુ જગ્યા રોકે છે. એટલું જ નહીં, મહાનગરપાલિકા સુધી આવવા-જવાનો માર્ગ છે અને મનપા બિલ્ડીંગથી માત્ર ૧૦૦ મીટરના અંતરે જ આવા દબાણો બિન્દાસપણે રેંકડીઓ કોઈના ડર વગર ઉભી રહેવા પામી છે.

તળાવની પાળે વોકીંગ-જોગીંગ કે હરવા-ફરવા આવતા લોકો તેમના ટુ-વ્હીલર, ફોર વ્હીલર વાહનો આ ઢાળિયાઓ ઉપર સાઈડમાં વ્યવસ્થિત રાખે છે, અને વાહનોની સંખ્યા વધુ હોવાથી પાર્કિંગ સમસ્યા તો છે જ, તેવામાં હવે આવા સ્થળે મોટી મોટી રેંકડીઓ ઉભી રહેવા લાગતા વાહનો ક્યાં રાખવા તે સમસ્યા સર્જાઈ છે.

મનપા તંત્રના અધિકારીઓ, ચૂંટાયેલા પ્રતિનિધિઓ, પદાધિકારીઓ અહીંથી છાસવારે પસાર થાય છે, તો કેમ કોઈના ધ્યાને આ દબાણો આવતા નથી?

મનપા તંત્રમાં હવે રમૂજ સાથે કહેવાય છે કે, તમારે ક્યાંય પણ દબાણો કરવા હોય તો જાવ... મોજ કરો...

એસ્ટેટ વિભાગની નિષ્ક્રિયતા અને કથિત હપ્તાખોરીના કારણે જ આ પ્રકારની હિંમત દબાણકર્તાઓ કરી શકે... બાકી તો ક્યાંક ક્યાંકથી ખૂણે-ખાંચરેથી દબાણ હટાવ્યાના ફોટા પડાવી બહાદુરી દેખાડનારને લોકો ઓળખી ગયા છે. મ્યુનિ. કમિશનર જેવા ઉચ્ચ અધિકારીઓ પણ મનપાની બાજુમાં જ આવા દબાણો ચલાવી લ્યે છે તે વધુ આંચકાજનક કે શંકાસ્પદ રીતે આશ્ચર્યજનક છે.

જો આપને આ પોસ્ટ ગમી હોય તો શેર કરો...