Author: નોબત સમાચાર
દરેક મતદારે એક સાથે ચાર મત કેવી રીતે આપવા?: ઈવીએમનું નિદર્શન
મહાનગરપાલિકા જામનગરની ચૂંટણી માટે
જામનગર તા. ૧૧: મતદારો મતદાનની પ્રક્રિયાને સરળ રીતે સમજી શકે તે માટે જામનગર શહેરના વિવિધ મત વિસ્તારોમાં ઈવીએમ નિદર્શન યોજાયું હતું. મહાનગરપાલિકાની ચૂંટણીમાં મતદારોને 'એક નહીં પણ ચાર વોટ' આપવાની પ્રક્રિયા અંગે પ્રત્યક્ષ નિદર્શન સાથે લોકભોગ્ય ભાષામાં સરળ સમજ અપાઈ હતી.
જામનગર મહાનગરપાલિકાની આગામી સામાન્ય ચૂંટણી પ્રક્રિયાને વધુ પારદર્શક અને લોકભોગ્ય બનાવવા માટે જિલ્લા વહીવટી તંત્ર દ્વારા સક્રિય કામગીરી હાથ ધરવામાં આવી છે. જિલ્લા કલેક્ટર અને જિલ્લા ચૂંટણી અધિકારી પી.બી. પંડ્યાના સીધા માર્ગદર્શન હેઠળ મતદારો મતદાનની પદ્ધતિથી સરળતાથી માહિતગાર થઈ શકે તે માટે ચૂંટણી અધિકારી અને પ્રાંત અધિકારી બ્રિજેશ કાલરિયા, આદર્શ બસર, સુધીર બારડ તગા સુશ્રી વિરલ માકડિયા દ્વારા શહેરના તમામ ૧ થી ૧૬ વોર્ડમાં ઈવીએમ નિદર્શનના વિશેષ કાર્યક્રમોનું આયોજન કરવામાં આવ્યું છે.
મહાનગરપાલિકાની ચૂંટણીમાં બહુ-સભ્ય મતદાન પદ્ધતિ હોવાથી મતદારોએ એક જ બેલેટ યુનિટ પરથી પોતાના મનપસંદ ચાર ઉમેદવારોને મત આપવાના હોય છે. આ પ્રક્રિયામાં મતદારોથી કોઈ ક્ષતિ ન રહી જાય તે માટે નિદર્શન સ્થળો પર અધિકારીઓ દ્વારા 'એક નહીં પણ ચાર વોટ' આપવાની પદ્ધતિની જીવંત અને સરળ સમજુતી આપવામાં આવી હતી.
શહેરના અલગ અલગ વોર્ડમાં યોજાયેલા આ કાર્યક્રમોમાં મોટી સંખ્યામાં નાગરિકોએ ઉત્સાહપૂર્વક ભાગ લીધો હતો. ખાસ કરીને વરિષ્ઠ નાગરિકો અને પ્રથમ વખત મતદાન કરનાર યુવા મતદારો માટે આ નિદર્શન અત્યંત ઉપયોગી સાબિત થયું હતું.
કલેક્ટર પી.બી. પંડ્યાએ આ તકે જણાવ્યું હતું કે, લોકશાહીના પર્વમાં દરેક નાગરિકનો મત કિંમતી છે અને કોઈ પણ મતદાર જાગૃતિના અભાવે મતદાનથી વંચિત ન રહે અથવા પ્રક્રિયામાં ભૂલ ન કરે તે માટે તંત્ર કટિબદ્ધ છે.
આ નિદર્શન પ્રક્રિયા આગામી દિવસોમાં પણ શહેરના વિવિધ વિસ્તારોમાં ચાલુ રાખવામાં આવશે જેથી મહત્તમ મતદાન સુનિશ્ચિત કરી શકાય. આ તકે ચૂંટણી શાખાના કર્મચારીઓ અને સ્થાનિક આગેવાનોએ હાજર રહીને મતદારોને મતાધિકારનો ઉપયોગ કરવા પ્રેરિત કર્યા હતાં.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
