લાલવાડી પાસે આવાસ નજીક મકાનમાંથી મળી આવ્યા ઈંગ્લીશ દારૂના પચ્ચીસ ચપલા

Author: નોબત સમાચાર

લાલવાડી પાસે આવાસ નજીક મકાનમાંથી મળી આવ્યા ઈંગ્લીશ દારૂના પચ્ચીસ ચપલા

બાઈકમાં છ બોટલ સાથે જતો શખ્સ ઝબ્બેઃ

જામનગર તા. ૭: જામનગરના લાલવાડી વિસ્તારથી આગળ નાગમતી આવાસ સામેની ગલીમાં એક મકાનમાંથી પોલીસે ઈંગ્લીશ દારૂના પચ્ચીસ ચપલા પકડી પાડ્યા છે. દિગ્વિજય પ્લોટ-પ૮માંથી એક બોટલ સાથે એક ઝડપાયો છે અને દિગ્વિજય પ્લોટ-૪૯માંથી છ બોટલ સાથે એક બાઈકચાલકની પોલીસે ધરપકડ કરી છે.

જામનગરના લાલવાડી વિસ્તારથી આગળ આવેલા નાગમતી આવાસ સામેની એક ગલીમાં એક મકાનમાં ઈંગ્લીશ દારૂનો જથ્થો પડ્યો હોવાની બાતમી પરથી સિટી એ ડિવિઝનના સર્વેલન્સ સ્ટાફે પીઆઈ એન.એ. ચાવડાની સૂચનાથી ગઈકાલે સાંજે ત્યાં આવેલા દિલીપ સત્યપાલ અછડા ઉર્ફે ગૌતમ નામના શખ્સના મકાનમાં દરોડો પાડી તલાશી લીધી હતી.

આ મકાનમાંથી ભારતીય બનાવટના અંગ્રેજી શરાબના પચ્ચીસ ચપલા મળી આવ્યા હતા. પોલીસે ચપલા કબજે કરી દિલીપ ઉર્ફે ગૌતમ અછડાની ધરપકડ કરી છે.

દિગ્વિજય પ્લોટ વિસ્તારની શેરી નં.પ૮માં કેળાની વખાર પાસેથી જગદીશ વિસનદાસ ગજરા ઉર્ફે બાટવા નામના શખ્સને દારૂની બોટલ સાથે પકડી લેવામાં આવ્યો છે.

દિગ્વિજય પ્લોટ વિસ્તારની શેરી નં.૪૯માં વીજ કંપનીની ઓફિસ પાછળની ગલીમાંથી ગઈકાલે રીયાઝ હારૂનભાઈ દરજાદા નામનો શખ્સ બાઈક પર ઈંગ્લીશ દારૂની બોટલ લઈને જતો હતો ત્યારે પોલીસે તેને દબોચી લઈ છ બોટલ, બાઈક તથા એક મોબાઈલ કબજે કર્યા હતા. આ શખ્સે દારૂની બોટલ વિપુલ ભગવાનજી ટાંક ઉર્ફે બાવ નામના શખ્સે આપી હોવાનું કબૂલ્યું છે.

જો આપને આ પોસ્ટ ગમી હોય તો શેર કરો...