Author: નોબત સમાચાર
જામનગરમાં ગૌ પૂજન સાથે બોળચોથના તહેવારની ઉજવણી
પવિત્ર શ્રાવણ માસમાં તહેવારોનો ધમધમાટ
જામનગર તા. ૧૩: પવિત્ર શ્રાવણ માસના અત્યંત મહત્ત્વપૂર્ણ એવા બોળ ચોથ, જે ગાયચોથ તરીકે પણ જાણીતું છે, તે પર્વની જામનગર શહેરમાં સોમવારના શ્રદ્ધા અને ઉમંગભેર ઉજવણી કરવામાં આવી હતી. શહેરના વિવિધ વિસ્તારોમાં સવારથી જ ધાર્મિક માહોલ જોવા મળ્યો હતો. ખાસ કરીને મહિલાઓ દ્વારા આ વ્રતનું વિશેષ મહત્ત્વ હોવાથી, રહેણાંક વિસ્તારોમાં મહિલાઓ અને અનેક નાના-મોટા મહિલા સત્સંગ મંડળો દ્વારા સામૂહિક રીતે ગૌ-પૂજનના કાર્યક્રમોનું આયોજન કરવામાં આવ્યું હતું.
ગઈકાલે સવારે આઠ વાગ્યાથી લઈને બપોરના બાર વાગ્યા સુધી આ ઉજવણીનો ધમધમાટ ચાલ્યો હતો. પરંપરાગત વિધિ-વિધાન અનુસાર, બ્રાહ્મણો દ્વારા મંત્રોચ્ચાર સાથે ગાય અને તેના વાછરડાનું પૂજન કરાવવામાં આવ્યું હતું. વ્રત રાખનાર બહેનોએ ગાય માતાને તિલક, પુષ્પ અને વસ્ત્ર અર્પણ કરી તેમની આરતી ઉતારી હતી અને પોતાના સંતાનોના દીર્ધાયુ અને સુખાકારી માટે પ્રાર્થના કરી હતી. ગૌ-પૂજનની વિધિ સંપન્ન થયા બાદ, બોળ ચોથના વ્રત સાથે જોડાયેલી પૌરાણિક વાર્તાનું શ્રવણ કરવામાં આવ્યું હતું,
આ ધાર્મિક કાર્યક્રમ માત્ર પૂજા-પાઠ સુધી સીમિત ન રહેતા, એક ભક્તિમય સત્સંગમાં પરિવર્તિત થયો હતો. ઉપસ્થિત બહેનોએ ભગવાન શ્રીકૃષ્ણ અને ગાય માતાના ગુણગાન ગાતા ભજનો અને કીર્તનની રમઝટ બોલાવી હતી, જેનાથી સમગ્ર વાતાવરણ ભક્તિરસથી તરબોળ થઈ ગયું હતું. આસ્થા અને આનંદના આ સુભગ સમન્વયમાં, ઘણી જગ્યાઓએ બહેનોએ પરંપરાગત રાસ રમીને પણ પોતાની શ્રદ્ધા અને ખુશી વ્યક્ત કરી હતી.
આ પવિત્ર દિવસે, વ્રત રાખનાર બહેનો ઘઉંની બનેલી કોઈ પણ વાનગી કે છરી- ચપ્પુ થી કાપેલી કોઈ વસ્તુ ખાવાનો ત્યાગ કરતી હોય છે, જે પરંપરાનું પણ સૌએ પાલન કર્યું હતું.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
