ભીમરાણા રોડ પર બાઈક આડે ઢોર ઉતરતા અકસ્માતમાં દ્વારકાના યુવાનનું નિપજ્યું મૃત્યુ

Author: નોબત સમાચાર

ભીમરાણા રોડ પર બાઈક આડે ઢોર ઉતરતા અકસ્માતમાં દ્વારકાના યુવાનનું નિપજ્યું મૃત્યુ

કાનપર-શેરડીની ગોળાઈમાં બાઈક પરનો કાબૂ ગૂમાવ્યા પછી ચાલકનું મૃત્યુઃ

જામનગર તા. ૧૫ઃ દ્વારકાથી ઓખા વચ્ચેના ધોરીમાર્ગ પર ભીમરાણા ગામ પાસે ગુરૃવારે સાંજે એક બાઈક આડે રખડતું ઢોર ઉતરતા બાઈક સ્લીપ થયું હતું. ઘવાયેલા દ્વારકાના યુવાનનું સારવાર દરમિયાન મૃત્યુ નિપજ્યંુ છે. જ્યારે અઢી મહિના પહેલાં કલ્યાણપુરના કાનપર શેરડી ગામ પાસે ગોળાઈમાં બાઈક તેના ચાલકના કાબૂ બહાર જતાં પછડાયેલા ભાડથર ગામના યુવાન ગંભીર રીતે ઘવાયા હતા. તેઓનું પણ મૃત્યુ થયું છે. પોલીસે બંને અકસ્માતની તપાસ શરૃ કરી છે.

દ્વારકા શહેરમાં મુરલીધર ટાઉનશીપમાં રહેતા રજતભાઈ રમેશભાઈ કોટક નામના એકત્રીસ વર્ષના લોહાણા યુવાન ગુરૃવારે સાંજે સાડા છએક વાગ્યે ઓખા માર્ગ પર જીજે-૧૬-એએચ ૭૬૮૧ નંબરના મોટરસાયકલમાં જતા હતા.

આ યુવાન મીઠાપુરથી દ્વારકા પરત ફરતી વખતે જ્યારે ભીમરાણા ગામ પાસે પહોંચ્યા ત્યારે અચાનક રખડતુ ઢોર રોડ પર આવી જતા તેની સાથે રજતભાઈનું મોટરસાયકલ ટકરાઈ પડ્યું હતું. રોડ પર પછડાયેલા રજતભાઈને માથા સહિતના શરીરના અન્ય ભાગોમાં ગંભીર ઈજા થયા પછી સારવારમાં ખસેડવામાં આવ્યા હતા. જ્યાં તેઓનું મૃત્યુ નિપજ્યું છે. તેમના પિતા રમેશભાઈ જયંતિભાઈ કોટકે પોલીસને જાણ કરી છે.

ખંભાળિયા તાલુકાના ભાડથર ગામમાં ખાટલાધાર વાડી વિસ્તારમાં વસાવટ કરતા સાગરદાન જેસાભાઈ અવસુરા (ઉ.વ.૩ર) નામના યુવાન ગઈ તા.ર૪ ઓગસ્ટની રાત્રે સાડા આઠેક વાગ્યે કાનપર શેરડી ગામથી ચપર ગામ તરફ જીજે-૩૭-એચ ૬૧૨૫ નંબરના મોટરસાયકલમાં જતા હતા.

તેઓ કાનપર-શેરડી નજીક પુલીયા પાસે ગોળાઈમાં પહોંચ્યા ત્યારે સ્પીડના કારણે રોડ પર ગોળાઈ ન થઈ શકતા સાગરદાન ફંગોળાઈ ગયા હતા. ગંભીર ઈજા પામેલા આ યુવાનને સારવારમાં ખસેડવામાં આવ્યા પછી તેઓનું મૃત્યુ નિપજ્યું છે. મૃતકના નાનાભાઈ ભરતભાઈ અવસુરાનું પોલીસે નિવેદન નોંધ્યું છે.

જો આપને આ પોસ્ટ ગમી હોય તો શેર કરો...