ખંભાળિયા ધોરીમાર્ગ પરથી કાળી રેતી ભરેલા ચાર ડમ્પર ડ્રોન સર્વેલન્સથી ઝબ્બે

Author: નોબત સમાચાર

ખંભાળિયા ધોરીમાર્ગ પરથી કાળી રેતી ભરેલા ચાર ડમ્પર ડ્રોન સર્વેલન્સથી ઝબ્બે

રૃપિયા પોણા પાંચ લાખના દંડની વસૂલાત માટે તજવીજઃ

જામનગર તા.૧૫ ઃ જામનગર-ખંભાળિયા ધોરીમાર્ગ પર ગઈકાલે ખાણ ખનીજ વિભાગની ટીમે ડ્રોન કેમેરાથી નજર રાખી કાળી રેતી ભરેલા ચાર ડમ્પર પકડી પાડ્યા હતા. તેના માલિકો પાસેથી રૃા.પોણા પાંચ લાખની દંડની વસૂલાત માટે તજવીજ કરાઈ છે. ચાલુ વર્ષમાં આ ટીમે ગયા વર્ષ કરતા અઢી ગણા વધુ દંડ વસૂલી સરકારી તિજોરીમાં જમા કરાવ્યા છે.

જામનગરના ખાણ ખનીજ વિભાગ દ્વારા ખનીજચોરી પકડવા માટે કરાતી કાર્યવાહી દરમિયાન હવે ખનીજચોરી ડામવા ડ્રોન કેમેરાનો ઉપયોગ શરૃ કરવામાં આવ્યો છે. તે રીતે ગઈકાલે જામનગર-ખંભાળિયા ધોરીમાર્ગ પરથી કાળી રેતીનંુ અનઅધિકૃત વહન કરતા ચાર ડમ્પર પકડી પડાયા છે.

જામનગરના ભૂસ્તરશાસ્ત્રી એસ.બી. જોષીની સૂચનાથી રોયલ્ટી ઈન્સ્પેક્ટર આર.આર. જાદવ, માઈન્સ સુપરવાઈઝર એ.બી. વાઢેર, પી.ડી. બારોટ અને ટીમ દ્વારા ગઈકાલે ડ્રોન કેમેરાથી કરાતા સર્વેલન્સમાં બ્લેક ટ્રેપ ભરેલા ચાર ડમ્પર મળી આવ્યા હતા. તે ચારેય વાહન કબજે લઈ ખાણ ખનીજ વિભાગની ટીમે તેને મેઘપર પોલીસ સ્ટેશનમાં મુકાવ્યા છે અને તેના માલિકો પાસેથી રૃા.૪ લાખ ૭૩ હજારની દંડની વસૂલાત માટે તજવીજ કરી છે.

ગયા જુન મહિનામાં ચેલા, વિજરખી, મિયાત્રા, કોંઝા તમેજ લાલપુરના પડાણા, જોડિયાના ખીરી અને ડોબર વિસ્તાર, બાલંભા, તારાણા, કાલાવડના મોટા વડાળા, ધ્રોલના ખીજડિયા, સોયલ, જાલીયા માનસર વગેરે ગામોમાં કરાયેલી ચકાસણી દરમિયાન ખાણ ખનીજની ટીમે ૩૧ કેસ નોંધ્યા હતા અને રૃા.૩૯ લાખ ૨૭ હજારની દંડની વસૂલાત કરી હતી.

ચાલુ વર્ષના એપ્રિલ મહિનાથી અત્યાર સુધીમાં કુલ ૮૮ કેસ અંગે કાર્યવાહી કરી રૃા.૧૧૪.૨૯ લાખની દંડની વસૂલાત કરવામાં આવી છે. ત્રણ વ્યક્તિના ફિલ્ડ સ્ટાફ હોવા છતાં પાછલા વર્ષની તુલનામાં અઢી ગણા વધુ દંડની વસૂલાત કરવામાં આ ટીમને સફળતા મળી છે.

જો આપને આ પોસ્ટ ગમી હોય તો શેર કરો...