દેવભૂમિ દ્વારકામાં જગત મંદિરના ભોગ ભંડારનું રૂપિયા ચાર કરોડના ખર્ચે નવનિર્માણઃ અધ્યક્ષ-ઉપાધ્યક્ષે કર્યું ઉદ્ઘાટન

Author: નોબત સમાચાર

દેવભૂમિ દ્વારકામાં જગત મંદિરના ભોગ ભંડારનું રૂપિયા ચાર કરોડના ખર્ચે નવનિર્માણઃ અધ્યક્ષ-ઉપાધ્યક્ષે કર્યું ઉદ્ઘાટન

પરિમલભાઈ-ધનરાજભાઈ નથવાણી અને અંબાણી પરિવારે રસ દાખવ્યો હતોઃ

દ્વારકા તા. ૮: પરિમલભાઈ અને ધનરાજભાઈ નથવાણીની શ્રદ્ધા અને ભક્તિ રંગ લાવી અને દ્રારકાધીશ મંદિરના ભોગ ભંડાર (રસોઈઘર) નું ચાર કરોડ રૂપિયાના ખર્ચે નવનિર્માણ થતા શ્રદ્ધાળુઓમાં આનંદ છવાયો છે.

દ્વારકાધીશ મંદિર પરિસરમાં આવેલ ભગવાનના ભોગ ભંડારના નવનિર્માણની કામગીરી દસ માસ પછી પૂર્ણ થતા દેવસ્થાન સમિતિના અધ્યક્ષ-ઉપાધ્યક્ષ હસ્તે અદ્યતન ભોગભંડારનું લોકાર્પણ કરવામાં આવ્યું હતું.

દ્વારકાધીશજી ભગવાનના ભોગ ભંડાર કે જ્યાં પૂજારી પરિવાર દ્વારા આવતો પ્રસાદ તથા ક્રમાનુસાર થતા છપ્પનભોગ, અન્નકૂટ ઉત્સવ, સૂકામેવા મનોરથ, કુંડલા ભોગ, કુનવારા ભોગ વિગેરે ભોગનું નિર્માણ કરવામાં બનાવવામાં આવે છે. તે બિલ્ડીંગ ખૂબ પૂરાણો અને જર્જરિત હાલતમાં લાંબા સમયથી હતો.

આ જર્જિરત ભોગભંડારનું નવનિર્માણ અંગે વહીવટી દૃષ્ટિએ ખૂબ જ જરૂરી હોવાથી દ્વારકાધીશ દેવસ્થાન સમિતિના પૂર્વ ઉપાધ્યક્ષ પરિમલભાઈ નથવાણીએ તેમજ વર્તમાન વર્તમાન ઉપાધ્યક્ષ ધનરાજભાઈ નથવાણીએ ઠાકોરજીના આ રસોઈઘર (ભોગ ભંડાર) ના નવનિર્માણ માટે ખૂબ જ ચીવટપૂર્વક વિચારણા કરી અને રાજ્ય સરકાર અને વહીવટી તંત્ર સાથે તેમજ દેવસ્થાન સમિતિ સાથે સંકલન કરી આ અંગે રજૂઆત કરી હતી.

રિલાયન્સ ગ્રુપના અનંત અંબાણીએ પણ ભોગભંડારાના નવનિર્માણ અંગે અંગત રસ દાખવ્યો હતો. તે પછી આ પ્રસાદઘરના પુનઃનિર્માણની કામગીરી ગત્ ઓક્ટોબર માસથી શરૂ કરીને દસ માસમાં પૂર્ણ થતાં તેનું લોકાર્પણ દેવસ્થાન સમિતિના અધ્યક્ષ અને જિલ્લા કલેક્ટર રાજેશ તન્ના તથા ઉપાધ્યક્ષ અને રિલાયન્સ ગ્રુપના ધનરાજભાઈ નથવાણીની ઉપસ્થિતિમાં કરવામાં આવ્યું હતું. આ ભોગ ભંડારને રિલાયન્સ ગ્રુપના સૌજન્યથી તૈયાર કરવામાં આવ્યો છે. આશરે ચાર કરોડ રૂપિયામાં બનેલા નવા બનેલા ૩ માળના ભોગભંડારમાં સ્ટાફ ઘર, બાલભોગ, રાજભોગ, સેથાર, જમવા માટેનો મોટોહોલ-પ્રસાદ ઘરનું નિર્માણ કરવામાં આવ્યું છે, જેને દેવસ્થાન સમિતિના અધ્યક્ષ-ઉપાધ્યક્ષ હસ્તે ખૂલ્લું મૂકવામાં આવ્યું હતું.

જો આપને આ પોસ્ટ ગમી હોય તો શેર કરો...