આવતીકાલે દ્વારકાના જગતમંદિરમાં ધામધૂમથી ઠાકોરજી સાથે તુલસીજીના વિવાહનો મહોત્સવ

Author: નોબત સમાચાર

આવતીકાલે દ્વારકાના જગતમંદિરમાં ધામધૂમથી ઠાકોરજી સાથે તુલસીજીના વિવાહનો મહોત્સવ

વરઘોડા પછી રાણીવાસમાં પણ ઉજવાશે તુલસી વિવાહ

દ્વારકા તા. ૧: આવતીકાલે રવિવારે દેવ ઉઠી અગિયારસના દિવસે દ્વારકાધીશ જગતમંદિરમાં તુલસી-વિવાહ મહોત્સવ ઉજવાશે. તે ઉપરાંત રાણીવાસના ગોપાલ સ્વરૂપનો વરઘોડો નગરમાં ફર્યા પછી ત્યાં પણ તુલસી વિવાહના કાર્યક્રમો યોજાશે.

આવતીકાલે તા.૦૨-૧૧-૨૦૨૫ને રવિવાર કારતક સુદ એકાદશીના શુભદિને દ્વારકાધીશ જગતમંદિરમાં ઠાકોરજી તથા તુલસીજીના પરંપરાગત રીતે ધામધૂમપૂર્વક લગ્ન યોજાશે. દર વર્ષે આ દિવસે દેવઉઠી એકાદશી અથવા તો દેવપ્રબોધિની એકાદશી તરીકે પણ ઉજવવામાં આવે છે. આ દિવસે ચાતુર્માસની સમાપ્તિ થાય છે અને અષાઢ સુદ અગિયારસથી સતત ચાર માસ સુધી યોગનિદ્રામાં શયન કરી રહેલાં ભગવાનને ઉત્થાન થાય છે. આથી જ આ દિવસને દેવઉઠી અગિયારસ પણ કહેવાય છે. દેવશયનીથી બંધ થયેલ શુભ-માંગલિક કાર્યો દેવઉઠી એકાદશીથી પુનઃ શરૂ થઈ જાય છે.

દ્વારકાધીશ મંદિર પરિસરમાં શારદાપીઠ સંચાલિત રાણીવાસના મંદિરોના પૂજારી વિજયભાઈ તથા આનંદભાઈ ઉપાધ્યાયના જણાવ્યાનુસાર મંદિર પરિસરમાંના રાણીવાસમાં આવેલ ગોપાલજી સ્વરૂપનો ભવ્ય વરઘોડો વાજતે ગાજતે નીકળશે જે શહેરના રાજમાર્ગો પર ફરી પુનઃ રાણીવાસમાં પધારશે. રાણીવાસ પરિસરમાં શ્રીજીના તુલસીજી સાથે ભવ્ય લગ્નોત્સવ યોજાશે. ગૌધુલીક સમયે નિજમંદિરમાં ઠાકોરજીના બાલસ્વરૂપનું શાસ્ત્રોકત વિધિ અને મંત્રોચ્ચાર સાથે તુલસીજી સાથે લગ્નોત્સવ યોજાશે. આ પ્રસંગનો લ્હાવો લેવા સમગ્ર દ્વારકાવાસીઓ તથા ભકતજનોને પ્રણવભાઈ પૂજારી તથા હાર્દિકભાઈ પૂજારી તરફથી ભાવભર્યું આમંત્રણ પાઠવ્યું છે.

દેવઉઠી અગિયારસે વિશેષ વિષ્ણુપૂજા

પ્રણવભાઈ પૂજારીના જણાવ્યાનુસાર શ્રીજી ભગવાનના તુલસીમાતા સાથેના વિવાહના કારતક સુદ અગિયારસના યોજવામાં આવે છે. કારતક સુદ નૌમથી તુલસીવાસનું વ્રત કરનાર બારસના દિવસે પારણા કરે છે. આ દિવસે ભગવાન વિષ્ણુના દરેક સ્વરૂપની ષોડશોપચાર પૂજા કરી શંખ, ઘંટ અને મૃદંગના નાદ સાથે મંત્ર પુષ્પાંજલિ અર્પણ કરાય છે. તુલસીમાતાને સૌભાગ્યવતીનો શણગાર કરી શાલીગ્રામની સાત પ્રદક્ષિણા કરવામાં આવે છે.

જો આપને આ પોસ્ટ ગમી હોય તો શેર કરો...