કલ્યાણપુરના નાવદ્રામાં ત્રણેક વર્ષથી તબીબી પ્રેક્ટિસ કરતા નકલી ડોક્ટરને પકડી પડાયો

Author: નોબત સમાચાર

કલ્યાણપુરના નાવદ્રામાં ત્રણેક વર્ષથી તબીબી પ્રેક્ટિસ કરતા નકલી ડોક્ટરને પકડી પડાયો

દ્વારકા એસઓજીએ કબજે કર્યાે મુદ્દામાલઃ

જામનગર તા. ૪: કલ્યાણપુરના નાવદ્રા ગામમાં ગઈકાલે દ્વારકા એસઓજીએ દરોડો પાડી એક બોગસ તબીબને પકડી પાડ્યો છે. ડોક્ટર ન હોવા છતાં ત્રણેક વર્ષથી તબીબી પ્રેક્ટિસ કરી રહેલા આ શખ્સ સામે ગુન્હો રજીસ્ટર કરાવાયો છે. તેના કહેવાતા દવાખાનામાંથી દવા સહિતના તબીબી સાધનો ઝબ્બે લેવાયા છે.

દેવભૂમિ દ્વારકા જિલ્લાના કલ્યાણપુર તાલુકાના નાવદ્રા ગામમાં મુખ્ય બજારમાં એક વ્યક્તિ ડોક્ટર ન હોવા છતાં ડોક્ટર હોવાનું જણાવી ખાનગી દવાખાનુ ચલાવતો હોવાની બાતમી પરથી ગઈકાલે દેવભૂમિ દ્વારકા એસઓજી ટીમે નાવદ્રાના મુખ્ય બજારમાં જૂના પાડામાં રમેશભાઈ કરમુરના મકાનમાં દરોડો પાડ્યો હતો.

આ સ્થળે તબીબ તરીકે પ્રેક્ટિસ કરતો નઝીર ગફારભાઈ જેઠવા નામનો શખ્સ મળી આવ્યો હતો. પોલીસે તેની પાસે જોવા માટે ડિગ્રી માંગતા આ શખ્સ ડોક્ટર ન હોવા છતાં ત્રણ વર્ષથી ડોક્ટર તરીકે પ્રેક્ટિસ કરતો હોવાનું ખૂલ્યું છે.

આ શખ્સના કહેવાતા દવાખાનામાંથી એસઓજીએ દવાની ટીકડીઓ, સ્ટેથોસ્કોપ, બીપી માપવાનું મશીન વગેરે તબીબી સાધનો કબજે કર્યા છે અને મૂળ દ્વારકાના આ શખ્સ સામે કલ્યાણપુર પોલીસ મથકમાં મેડિકલ પ્રેક્ટિસનર્સ એક્ટ હેઠળ ગુન્હો નોંધાવાયો છે.

જો આપને આ પોસ્ટ ગમી હોય તો શેર કરો...