ખંભાળિયામાં પી.સી. એન્ડ પી.એન.ડી.ટી. અંતર્ગત વર્કશોપઃ જોગવાઈ અંગે માર્ગદર્શન

Author: નોબત સમાચાર

ખંભાળિયામાં પી.સી. એન્ડ પી.એન.ડી.ટી. અંતર્ગત વર્કશોપઃ જોગવાઈ અંગે માર્ગદર્શન

જિલ્લા એડવાઈઝરી કમિટીના સભ્યોની ઉપસ્થિતિમાં

ખંભાળિયા તા. ૬: ગર્ભસ્થ શિશુના જાતિ પરીક્ષણ અટકાવવા અને સમાજમાં પુરૂષ અને સ્ત્રીનું પ્રમાણ સમતોલ જળવાઈ રહે તે હેતુથી સરકાર દ્વારા ઘડવામાં આવેલ અધિનિયમ પીસી એન્ડ એપીડીટી એકટ,૧૯૯૪ હેઠળ નોંધાયેલ સરકારી અને ખાનગી હોસ્પિટલો/ ક્લિનિકોના ડોકટરો તેમજ સંચાલકોને એકટના અમલીકરણ અને રેકર્ડ નિભાવણી માટે જરૂરી માર્ગદર્શન મળી રહે તેમજ પ્રધાનમંત્રી સુરક્ષિત માતૃત્વ અભિયાન અંતર્ગત સ્ત્રી રોગ નિષ્ણાંતોએ આપવાની થતી તબીબી સેવાઓ બાબતે જિલ્લા કક્ષાએ વર્કશોપનું આયોજન ખંભાળિયામાં કરવામાં આવ્યું હતું.

પીસી એન્ડ પીએનડીટી એકટ હેઠળ નોંધાયેલ હોસ્પિટલોમાં એક્ટના ક્ષતિરહિત અમલીકરણ થાય તે માટે જિલ્લા આરસીએચઓ ડો. બી.બી. કરમટા દ્વારા હોસ્પિટલમાં નિભાવવાના થતા રેકર્ડ, માસિક રીપોટીંગ, નિયત સમય મર્યાદામાં રજિસ્ટ્રેશન રીન્યુઅલ કરાવવા તેમજ ક્ષતિરહિત ફોર્મ-એફ ભરવા બાબતે વિગતવાર માર્ગદર્શન આપવામાં આવ્યું હતું. તદ્ઉપરાંત જિલ્લાના જાતિ પ્રમાણદર બાબતે પણ સૌને માહિતગાર કરવામાં આવ્યા હતા.

પ્રધાનમંત્રી સુરક્ષિત માતૃત્વ અભિયાન અંતર્ગત સ્ત્રી રોગ નિષ્ણાંતોએ આપવાની થતી તબીબી સેવાઓ બાબતે ડો. પી.જે. ચાંડેગ્રા દ્વારા વિસ્તૃત માહિતી આપવામાં આવી હતી. તેમજ જિલ્લામાં આરોગ્ય વિષયક સેવાઓ પૂરી પડતી તમામ સંસ્થા/ક્લિનિક/હોસ્પિટલોમાં ગુજરાત ક્લિનિકલ એસ્ટેબ્લીશમેન્ટ એકટના સંપૂર્ણપણે પાલન કરવા તેમજ સરકાર દ્વારા નક્કી કરેલ ધારા ધોરણ મુજમ રેકર્ડ નિભાવવા મુખ્ય જિલ્લા આરોગ્ય અધિકારી ડો. સી.બી. ચોબીસા દ્વારા સમજણ આપવામાં આવી હતી.

ઉકત વર્કશોપમાં જિલ્લા એડવાઈઝરી કમિટીના સભ્યો, આઈએમએ પ્રમુખ ડો.ચંદ્રકાંત જાદવ, તાલુકા કક્ષાના આઈએમએના હોદેદારો, જિલ્લા હોસ્પિટલના અધિક્ષક, જિલ્લા કક્ષાના આરોગ્ય અધિકારીઓ, તાલુકા હેલ્થ ઓફિસરો, સરકારી અને પ્રાઇવેટ સ્ત્રીરોગ નિષ્ણાંતો તેમજ પી.સી. એન્ડ પી.એન.ડી.ટી. એકટ હેઠળ નોંધાયેલ સરકારી અને પ્રાઈવેટ તબીબો ઉપસ્થિત રહેલ હતા.

પી.સી. એન્ડ પી.એન.ડી.ટી. એકટ-૧૯૯૪ અંતર્ગત નોંધાયેલ સરકારી અને ખાનગી તમામ ડોકટરોને પી.સી. એન્ડ પી.એન.ડી.ટી. એકટ હેઠળ થયેલ જોગવાઈઓ/ નિયમોના ચુસ્તપણે અમલીકરણ કરવા જિલ્લા દેવભૂમિ દ્વારકાના જિલ્લા એપ્રોપ્રિએટ ઓથોરીટી અને મુખ્ય જિલ્લા આરોગ્ય અધિકારીશ્રી ડો. સી.બી. ચોબીસા દ્વારા સૂચન કરવામાં આવેલ છે.

જો આપને આ પોસ્ટ ગમી હોય તો શેર કરો...