Author: નોબત સમાચાર
કાલાવડની મામલતદાર કચેરીના કોમ્પ્યુટર ઓપરેટર સામે ૯.પ૪ લાખની ઉચાપતની રાવ
જે લાભાર્થીની સહાય બંધ કરાઈ છે તેમાં ઘાલમેલ કરી નાખીઃ
જામનગર તા. ૧૮: કાલાવડની મામલતદાર કચેરીમાં કોમ્પ્યુટર ઓપરેટર તરીકે નોકરી કરતા એક કર્મચારીએ સમાજ સુરક્ષા શાખાની યોજનાના જે ૧૬ લાભાર્થીને સહાય આપવામાં આવતી નથી તેઓના ખાતામાં કારીગરી કરી, ખોટા રેકર્ડ બનાવી રૂ.૯ લાખ પ૪ હજારના સરકારી નાણાની ઉચાપત કર્યાની નાયબ મામલતદારે પોલીસમાં ફરિયાદ નોંધાવી છે.
કાલાવડ શહેરમાં આવેલી મામલતદાર કચેરીમાં સમાજ સુરક્ષા ખાતામાં આઉટ સોર્સિંગના કર્મચારી તરીકે કોમ્પ્યુટર ઓપરેટર ધ્રુવરાજસિંહ જીતુભા જાડેજા આઠ વર્ષ પહેલાં નિયુક્તિ પામ્યા હતા. કાલાવડ તાલુકાના મચ્છલીવડ ગામના આ યુવાનને ત્યાં નોકરી મળ્યા પછી તેઓએ કેટલાક આસામીઓના બેંક એકાઉન્ટ નંબર રી-ઈનિસીએટ કરી રૂ.૯ લાખ ૫૪ હજારની રકમ હજમ કરી લીધાની પોલીસમાં ફરિયાદ કરાઈ છે.
કાલાવડમાં નાયબ મામલતદાર (મહેકમ શાખા) તરીકે ફરજ બજાવતા મહેશભાઈ બાબુભાઈ કમેજારીયાએ નોંધાવેલી ફરિયાદમાં જણાવવામાં આવ્યા મુજબ ધ્રુવરાજસિંહ મામલતદાર કચેરી હેઠળ સમાજ સુરક્ષા ખાતામાં કોમ્પ્યુટર ઓપરેટર તરીકે આઠ વર્ષથી કામ કરતા હોવાના કારણે તેઓ લાંબા સમયથી ક્યા ક્યા આસામીને જુદા જુદા કારણસર સહાય બંધ કરવામાં આવી છે તેની જાણકારી ધરાવતા હતા.
ઉપરોક્ત જાણકારીનો ગેરલાભ લઈ ધ્રુવરાજસિંહે નાયબ મામલતદાર મહેશભાઈ કમેજારીયા તથા મામલતદારને જાણ ન થાય તે રીતે તેઓના આઈડી તેમજ પાસવર્ડનો ઉપયોગ કરી ગેરલાભ ઉઠાવ્યો છે. આ વ્યક્તિએ સમાજ સુરક્ષા શાખાની યોજનાના કુલ પૈકીના જે ૧૬ લાભાર્થીની સહાય બંધ થઈ છે તે લાભાર્થીઓના ખાતા રી-ઈનીસીયેટ કરી તેમના લાગતા વળગતાઓના એકાઉન્ટ નંબર તેમાં નાખી સહાયની રકમ બારોબાર મેળવી લીધી છે.
આ વ્યક્તિએ રાજ્ય સેવકની પોતાની કાયદેસરની ફરજમાં ગેરરીતિ કરી ઈરાદાપૂર્વક અન્ય આસામીના બેંક એકાઉન્ટ નંબરનો ઉપયોગ કરી રૂ.૯ લાખ પ૪ હજાર પચાવી પાડ્યા છે. સરકારી નાણાની ઉચાપત કરવા અંગે ધ્રુવરાજસિંહ સામે મહેશભાઈની ફરિયાદ પરથી ગુન્હો નોંધાયો છે. પીઆઈ એન.વી. આંબલીયાએ તપાસ શરૂ કરી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
