જામનગરમાંથી ઈંગ્લીશ દારૂની ૯૦ બોટલ સાથે બે ઝબ્બેઃ મોટરમાંથી ૭૦૦ લીટર દેશી ઝડપાયો

Author: નોબત સમાચાર

જામનગરમાંથી ઈંગ્લીશ દારૂની ૯૦ બોટલ સાથે બે ઝબ્બેઃ મોટરમાંથી ૭૦૦ લીટર દેશી ઝડપાયો

હિમાલય સોસાયટીમાં મકાનમાંથી ૯પ બોટલ કબજેઃ બે સામે ગુન્હોઃ

જામનગર તા. ૨૨: જામનગરમાંથી પોલીસે બે શખ્સને ઈંગ્લીશ દારૂની નાની મોટી ૯૦ બોટલ સાથે પકડી પાડ્યા છે. ત્રીજા સાગરિતનું નામ ખૂલ્યું છે. હિમાલય સોસાયટીમાં મકાનમાંથી દારૂની ૯૫ બોટલ સાથે એક શખ્સ ઝડપાયો છે. તેણે પોતાના ભાગીદારનું નામ આપ્યું છે. જ્યારે ખંભાળિયા રોડ પર મોડપર ગામના પાટીયા પાસેથી એલસીબીએ એક મોટરમાં લઈ જવાતો ૭૦૦ લીટર દેશી દારૂ પકડી પાડ્યો છે. ઝડપાયેલા શખ્સે એક સપ્લાયર તથા બે રીસીવરના નામ આપ્યા છે.

જામનગરના કસ્ટમ ઓફિસ વિસ્તારમાંથી શનિવારે બપોરે બે શખ્સ ઈંગ્લીશ દારૂનો જથ્થો લઈને પસાર થઈ રહૃાા હોવાની બાતમી પરથી સીટી એ ડિવિઝનના સર્વેલન્સ સ્ટાફે પીઆઈ એન.એ. ચાવડાની સૂચનાથી વોચ રાખી હતી. તે દરમિયાન ત્યાંથી બેડેશ્વરમાં કાપડની મીલ સામે રહેતો રાહુલ મહેશભાઈ ડાભી તથા નવાગામ ઘેડમાં રહેતો રાહુલ રાજેશભાઈ રાઠોડ નામના બે શખ્સ પસાર થયા હતા. આ શખ્સોને રોકાવી પોલીસે ચેક કરતા આ શખ્સો પાસેથી ભારતીય બનાવટના અંગ્રેજી શરાબની ૨૦ મોટી બોટલ તથા ૭૦ ચપલા મળી આવ્યા હતા. પોલીસે કુલ રૂ.૧૭,૦૦૦ની કિંમતનો દારૂનો જથ્થો કબજે કરી પૂછપરછ કરતા તેઓએ પોતાના સાગરીત નવાગામ ઘેડવાળા તુષાર ફીસડીયાનું નામ આપ્યું છે. ત્રણેય સામે ગુન્હો નોંધવામાં આવ્યો છે.

લાલપુર તાલુકાના મોડપર ગામના પાટીયા પાસે એક મોટરમાં દેશી દારૂનો જથ્થો લઈ જવામાં આવતો હોવાની બાતમી એલસીબીના ઋષિરાજસિંહ, યુવરાજસિંહ, હિતેન્દ્રસિંહ, કાસમભાઈને મળતા ગઈકાલે સવારે પીઆઈ વી.એમ. લગારીયાની સૂચનાથી એલસીબી સ્ટાફે વોચ રાખી હતી. જેમાં જામનગર-ખંભાળિયા રોડ પર મોડપરના પાટીયા પાસેથી જીજે-૬-કેપી ૩૭૦૭ નંબરની ક્રેટા મોટર ઝડપાઈ હતી.

તે મોટરની તલાશી લેવાતા તેમાંથી દેશી દારૂનો ૭૦૦ લીટરનો જથ્થો મળી આવ્યો હતો. તે જથ્થા સાથે પોરબંદરના બખરલા ગામના માલદે વાડીનેસમાં રહેતા કેશુ રામાભાઈ મોરી નામના શખ્સની અટકાયત કરાઈ છે. આ શખ્સની પૂછપરછ કરાતા તેણે ઉપરોક્ત જથ્થો પોરબંદરના કાટવાળા ગામની સીમમાંથી બબુ કરશન કટારાએ ભરી આપ્યાની અને લાલપુરના પડાણામાં ડાહીબેન સોરીયા તથા રામા સોરીયા નામના બે વ્યક્તિએ તે જથ્થો મંગાવ્યાની કબૂલાત મળી છે. એલસીબીએ દારૂ, મોટર, એક મોબાઈલ મળી કુલ રૂ.૮ લાખ ૪૫ હજારનો મુદ્દામાલ કબજે કર્યાે છે.

જામનગરના દિગ્જામ સર્કલ નજીક હિમાલય સોસાયટીમાં રહેતા સાગર વિજયભાઈ ચાચાપરા નામના શખ્સના મકાનમાં ગઈરાત્રે સિટી સી ડિવિઝનના સ્ટાફે બાતમીના આધારે દરોડો પાડતા ત્યાંથી અંગ્રેજી શરાબની જુદી જુદી બ્રાંડની ૯૫ બોટલ મળી આવી હતી. આ જથ્થા સાથે સાગર વિજયભાઈની ધરપકડ કરવામાં આવી છે. પોલીસે દારૂ, એક મોબાઈલ મળી કુલ રૂ.૧૦૯૨૮૦નો મુદ્દામાલ કબજે કર્યાે છે. આ જથ્થો દ્વારકા જિલ્લાના મીઠાપુર નજીકના આરંભડા ગામના ભગત રાણા સાથે ભાગીદારીમાં મંગાવવામાં આવ્યો હોવાની કબૂલાત સાગરે કરી છે.

જો આપને આ પોસ્ટ ગમી હોય તો શેર કરો...