ચેકપોસ્ટ પરથી પસાર થતી મોટરમાંથી મળી આવ્યા બીયરના અઠ્ઠયાવીસ ટીન

Author: નોબત સમાચાર

ચેકપોસ્ટ પરથી પસાર થતી મોટરમાંથી મળી આવ્યા બીયરના અઠ્ઠયાવીસ ટીન

પરમીટ પર ખરીદેલા તેર ટીન પણ ઝડપાયાઃ

જામનગર તા. ૧૯: કાલાવડના આણંદપર પાસે ચેકપોસ્ટ પરથી પસાર થયેલી એક મોટરમાંથી પોલીસે પરમીટ પર ખરીદેલા બીયરના તેર ટીન ઉપરાંત અન્ય અઠ્યાવીસ ટીન અને એક ખાલી ટીન સહિતનો બીયરનો જથ્થો અને દારૂની એક બોટલ કબજે કરી છે. કાલાવડના ખાનકોટડાના ત્રણ શખ્સ સામે પોલીસે ગુન્હો નોંધી મોટર સહીતનો મુદ્દામાલ કબજે લીધો છે.

કાલાવડ-રાજકોટ ધોરીમાર્ગ પર આવેલા આણંદપર ગામ પાસે પોલીસ દ્વારા ઉભી કરવામાં આવેલી ચેકપોસ્ટ પરથી ગુરૂવારે સાંજે જીજે-૧૦-ડીઆર ૨૫૫૫ નંબરની એક્સયુવી મોટર પસાર થઈ હતી. આ વેળાએ ત્યાં હાજર કાલાવડ ગ્રામ્ય પોલીસ સ્ટેશનના સ્ટાફે તે મોટરને રોકાવી હતી.

મોટરની તલાશી લેવામાં આવતા તેમાંથી બીયરના ૨૮ ટીન મળી આવ્યા હતા અને ઈંગ્લીશ દારૂની એક બોટલ તથા બીયરનંુ એક ખાલી ટીન પણ સાંપડ્યું હતું. દારૂના ઉપરોક્ત જથ્થા સાથે ખાનકોટડા ગામના અનિરૂદ્ધસિંહ કિરીટસિંહ જાડેજા, પ્રવીણ ઉર્ફે લાલા વલ્લભભાઈ ગમારા તથા દિગ્વિજયસિંહ મહાવીરસિંહ જાડેજા નામના ત્રણ શખ્સની પોલીસે ધરપકડ કરી છે.

બીયરનો જથ્થો, દારૂની બોટલ, ત્રણ મોબાઈલ તથા રૂા.૧૦ લાખની મોટર, પરમીટ પર લેવામાં આવેલા બીયરના ૧૩ ટીન મળી કુલ રૂા.૧૦,૨૨,૫૦૦નો મુદ્દામાલ કબજે કરી પોલીસે ત્રણેય સામે પ્રોહીબિશન એક્ટ હેઠળ કાર્યવાહી કરી છે.

જો આપને આ પોસ્ટ ગમી હોય તો શેર કરો...