જામનગરની વૃંદાવન સોસાયટીમાં થયેલી ચોરીનો ભેદ ઉકેલાયોઃ તમામ રોકડ, દાગીના કબજે કરાયા

Author: નોબત સમાચાર

જામનગરની વૃંદાવન સોસાયટીમાં થયેલી ચોરીનો ભેદ ઉકેલાયોઃ તમામ રોકડ, દાગીના કબજે કરાયા

ચાંદીબજારમાં આંટાફેરા કરતા શખ્સે આપી ચોરીની કબૂલાતઃ

જામનગર તા. ૨૦: જામનગરના વૃંદાવન સોસાયટી વિસ્તારમાં ગયા ગુરૂવારની રાત્રે એક મકાનમાં થયેલી ઘરફોડ ચોરીનો ભેદ પોલીસે ઉકેલી નાખ્યો છે. ચાંદીબજારમાં સોનાના દાગીના સાથે રાખી આંટાફેરા કરતા કાલાવડના ખરેડી રોડ પર ખડધોરાજી ગામ પાસે રહેતા શખ્સની અટકાયત કરી પૂછપરછ કરાતા આ શખ્સે ચોરી કર્યાની કબૂલાત કરી ચોરીમાં મેળવેલી પુરેપુરી રકમ તથા તમામ દાગીના કાઢી આપ્યા છે.

જામનગરના રણજીત સાગર રોડ પર આવેલા વૃંદાવન સોસાયટી વિસ્તારમાં વસવાટ કરતા તરૂણભાઈ રાયઠઠ્ઠા નામના વેપારીના મકાનમાં ગયા ગુરૂવારની રાત્રિથી શુક્રવારની સવાર સુધીમાં રૂ.સાડા છ લાખ રોકડા તથા સાત તોલા સોનાના દાગીનાની ચોરી થયાની પોલીસમાં ફરિયાદ કરવામાં આવી હતી.

આ ગુન્હાની તપાસ સિટી એ ડિવિઝનના પીઆઈ એન.એ. ચાવડાની રાહબરી હેઠળ સર્વેલન્સ સ્ટાફે શરૂ કરી હતી. જેમાં ગઈકાલે બાતમી મળી હતી કે, એક શખ્સ સોનાના દાગીના સાથે રાખી ચાંદીબજાર પાસે આંટાફેરા કરે છે. તેવી સ્ટાફના યોગેન્દ્રસિંહ, આર.એ. જાડેજા, વિપુલ સોનગરા, રાજેન્દ્રસિંહને મળેલી બાતમીના આધારે ધસી ગયેલી પોલીસ ટીમે શિવા જેરામભાઈ વાજેલીયા નામના કાલાવડ તાલુકાના નિકાવા ગામ પાસે ખડધોરાજી ગામ સામે રહેતા શખ્સની અટકાયત કરી હતી.

આ શખ્સની તલાશી લેવાતા તેની પાસેથી સોનાનું મંગળસૂત્ર, પેંડલવાળો સોનાનો ચેઈન, ત્રણ જોડી બુટી, સોનાની ત્રણ લેડીઝ વીટી, ગાભા કડલીની જોડી તથા રૂ.સાડા છ લાખ રોકડા મળી આવ્યા હતા. પોલીસે ઉપરોક્ત મુદ્દામાલ કબજે કરી શિવા જેરામની પૂછપરછ કરતા આ શખ્સે ગયા ગુરૂવારની રાત્રે વૃંદાવન સોસાયટીમાં ચોરી કર્યાની કબૂલાત આપી છે. પોલીસે મુદ્દામાલ જપ્ત કરી શિવા જેરામ વાજેલીયાની ધરપકડ કરી લીધી છે.

આ શખ્સ સામે કાલાવડ શહેર તેમજ ગ્રામ્ય અને રાજકોટના ગાંધીગ્રામ પોલીસ મથકમાં ચોરીના તેમજ અન્ય મળી કુલ ૧ર ગુન્હા નોંધાયેલા છે. આ શખ્સને રિમાન્ડ પર લેવાની તજવીજ કરવામાં આવી રહી છે.

જો આપને આ પોસ્ટ ગમી હોય તો શેર કરો...