Author: નોબત સમાચાર
કાલાવડના ટોડામાં સોલાર પ્લાન્ટમાં ૬૫૦૦ મીટર વાયરની ચોરી કરનાર ગેંગ દબોચાઈઃ અન્ય એક ચોરીની કબૂલાત
રોકડ, છ મોબાઈલ, સાધનો મળી કુલ રૂ.૧,૧૯,૮૫૦નો મુદ્દામાલ કબજેઃ
જામનગર તા. ૧૪: કાલાવડના ટોડા ગામમાં આવેલા સોલાર પ્લાન્ટમાંથી રૂ.૧ લાખ ૩૦ હજારના કેબલની ચોરીની તપાસ કરતી કાલાવડ ગ્રામ્ય પોલીસે છ શખ્સને દબોચી લીધા છે. આ શખ્સોએ ટોડામાં ચોરી કરવા ઉપરાંત મોરબીના મીતાણા ગામમાં પવનચક્કીમાંથી પણ કેબલ ચોરી કર્યાની કબૂલાત આપી છે. રૂ.૧,૧૯,૮૫૦નો મુદ્દામાલ કબજે કરી લેવાયો છે.
કાલાવડ તાલુકાના ટોડા ગામમાં એમ્પિન એનર્જી ગ્રીન નાઈન પ્રા.લિ. નામની કંપનીના આવેલા સોલાર પ્લાન્ટમાંથી થોડા સમય પહેલાં રૂ.૧ લાખ ર૦ હજારની કિંમતના ૬૫૦૦ મીટર કેબલની ચોરી થઈ ગઈ હતી જેની પોલીસમાં ફરિયાદ કરવામાં આવતા પીઆઈ પી.જી. પનારાના વડપણ હેઠળની પોલીસ ટીમ તપાસમાં જોતરાઈ હતી.
તે દરમિયાન ટેકનિકલ એનાલિસિસ તથા બાતમીદારો પાસેથી મળેલી વિગતોના આધારે પોલીસે રાજકોટના કુવાડીયા રોડ પર ગ્રીન લેન્ડ ચોકડી પાસે રહેતા અને શાકભાજી, ભંગારનો વેપાર કરતા મૂળ જસદણના ભંડારીયા ગામના ઉમેશ માધુભાઈ સોલંકી તથા પ્રદ્યુમનનગરમાં રહેતા રવિ ઈશ્વરભાઈ ધધાણીયા અને અંજારના આલીશા જુસબ શેખ, રહીશશા જુસબશા શેખ, બિલાલ જુસબ હિંગરોજા ઉર્ફે મોહસીન અને બુધનશા મામદશા ફકીર ઉર્ફે બાવલા નામના છ શખ્સને પકડી પાડ્યા હતા.
આ શખ્સોની પૂછપરછ કરાતા તેઓએ ટોડામાં સોલાર પ્લાન્ટમાં ચોરી કરવા ઉપરાંત મોરબીના ટંકારામાં તાલુકાના મીતાણા ગામમાં પવનચક્કીમાં ચોરી કર્યાની કબૂલાત આપી છે. આ શખ્સો પાસેથી રૂ.૯૮ હજાર રોકડા, છ મોબાઈલ, ચોરીમાં વાપરેલા સાધનો મળી કુલ રૂ.૧,૧૯,૮૫૦નો મુદ્દામાલ કબજે કરાયો છે.
આરોપી પૈકીના આલીશા શેખ સામે અંજારમાં છ ગુન્હા અને રહીમશા સામે અંજાર, દુધઈ, સામખીયારી પોલીસ સ્ટેશનમાં સાત ગુન્હા, બિલાલ સામે ગાંધીધામ તથા ધ્રોલમાં કુલ છ ગુન્હા નોંધાયેલા હોવાનું ખૂલ્યું છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
