પોતાની પુત્રીને કિડનીનું દાન કરી આપ્યું નવજીવનઃ પિતા-પુત્રી જીવે છે નોર્મલ જિંદગી

Author: નોબત સમાચાર

પોતાની પુત્રીને કિડનીનું દાન કરી આપ્યું નવજીવનઃ પિતા-પુત્રી જીવે છે નોર્મલ જિંદગી

નિવૃત્ત પોલીસ કર્મચારી પિતાનું અનોખું કન્યાદનઃ

જામનગર તા. ૧: કન્યાદાન હંમેશાં પવિત્ર માનવામાં આવ્યું છે. સામાન્ય રીતે લગ્નપ્રસંગે પિતા પોતાની પુત્રીને જીવનસાથીને સોંપે છે, તેને જ કન્યાદાન કહેવાય છે, પરંતુ જીવનમાં કેટલીક ઘટનાઓ એવી બને છે, જ્યાં કન્યાદનનો અર્થ વધુ ઊંડો અને અનોખો બની જાય છે. એક પિતા પોતાની વ્હાલસોયી પુત્રીને માત્ર નવા ઘર સુધી નહીં, પરંતુ નવા જીવન સુધી પહોંચાડે છે, જ્યારે પુત્રી બીમારીમાં ઝઝુમી રહી હોય, ત્યારે પિતા પોતાના અંગનું દાન કરીને તેને નવજીવન આપે એ કન્યાદન ખરેખર અનન્ય હોય છે.

આવો કિસ્સો જામનગરમાં ટ્રાફિક પોલીસમાં વર્ષો સુધી ફરજ બજાવી ગયેલા આસિસ્ટન્ટ પોલીસ ઈન્સ્પેક્ટર કાનજીભાઈ પનારાના જીવનમાં બન્યો હતો. કાનજીભાઈની પુત્રી શિલ્પાબેન કિડનીની ગંભીર બીમારીથી પિડાતી હતી. અનેક સારવાર છતાં સ્થિતિમાં સુધારો ન આવતા ડોક્ટરોએ કિડની પ્રત્યારોપણની સલાહ આપી, યોગ્ય દાતા ન મળતા કાનજીભાઈએ પોતાની કીડની આપવાનો નિર્ણય લીધો હતો. અમદાવાદની ઝાયડ્સ હોસ્પિટલના જરૂરી તમામ તબીબી પરીક્ષણો પછી કાનજીભાઈની કિડની યોગ્ય જણાતા નિષ્ણાત તબીબો ડો. પ્રકાશ દરજી, ડો. હિમાંશુ પટેલ, ડો. કમલેશ પટેલ, ડો. મુકેશ પટેલ સહિતનાઓએ ગત્ તા. ૧૭-૮-ર૦ર૪, ના સફળ ઓપરેશન કરી શિલ્પાબેનને નવું જીવન આપ્યું હતું. હાલ બન્ને પિતા-પુત્રી નોર્મલ જિંદગી જીવી રહ્યા છે. આમ આ બનાવ પિતાના નિઃસ્વાર્થ પ્રેમ અને ત્યાગનું જીવંત પ્રતીક બનવાની સાથે પિતાનું અનોખા કન્યાદાન તરીકે યાદગાર બની રહેશે.

જો આપને આ પોસ્ટ ગમી હોય તો શેર કરો...