નગરમાં હિટ એન્ડ રનઃ ડબલસવારી બાઈકની હડફેટે ચઢી ગયેલા વૃદ્ધનું સારવારમાં નિપજ્યું મૃત્યુ

Author: નોબત સમાચાર

નગરમાં હિટ એન્ડ રનઃ ડબલસવારી બાઈકની હડફેટે ચઢી ગયેલા વૃદ્ધનું સારવારમાં નિપજ્યું મૃત્યુ

ધ્રોલના વાંકિયા પાસે મોટરે હડફેટે લેતાં સ્કૂટર ચાલકનું મૃત્યુઃ

જામનગર તા. ૬: ધ્રોલ નજીકના વાંકીયા ગામ પાસે બે સપ્તાહ પૂર્વે એક એક્ટિવાને મોટરે ઠોકરે લેતા ઘવાયેલા રાજકોટના પ્રૌઢનું સારવારમાં મૃત્યુ નિપજ્યું છે. જ્યારે જામનગરમાં રણજીતસાગર રોડ પર જડેશ્વર પાર્ક પાસે ચાલીને રોડ ક્રોસ કરતા વૃદ્ધને અજાણ્યું બાઈક ઠોકર મારીને નાસી ગયા પછી સારવારમાં આ વૃદ્ધનું મૃત્યુ થયું છે. હિટ એન્ડ રનના આ બનાવની પોલીસમાં ફરિયાદ કરવામાં આવી છે.

રાજકોટ શહેરના રૈયા રોડ પર આવેલી આલાપ ગ્રીનસીટીની પાછળ જે.કે. પાર્કમાં રહેતા તુષારભાઈ પ્રવીણચંદ્ર વિઠ્ઠલપરા નામના યુવાનના પિતા પ્રવીણભાઈ ગઈ તા.૨૩મીએ બપોરે ધ્રોલ તાલુકાના વાકિયામાં આવેલા મંદિરે દર્શન કરવા માટે જીજે-૩-એમએ ૧૯૧૪ નંબરના એક્ટિવામાં આવ્યા હતા.

તેઓ મંદિરેથી દર્શન કરીને સાંજે સાતેક વાગ્યે ધ્રોલ તરફ જતા હતા ત્યારે જામનગર તરફથી પૂરપાટ ઝડપે દોડી આવેલી જીજે-૨૫-જે ૨૭૪૭ નંબરની મોટર તેઓની સાથે ટકરાઈ પડી હતી. આ અકસ્માતમાં રોડ પર જોશભેર પછડાયેલા પ્રવીણભાઈને માથા તથા શરીરના અન્ય ભાગોમાં ગંભીર ઈજા થઈ હતી. સારવાર માટે હોસ્પિટલમાં ખસેડવામાં આવેલા આ પ્રૌઢનું મૃત્યુ નીપજ્યું છે. તુષારભાઈએ ધ્રોલ પોલીસ સ્ટેશનમાં મોટરના ચાલક સામે ફરિયાદ નોંધાવી છે.

જામનગરના રણજીત સાગર રોડ પર આવેલા નંદનવન પાર્ક-રમાં રહેતા અને વીમા એજન્ટ તરીકે કામ કરતા નિલેશભાઈ રસિકલાલ ખાખરીયા નામના યુવાનના પિતા રસીકભાઈ ગઈ તા.૩૦ની સાંજે જડેશ્વર પાર્ક નજીકના નવા ૮૦ ફુટ રોડ પરથી રોડ ક્રોસ કરતા હતા.

ત્યારે અચાનક રોંગ સાઈડમાંથી ધસી આવેલા એક સફેદ કલરના મોટરસાયકલને ચાલકે તેઓને હડફેટે લઈ પછાડતા રસિકભાઈને ગંભીર ઈજા થઈ હતી. સારવાર માટે હોસ્પિટલમાં ખસેડવામાં આવેલા આ વૃદ્ધનું મૃત્યુ નીપજ્યું છે.

જો આપને આ પોસ્ટ ગમી હોય તો શેર કરો...