ગાંધીનગરમાં 'ટીએટી' ઉમેદવારોનું ઉગ્ર આંદોલનઃ શિક્ષણ સહાયકનો બીજો રાઉન્ડ યોજવા-જગ્યા વધારવાની માંગણી

Author: નોબત સમાચાર

ગાંધીનગરમાં 'ટીએટી' ઉમેદવારોનું ઉગ્ર આંદોલનઃ શિક્ષણ સહાયકનો બીજો રાઉન્ડ યોજવા-જગ્યા વધારવાની માંગણી

છેલ્લા દસ-દસ વર્ષથી ભરતીની પ્રતિક્ષા

ગાંધીનગર તા. ૨૦: ગુજરાતમાં શિક્ષક બનવાનું સ્વપ્ન જોતા હજારો ટીએટી પાસ ઉમેદવારોએ આજે ગાંધીનગરમાં તેમની પડતર માગણીઓને લઈને ઉગ્ર આંદોલન કર્યું. છેલ્લા દસ વર્ષથી ભરતીની રાહ જોઈ રહેલા આ ઉમેદવારોએ તાત્કાલિક ધોરણે શિક્ષણ સહાયકની ભરતીનો બીજો રાઉન્ડ જાહેર કરવાની અને ખાલી જગ્યાઓમાં વધારો કરવાની માગ કરી છે. ઉમેદવારોએ ચિમકી ઉચ્ચારી છે કે જ્યાં સુધી તેમની માગણીઓ સંતોષવામાં નહીં આવે ત્યાં સુધી તેઓ ગાંધીનગર છોડશે નહીં.

આંદોલન કરી રહેલા ઉમેદવારોએ જણાવ્યું કે, 'અમારી ઉંમર ૪૦ વર્ષની નજીક પહોંચી ગઈ છે અને આ ભરતી અમારા માટે છેલ્લી તક સમાન છે.' તેમણે દાવો કર્યો કે રાજ્યમાં શિક્ષકોની પુષ્કળ ખાલી જગ્યાઓ હોવા છતાં ભરતી પ્રક્રિયા ધીમી ગતિએ ચાલી રહી છે.

શિક્ષણ સહાયક (ધોરણ ૯ થી ૧ર) ની ભરતીમાં પ્રથમ રાઉન્ડ પછી ખાલી પડેલી જગ્યાઓ ભરવા માટે બીજા રાઉન્ડની માગ કરવામાં આવી છે. આ ઉપરાંત જુના શિક્ષકોની બદલી, ૩૧ મે ર૦રપ સુધીમાં નિવૃત્ત થનાર શિક્ષકો અને આચાર્યની ખાલી જગ્યાઓ સહિત અંદાજે પ૦૦૦ થી વધુ જગ્યાઓ બીજા રાઉન્ડમાં ઉમેરવાની માગ કરવામાં આવી છે.

ભરતી સમિતિ દ્વારા કેટલાક ઉમેદવારોને બે શાળાઓ ફાળવવામાં આવી હતી, જેના કારણે હાયર સેકન્ડરીમાં અંદાજે ૧પ૦૦ અને માધ્યમિક વિભાગમાં ૧૪૦૦ સહિત કુલ ર૯૦૦ થી વધુ જગ્યાઓ ખાલી પડી છે. ઉમેદવારોએ આ ખાલી જગ્યાઓ પર તાત્કાલિક ભરતી કરવા અને લાયક ઉમેદવારોને ન્યાય આપવાની માગ કરી છે.

એટલું જ નહ, ભરતી પ્રક્રિયા દરમિયાન ઉમેદવારનું નામ, વિષય, કેટેગરી, ફાળવેલ કેટેગરી, માર્કસ, જન્મ તારીખ અને શાળાના નામ સહિતની વિગતો સાથે ફાઈનલ ફાળવણી યાદી જાહેર કરવામાં આવે. બીજા રાઉન્ડમાં પણ પ્રથમ રાઉન્ડની જેમ મેરિટના આધારે દરેક કેટેગરીના ઉમેદવારોને જનરલ અને કેટેગરીની સીટ પસંદ કરવાનો વિકલ્પ આપવાની જોગવાઈ કરવાની રજૂઆત કરવામાં આવી છે.

જો આપને આ પોસ્ટ ગમી હોય તો શેર કરો...