ભાણવડ પંથકમાં મહિલા પર દુષ્કર્મ ગુજારનાર પરપ્રાંતીય શખ્સને દસ વર્ષની સખત કેદ, દંડ

Author: નોબત સમાચાર

ભાણવડ પંથકમાં મહિલા પર દુષ્કર્મ ગુજારનાર પરપ્રાંતીય શખ્સને દસ વર્ષની સખત કેદ, દંડ

બાળકોને પતાવી દેવાની આપી હતી ધમકીઃ

જામનગર તા. ૨૩: ભાણવડ તાલુકાના ગ્રામ્ય પંથકમાં વસવાટ કરતી એક મહિલાને તેણીના બાળકોને મારી નાખવાની ધમકી આપી ગયા વર્ષે મૂળ મધ્યપ્રદેશના એક શખ્સે દુષ્કૃત્ય ગુજાર્યું હતું. આ શખ્સને અદાલતે દસ વર્ષની સખત કેદ અને કુલ રૂ.૧૫ હજારનો દંડ ફટકાર્યાે છે.

દેવભૂમિ દ્વારકા જિલ્લાના ભાણવડ તાલુકાના એક ગ્રામ્ય પંથકમાં આવેલા ખેતરમાં વસવાટ કરતા મહિલાને ગયા વર્ષે મૂળ મધ્યપ્રદેશના વતની મુકેશ નવલસિંગ બધેલ ઉર્ફે બલવીર નામના શખ્સે દુષ્કર્મનો ભોગ બનાવી હતી. આ મહિલાના પતિ ત્યાં ન હોવાનો ગેરલાભ લઈ આ શખ્સે તે મહિલાને તેણીના બાળકોને મારી નાખવાની ધમકી આપી દુષ્કર્મ ગુજાર્યું હતું.

આ બાબતની જે તે વખતે ભાણવડ પોલીસ સ્ટેશનમાં ફરિયાદ નોંધાવવામાં આવતા પોલીસે ગુન્હો નોંધી મુકેશ નવલસિંગની ધરપકડ કરી હતી. ઉપરોક્ત કેસ ખંભાળિયાની સેશન્સ કોર્ટમાં ચાલી જતા અદાલતે સરકાર પક્ષની દલીલો ગ્રાહ્ય રાખી આરોપી મુકેશ ઉર્ફે બલવીર નવલસિંગ બધેલને તક્સીરવાન ઠરાવી દસ વર્ષની સખત કેદ, રૂ.૧૦ હજારનો દંડ ફટકાર્યાે છે. દંડ ભરવામાં ન આવે તો વધુ છ મહિનાની કેદની સજા ફરમાવાઈ છે અને અન્ય ગુન્હામાં પણ ત્રણ વર્ષની કેદ અને રૂ.૫ હજારનો દંડ ફટકારાયો છે.

જો આપને આ પોસ્ટ ગમી હોય તો શેર કરો...