લક્કી ડ્રો અંગેની સ્કીમ મૂકી છેતરપિંડી કરવાના આરોપમાં એકના જામીન મંજૂર

Author: નોબત સમાચાર

લક્કી ડ્રો અંગેની સ્કીમ મૂકી છેતરપિંડી કરવાના આરોપમાં એકના જામીન મંજૂર

દર મહિને બાઈક જીતવાનો યોજાયો હતો ડ્રોઃ

જામનગર તા. ૧૧: આઠ વર્ષ પહેલાં ધ્રોલમાં દર મહિને ડ્રો યોજી મોટરસાયકલ જીતવાની સ્કીમ મુકનાર આસામી સામે રૂ.૩૪ લાખથી વધુની છેતરપિંડી કરી લેવાયાની ફરિયાદ પોલીસમાં થઈ હતી. આ આરોપીએ જામીનમુક્ત થવા કરેલી અરજી અદાલતે ગ્રાહ્ય રાખી છે.

ધ્રોલના નિલેશભાઈ દેવરાજભાઈ ગડારા નામના આસામીએ વર્ષ ૨૦૧૭માં ગણેશ ગ્રુપ નામનું મિત્રો માટેનું એક ગ્રુપ બનાવી તેમાં સભ્ય બન્યા પછી દર મહિને હપ્તો ભરી ડ્રોમાં ભાગ લેવા અને દર મહિને એક બાઈક જીતવાના ઈનામની જાહેરાત કરી હતી. તેમાં ચાલીસ હપ્તા રાખવામાં આવ્યા હતા.

આ સ્કીમમાં ધ્રોલના શૈલેષ દેવજીભાઈ પરમાર, દિનેશ માધાભાઈ ચૌહાણે પૈસા ભર્યા હતા. તેઓએ સળંગ ૪૦ હપ્તા સુધી હપ્તા આપ્યા પછી મોટરસાયકલ ઈનામમાં નહી લાગતા તેઓએ રૂ.૫૪ હજાર પરત મેળવવા નિલેશ દેવરાજભાઈનો સંપર્ક કર્યાે હતો. ગલ્લાતલ્લા કર્યા પછી નિલેશનો મોબાઈલ પણ બંધ થઈ ગયો હતો.

તે પછી શૈલેષ અને દિનેશ ચૌહાણ ઉપરાંત અન્ય આસામીઓ પાસેથી પણ નિલેશ દેવરાજભાઈએ રૂ.૩૪,૧૮,૦૦૦ની રકમ સ્કીમના નામે ઉઘરાવી લીધાનું બહાર આવતા શૈલેષ તથા દિનેશે બે જુદી જુદી ફરિયાદ નોંધાવી હતી. પોલીસે નિલેશ દેવરાજભાઈ ડગારાની ધરપકડ કરી હતી. જેલહવાલે થયેલા આ આરોપીએ જામીનમુક્ત થવા અરજી કરતા અદાલતે વકીલ એચ.બી. પરમાર, સુમિત વડનગરા, ભાવસિંહ જાડેજાની દલીલો ગ્રાહ્ય રાખી આરોપીને જામીન પર મુક્ત કર્યાે છે.

જો આપને આ પોસ્ટ ગમી હોય તો શેર કરો...