દરેડ જીઆઈડીસીમાં મોટરમાંથી દારૂની એકત્રીસ અને બીયરની સાત બોટલ મળી

Author: નોબત સમાચાર

દરેડ જીઆઈડીસીમાં મોટરમાંથી દારૂની એકત્રીસ અને બીયરની સાત બોટલ મળી

ધરારનગરમાં મકાનમાંથી દારૂની નાની-મોટી છ બોટલ કબજેઃ

જામનગર તા. ર૮: જામનગરના દરેડ જીઆઈડીસીમાં એક કારખાના પાસેથી પોલીસે મોટરમાં દારૂ લઈ જતા બે શખ્સને પકડી બીયરના સાત ટીન અને દારૂની એકત્રીસ બોટલ કબજે કરી છે. બે સપ્લાયરના નામ ખૂલ્યા છે. ધરારનગરમાં એક મકાનમાંથી પોલીસે દારૂની ત્રણ બોટલ અને ત્રણ ચપલા કબજે કર્યા છે.

જામનગર નજીક દરેડ જીઆઈડીસીના પ્લોટ નં.૩૦૧૭માં ગઈકાલે સાંજે ઈંગ્લીશ દારૂની હેરાફેરી થતી હોવાની બાતમી પરથી પંચકોશી બી ડિવિઝનના સ્ટાફે દરોડો પાડતા ત્યાંથી ગ્રીન સિટી નજીક હરિધામ સોસાયટીમાં રહેતા નવનીત પરસોત્તમ ડોબરીયા અને ડેનીશ પરસોત્તમ ડોબરીયા નામના બે શખ્સ બલેનો મોટર સાથે ઝડપાઈ ગયા હતા.

આ શખ્સો પાસેથી ઈંગ્લીશ દારૂની ૩૧ બોટલ, બીયરના સાત ટીન મળી આવ્યા હતા. પોલીસે રૂ. ૬૯૫૯૦નો દારૂ તથા રૂ. પ લાખની મોટર કબજે કરી છે. આ શખ્સોએ દારૂનો જથ્થો નિકુંજ જમનભાઈ ગધેથરીયા તથા રવિ ગધેથરીયાએ આપ્યો હોવાની કબૂલાત કરી છે. ચારેય સામે પંચકોશી બી ડિવિઝનમાં ગુન્હો રજીસ્ટર કરાવવામાં આવ્યો છે.

જામનગરના સરૂ સેક્શન રોડ પર ધરારનગર-૨માં રહેતા કિરીટસિંહ ચુડાસમા નામના શખ્સના મકાનમાં ઈંગ્લીશ દારૂનો જથ્થો પડ્યો હોવાની બાતમી પરથી શનિવારે રાત્રે સિટી બી ડિવિઝનના સ્ટાફે દરોડો પાડ્યો હતો.

આ મકાનમાંથી ભારતીય બનાવટના અંગ્રેજી શરાબની ત્રણ બોટલ તથા ત્રણ ચપલા મળી આવ્યા હતા. દરોડા પહેલા નાસી ગયેલા કિરીટસિંહની પોલીસે શોધખોળ શરૂ કરી છે.

જામનગર-ખંભાળિયા રોડ પર લાખાબાવળ ગામ પાસેથી ગઈરાત્રે પસાર થતાં રામેશ્વરનગરના માટેલચોક વાળા દીપક હસુભાઈ કોટેચા ઉર્ફે કોટીયા નામના શખ્સને પોલીસે દારૂની બોટલ સાથે પકડી લીધો છે.

જો આપને આ પોસ્ટ ગમી હોય તો શેર કરો...