ખંભાળીયામાં જાહેરમાં ઘાસચારો નાખનારા સામે કડક પગલાં લેવાયા

Author: નોબત સમાચાર

ખંભાળીયામાં જાહેરમાં ઘાસચારો નાખનારા સામે કડક પગલાં લેવાયા

રખડતા ઢોરની સમસ્યા અંંગે

ખંભાળીયા તા. ૨૨: ખંભાળીયામાં બે દિવસ પહેલા રખડતા ગૌવંશની હાઈવે તથા અકસ્માતના સંદર્ભમાં દ્વારકા જિલ્લા પોલીસ વડા જયરાજસિંહ વાળા તથા ડીવાય.એસ.પી. વિસ્મય માનસેતાના માર્ગદર્શનમાં જિલ્લા ટ્રાફિક ઈન્ચાર્જ પી.આઈ. ટી.ડી.ચુડાસમા તથા ખંભાળીયા પાલિકાના સંજયભાઈ કરમુર દ્વારા ખાસ ઝુંબેશ હાથ ધરવામાં આવી હતી.

પાલિકા તથા પોલીસ દ્વારા શહેરમાં ઘાસચારો વેચતા ધંધાર્થીઓની મુલાકાત લઈને ગૌશાળા કે ગૌશાળા માટે નિયત સ્થળો પર જ ઘાસચારો નાખવા તથા નિયત સ્થળ સિવાય ઘાસચારો નાખનારા સામે કડક પગલાંની ચેતવણી આપવામાં આવી હતી.

માલિકીના ઢોરને રખડતા મુકનાર સામે પગલાં

ખંભાળીયા શહેરના અનેક ઢોરમાલિકો તેમની ગાયોને દૂધ દોહીને રખડતા મુકી દેતા હોય, આવા રખડતા ઢોરને પકડવા સાથે તેમની સામે કાર્યવાહી તથા દંડ પણ કરવામાં આવશે, જેથી માલિકીના ઢોરને રખડતા ન મુકવા જણાવાયું છે. આજે ખંભાળીયા ડે.કલેકટર દ્વારા પણ ગૌશાળા સંચાલકો તથા ઘાસચારા વેપારીઓ સાથે બેઠક પણ કરવામાં આવી છે.

ઘાસચારો નાખવાના સ્થળો અંગે સ્પષ્ટતા

જિલ્લા પોલીસ વડા તથા વહીવટી તંત્ર દ્વારા રખડતા ઢોરને કારણે પ્રાણઘાતક અકસ્માતો થતાં હોય, ઘાસચારો રસ્તા પર કે જ્યાં-ત્યાં ન નાખવા સૂચના આપવામાં અવેલ, પણ ખંભાળીયા પાલિકા દ્વારા ઘાસચારો ગૌશાળા કે ગાયો માટે વર્ષોથી નિયત સ્થળે ઘાસ નાખતા લોકોને પણ મનાઈ કરતા તથા ઘાસના વેપારીઓને ના કહેતા ગઈકાલે ભાદરવા અમાસના શ્રાદ્ધના અંતિમ દિને રામનાથ મંદિર સહિત અનેક સ્થળે ગૌમાતા ઘાસચારા વગરની રહી હતી.

ખંભાળીયાના અગ્રણી હિતેન્દ્રભાઈ આચાર્યએ આ બાબતે જિલ્લા પોલીસવડા જયરાજસિંહ વાળાને રજૂઆત કરતા તેમણે પણ જાહેરમાં રસ્તા પર તથા જ્યાં -ત્યાં ઘાસચારો નાખતા લોકોને મનાઈ કરાઈ છે. તથા ગૌશાળા કે ગાયો માટે ઘાસચારાની નિયત જગ્યા પર ઘાસ નાખવાની મનાઈ નહીં કરાયાની સ્પષ્ટતા પણ કરી હતી. છતાં તંત્ર દ્વારા ઉત્સાહમાં આવીને રખડતા ઢોર અંગે પગલાં લેવાને બદલે ઘાસ નાખતા દાતાઓને પણ બંધ કરાવતા ભારે રોશની લાગણી ફેલાઈ હતી.

જો આપને આ પોસ્ટ ગમી હોય તો શેર કરો...