ખંભાળિયાના સોનારડીમાં જીવંત વીજવાયર બે ખેડૂત પર મોત બનીને ત્રાટક્યોઃ અરેરાટી

Author: નોબત સમાચાર

ખંભાળિયાના સોનારડીમાં જીવંત વીજવાયર બે ખેડૂત પર મોત બનીને ત્રાટક્યોઃ અરેરાટી

ખેતરમાં કામ કરતા બે પ્રૌઢ પર હેવી લાઈનનો વાયર તૂટ્યોઃ

ખંભાળિયા તા. ૨૦: ખંભાળિયા તાલુકાના ભાતેલ ગામના એક ખેતરમાં ગઈકાલે સાંજે સોનારડી ગામના બે પ્રૌઢ કામ કરતા હતા ત્યારે વીજ કંપનીની ઉપરથી પસાર થતી હેવી વીજલાઈનમાંથી એક વાયર તૂટીને આ બંને વ્યક્તિ પર પડ્યા પછી જોરદાર વીજ આંચકો લાગતા બંને વ્યક્તિના સ્થળ પર જ કરૂણ મૃત્યુ નિપજ્યા હતા. બનાવની જાણ થતાં પોલીસ તથા વીજ કંપનીની ટીમ ધસી આવી હતી. પોલીસે એક મૃતકના નાનાભાઈનું નિવેદન નોંધી તપાસ હાથ ધરી છે.

ખંભાળિયા તાલુકાના સોનારડી ગામમાં રહેતા તખુભા પ્રતાપસંગ જાડેજા (ઉ.વ.પર) તથા રામસંગ ભોજુભા જાડેજા (ઉ.વ.૬૩) નામના બે ખેડૂત ગઈકાલે બપોરે ભોજન લીધા પછી ચારેક વાગ્યે ભાતેલ ગામની સીમમાં આવેલા તખુભા પ્રતાપસંગના ખેતરમાં વાવેલી મગફળીમાં બાકી રહેલું કામ પૂર્ણ કરતા હતા.

આ વેળાએ સાડા ચારેક વાગ્યે ઉપરથી પસાર થતી ભાતેલ એ.જી.ની ઈલેકટ્રીક લાઈનમાંથી જીવંત વીજ પ્રવાહ વહેતો હતો તે વાયર તૂટીને આ ખેડૂતો પર મોત બનીને ત્રાટક્યો હતો. કામ કરી રહેલા બંને પ્રૌઢ અચાનક વાયર માથે પડતા ગભરાયા હતા પરંતુ તેઓ કંઈ કરે તે પહેલા જોરદાર વીજ આંચકો લાગતા બંનેના ઘટનાસ્થળે જ મૃત્યુ નિપજ્યા હતા.

બનાવની ત્યાં હાજર લોકોને જાણ થતાં દોડધામ મચી હતી. સોનારડી ગામના અગ્રણીઓ તેમજ બંને પ્રૌઢના પરિવારજનો આવી પહોંચ્યા હતા. અગ્રણી ભીખુભા દાજુભા જાડેજા સહિતના અગ્રણીઓએ બંને પ્રૌઢને હોસ્પિટલ ખસેડવાની તજવીજ કરી હતી. જ્યાં ફરજ પરના તબીબોએ બંને વ્યક્તિઓને ચકાસ્યા પછી મૃત્યુ પામેલા જાહેર કર્યા હતા. મૃતક રામસંગ જાડેજાના નાનાભાઈ ઘનુભા ભોજુભા જાડેજાએ પોલીસને વાકેફ કરી છે.

હાલમાં શ્રાદ્ધનો મહિનો ચાલી રહ્યો છે ત્યારે જ બે ઘરના મોભી આવી રીતે મૃત્યુ પામતા નાના એવા સોનારડી ગામમાં શોકની લાગણી પ્રસરી ગઈ છે. આ બનાવ અંગે પીજીવીસીએલ તંત્ર દ્વારા જણાવવામાં આવ્યું છે કે, મેઈન વાયર કંડકટરમાંથી જીવંત અવસ્થામાં તૂટી પડ્યો છે તેની પીજીવીસીએલ દ્વારા તપાસ કરવામાં આવશે તથા આ બંને વ્યક્તિઓના મૃત્યુ અંગે નિયમ મુજબ વળતર આપવાની પણ કાર્યવાહી કરવામાં આવશે.

જો આપને આ પોસ્ટ ગમી હોય તો શેર કરો...