જામનગરમાં અસહ્ય બફારોઃ મહત્તમ ૩પ.પ ડીગ્રી

Author: નોબત સમાચાર

જામનગરમાં અસહ્ય બફારોઃ મહત્તમ ૩પ.પ ડીગ્રી

વાતાવરણમાં ભેજનું પ્રમાણ ૮૯ ટકાએ પહોંચતા

જામનગર તા. ૮: જામનગરમાં વાદળોની આવન-જાવન વચ્ચે વાતાવરણમાં ભેજનું પ્રમાણ ૧ર ટકા વધીને ૮૯ ટકાએ પહોંચી જતા બફારો અનુભવાયો હતો. છેલ્લા ચોવીસ કલાકમાં મહત્તમ તાપમાન ૧ ટકા વધીને ૩પ.પ ડીગ્રી નોંધાયું હતું.

હાલાર સહિત ગુજરાતમાં ઝપાટાબંધ પવન સાથે વરસાદ પડવાની આગાહી હવામાન વિભાગ દ્વારા કરવામાં આવી છે જે સાચી પણ ઠરી રહી છે. રાજ્યના ઘણાં ભાગોમાં વેગીલા વાયરાઓ સાથે કમોસમી વરસાદ પડ્યો છે.

જામનગરમાં પણ પલટાયેલા હવામાન પછી ગઈકાલે પણ ઝાપટુ પડ્યું હતું. નગરના નભમાં વાદળોના આંટાફેરા વચ્ચે એક જ દિવસમાં વાતાવરણમાં ભેજનું પ્રમાણ ૧ર ટકા સુધી વધીને ૮૯ ટકાએ પહોંચી ગયું હતું. ભેજનું પ્રમાણ વધુ રહેતા તેમજ પવનની ગતિ પણ દિવસ દરમિયાન ઓછી રહેતા પ્રજાજનો અસહ્ય બફારાથી પરશેવે રેબઝેબ થઈને ત્રાહિમામ્ પોકારી ઊઠ્યા હતાં.

જામનગરમાં આજે સવારે પૂરા થતાં ચોવીસ કલાક દરમિયાન એક ડીગ્ધીને મહત્તમ તાપમાન ૩પ.પ ડીગ્રી નોંધાયું હતું, જ્યારે લઘુતમ તાપમાનનો પારો સડસડાટ ૪.પ ડીગ્રી સુધી નીચે શરકીને રર.પ ડીગ્રીએ પહોંચી ગયો હતો. મહત્તમ તાપમાનમાં થયેલા વધારાના પગલે બપોરે ગરમી અનુભવાઈ હતી. પવનની ગતિ પ્રતિકલાકની સરેરાશ ૩૦ થી ૩પ કિ.મી.ની રહેવા પામી હતી.

જામનગરમાં ગઈકાલે સાંજે નભમાં વરસાદી વાદળોનો જમાવડો જોવા મળ્યો હતો અને તીવ્ર ગતિએ પવન ફૂંકાયો હતો. ત્યારપછી ઝાપટુ પડ્યું હતું. જેના પગલે સમગ્ર વાતાવરણમાં ઠંડક પ્રસરતા પ્રજાજનોએ રાહત અનુભવી હતી.

જો આપને આ પોસ્ટ ગમી હોય તો શેર કરો...