ધ્રાફા પાસે ફૂલઝર નદીના કાંઠે ભેંસો ચરાવી રહેલા પ્રૌઢ પર આકાશી વીજળી ત્રાટકીઃ મૃત્યુ

Author: નોબત સમાચાર

ધ્રાફા પાસે ફૂલઝર નદીના કાંઠે ભેંસો ચરાવી રહેલા પ્રૌઢ પર આકાશી વીજળી ત્રાટકીઃ મૃત્યુ

અચાનક શરૂ થયેલા વંટોળીયા વચ્ચે મોત ત્રાટક્યું:

જામનગર તા. ૨૦: જામજોધપુર નજીકના ધ્રાફા ગામની સીમમાં ફૂલઝર નદીના કાંઠે ગઈકાલે સાંજે જામજોધપુર તાલુકાના જૂની આંબરડી ગામના એક ભરવાડ પ્રૌઢ પોતાની ભેંસો ચરાવી રહ્યા હતા ત્યારે અચાનક શરૂ થયેલા વંટોળીયા વચ્ચે તેમના પર આકાશી વીજળી ત્રાટકી હતી. દાઝી ગયેલા આ પ્રૌઢનું મૃત્યુ નિપજ્યું છે. શેઠવડાળા પોલીસે આગળની કાર્યવાહી કરી છે.

જામનગર શહેર-જિલ્લા ઉપરાંત રાજ્યભરમાં ગઈકાલે ભારે પવન સાથે માવઠું વરસી પડ્યું હતું. જેમાં જામનગર શહેરમાં પણ બપોરે સાડા ત્રણેક વાગ્યે ફૂંકાયેલા ભારે પવન વચ્ચે વરસાદ શરૂ થતાં દોડધામ મચી હતી. જામનગર શહેરમાં ઠેકઠેકાણે વૃક્ષો, થાંભલાઓ તેમજ હોર્ડિંગ્સ પડી જવાના બનાવ બન્યા હતા અને વીજળીના ટ્રાન્સફોર્મર કે થાંભલાઓ પર રહેલા વાયરો તૂટી પડતા વીજળી ગુલ થઈ ગઈ હતી.

તે દરમિયાન જામનગર જિલ્લામાં પણ વાવાઝોડા જેવા માવઠાએ ભારે ખાનાખરાબી કરી હતી. જેમાં ગઈકાલે સાંજે જામજોધપુર શહેરમાં પણ વાવાઝોડા જેવા વંટોળીયા સાથે માવઠું વરસ્યું હતું. જેમાં જામજોધપુર નજીકના જૂની આંબરડી ગામના કાબાભાઈ માયાભાઈ વકાતર નામના ભરવાડ પ્રૌઢ પોતાની ભેંસોને ધ્રાફા ગામ નજીકના ફૂલઝર નદીના કાંઠે પાણાખાણ સીમમાં ચરાવી રહ્યા હતા. ત્યારે આકાશમાં વીજળીની દોડાદોડી વચ્ચે વીજળી ત્રાટકી હતી.

અચાનક શરૂ થયેલા વંટોળીયાના કારણે પોતાની ભેંસોને સહી સલામત રીતે ઠેકાણે પહોંચાડવા માટે પ્રયત્નશીલ કાબાભાઈ પર આકાશી વીજળી ત્રાટકતા દાઝી જવાથી આ પ્રૌઢનું મૃત્યુ નિપજ્યું છે. વીસાભાઈ માયા ભાઈ વકાતરે પોલીસને જાણ કરી છે. શેઠવડાળા પોલીસે બનાવની નોંધ કરી છે.

જો આપને આ પોસ્ટ ગમી હોય તો શેર કરો...