બેટ દ્વારકામાં વિકાસની સાથે અસામાજિક બદીએ પણ મૂકી માજા

Author: નોબત સમાચાર

બેટ દ્વારકામાં વિકાસની સાથે અસામાજિક બદીએ પણ મૂકી માજા

દેશી-વિદેશી દારૂ, જુગાર અને ગાંજાની પ્રવૃત્તિ બેફામઃ

ઓખા તા. ૮: ઓખા-બેટ દ્વારકાને જમીન માર્ગે જોડવા અંદાજે રૂ.૧૦૦૦ કરોડના ખર્ચે સુદર્શન બ્રિજનું નિર્માણ કરવામાં આવ્યું છે. બ્રિજના નિર્માણ બાદ યાત્રિકોના પ્રવાહમાં અનેક ગણો વધારો થયો છે. સાથોસાથ અસામાજિક પ્રવૃત્તિ પણ કૂદકેને ભૂસકે વધી રહી હોય તેમ યાત્રાધામને બદનામ કરવામાં અમૂક તત્ત્વો દ્વારા દેશી-વિદેશી દારૂ, વર્લી-મટકા, ગાંજા જેવી પ્રવૃત્તિમાં પણ વધારો થઈ રહ્યો હોવાનું સ્થાનિકો ઉચ્ચારી રહ્યા છે.

યાત્રાધામના વિકાસની સાથે બેનંબરી ધંધામાં પણ હરણફાળ ભરવા માટે અસામાજિક તત્ત્વોે સતત સક્રિય રહેતા હોવાનું ચિત્ર ઉપસી રહ્યું છે. સુરક્ષાની દ્રષ્ટિએ સંવેદનશીલ ટાપુ કહી શકાય એવા છેવાડાના વિસ્તાર બેટ દ્વારકા યાત્રાધામમાં શરાબથી લઈ દેશી દારૂ, ડ્રગ્સ અને ગાંજાના વેપાર તેમજ જુગારના દૂષણ સહિતની પ્રવૃત્તિઓ યાત્રાળુઓ માટે જોખમી હોવા ઉપરાંત તમામ દ્રષ્ટિએ હાનીકારક હોય સુરક્ષા તંત્ર દ્વારા વિશેષ પગલાં લેવામાં આવે તે જરૂરી છે.

યાત્રાધામ બેટ દ્વારકામાં ગાંજાનો જથ્થો ઉતર્યાે હોવાનો સ્થાનિકો અને પોલીસતંત્રમાં ગણગણાટ થઈ રહ્યો છે ત્યારે પખવાડિયા અગાઉ એસઓજી દ્વારા બેટ દ્વારકામાંથી બે વ્યક્તિને તેડું આવ્યું હોવાનું પણ જાણવા મળી રહ્યું છે.

પોલીસ વર્તુળોમાંથી જાણવા મળતી વિગત મુજબ કોમ્પ્યુટર જુગાર (હાજર વર્લી મટકા)ના આકાઓ બેટ દ્વારકામાં જુગાર ચાલુ કરવા માટે હાલમાં હરકતમાં આવ્યા છે તેથી આગામી દિવસોમાં આ જુગાર ચાલુ થાય તો નવાઈ નહીં.

જો આપને આ પોસ્ટ ગમી હોય તો શેર કરો...