તહવ્વુર રાણા જ મુંબઈ હુમલાનો માસ્ટર માઈન્ડઃ એનઆઈને સમક્ષ કબૂલાત

Author: નોબત સમાચાર

તહવ્વુર રાણા જ મુંબઈ હુમલાનો માસ્ટર માઈન્ડઃ એનઆઈને સમક્ષ કબૂલાત

પાકિસ્તાનની સેના અને આઈએસઆઈનો એજન્ટ હોવાની વાત પણ કબૂલી

મુંબઈ તા. ૭: મુંબઈમાં ૨૬/૧૧ના આતંકી હુમલાનો માસ્ટર માઈન્ડ પોતે જ હતો અને આ હુમલો પાકિસ્તાનના એજન્ટ તરીકે તેમણે જ કરાવ્યો હોવાનુ તહવ્વુર રાણાએ કબુલી લીધુ હોવાના અહેવાલો છે.

મુંબઈમાં થયેલા ૨૬/૧૧ના હુમલાના માસ્ટર માઈન્ડ તહવ્વુર રાણાએ એનઆઈએ (નેશનલ ઇન્વેસ્ટિગેશન એજન્સી) સામે ઘણાં ચોંકાવનારા ખુલાસા કર્યા છે. તેમજ પૂછપરછ દરમિયાન એ પણ સ્વીકાર્યું કે, 'હા, હું પાકિસ્તાની સેનાનો એજન્ટ હતો અને ખલીજ યુદ્ધ દરમિયાન સાઉદી અરબ મોકલવામાં આવ્યો હતો. 'લશ્કર-એ-તૈયબા ફક્ત એક આતંકી સંગઠન જ નહીં, પરંતુ એક જાસૂસી નેટવર્કની જેમ કામ કરે છે. મારા મિત્ર અને સાથીદાર ડેવિડ હેડલીએ લશ્કર માટે ઘણી વખત તાલીમ લીધી હતી.'

તહવ્વુર રાણાને મુંબઈમાં પોતાની ઇમિગ્રેશન ફર્મનું સેન્ટર ખોલવાનો વિચાર હતો અને આ અંગેના ખર્ચને તેણે બિઝનેસ ખર્ચ કહૃાો હતો. તેમજ કબૂલાત કરી કે, 'જ્યારે ૨૦૦૮માં ૨૬/૧૧નો હુમલો થયો ત્યારે હું મુંબઈમાં હાજર હતો અને સંપૂર્ણપણે આતંકવાદી કાવતરાનો ભાગ હતો. મેં મુંબઈમાં છત્રપતિ શિવાજી મહારાજ ટર્મિનસ જેવા સ્થળોની રેકી કરી હતી અને ત્યાર્બાદ પાકિસ્તાનની ગુપ્તચર એજન્સી આઈએસઆઈ સાથે મળીને હુમલો કરવામાં આવ્યો હતો.'

ઉલ્લેખનિય છે કે, તહવ્વુર રાણા ૨૬ નવેમ્બર ૨૦૦૮ના રોજ મુંબઈમાં થયેલા આતંકવાદી હુમલામાં સામેલ આતંકવાદી ડેવિડ હેડલીનો નજીકનો મિત્ર છે. હેડલીએ પણ પૂછપરછ દરમિયાન રાણાનો ઉલ્લેખ કર્યો હતો. આ હુમલામાં ૧૦ પાકિસ્તાની આતંકવાદીઓ અરબી સમુદ્રના રસ્તે મુંબઈ પહોંચ્યા હતા અને રેલવે સ્ટેશન, બે લક્ઝરી હોટલ અને એક યહૂદી કેન્દ્ર પર હુમલો કર્યો હતો. લગભગ ૬૦ કલાક સુધી ચાલેલા આ હુમલામાં ૧૬૬ લોકો માર્યા ગયા હતા. રાણા પર હેડલી, લશ્કર-એ-તૈયબા, હરકત-ઉલ-જેહાદી ઇસ્લામી અને પાકિસ્તાન સાથે કાવતરું ઘડવાનો આરોપ છે.

જો આપને આ પોસ્ટ ગમી હોય તો શેર કરો...