કલ્યાણપુરના ગઢકામાં ઝાડ નીચે જુગાર રમતા ચાર શખ્સ પકડાયાઃ ત્રણ નાસી ગયા

Author: નોબત સમાચાર

કલ્યાણપુરના ગઢકામાં ઝાડ નીચે જુગાર રમતા ચાર શખ્સ પકડાયાઃ ત્રણ નાસી ગયા

પટમાંથી રોકડ સહિત રૃા.૧,૨૩,૬૦૦નો મુદ્દામાલઃ

જામનગર તા. ૧૭ઃ કલ્યાણપુર તાલુકાના ગઢકા ગામની સીમમાં ગઢકી ડેમ પાસે ગઈકાલે સાંજે જાહેરમાં તીનપત્તી રમતા ચાર શખ્સને પોલીસે પકડી પાડ્યા હતા. પોલીસને જોઈને ત્રણ શખ્સ મુઠ્ઠીઓ વાળીને નાસી ગયા હતા. પટમાંથી રોકડ, મોબાઈલ, બાઈક મળી રૃા.૧,૨૩,૬૦૦નો મુદ્દામાલ કબજે કરાયો છે.

દેવભૂમિ દ્વારકા જિલ્લાના કલ્યાણપુર તાલુકાના ગઢકા ગામ નજીક ગઈકાલે સાંજે કેટલાક શખ્સો એકત્રીત થઈ ગંજીપાના વડે જુગાર રમતા હોવાની બાતમી મળતા કલ્યાણપુર પોલીસ સ્ટેશનના સ્ટાફે ગઢકા ગામથી સિદ્ધપુર તરફ જવાના રસ્તા પર ગઢકી ડેમ નજીક દરોડો પાડ્યો હતો.

આ સ્થળે તીનપત્તી રમી રહેલા ભરત જગાભાઈ ગોજીયા, હરદાસભાઈ કાનાભાઈ ગોજીયા, હેમરાજભાઈ ભીખાભાઈ ડાભી, અરજણભાઈ રાજશીભાઈ સુવા નામના ચાર શખ્સ ઝડપાઈ ગયા હતા. પોલીસને જોઈને જગદીશ લોહાણા ઉર્ફે કનીયો તથા ગોવાભાઈ કારાભાઈ કરંગીયા અને જગદીશ સાથે આવેલો એક શખ્સ નાસી ગયા હતા.

આ સ્થળેથી પોલીસે રૃા.૩૩૬૦૦ રોકડા, બે મોબાઈલ, બે મોટરસાયકલ મળી કુલ રૃા.૧,૨૩,૬૦૦નો મુદ્દામાલ કબજે કર્યાે છે અને જુગારધારાની કલમ ૧ર હેઠળ ગુન્હો નોંધી ચાર શખ્સની ધરપકડ કરી છે અને નાસી ગયેલા ત્રણના સગડ દબાવ્યા છે.

જો આપને આ પોસ્ટ ગમી હોય તો શેર કરો...