સાની ડેમમાં દરવાજા લાગ્યા નથી, ત્યાં પૂરના પાણીથી ધોવાણઃ ઈજારેદારની લાપરવાહીનું પરિણામ

Author: નોબત સમાચાર

સાની ડેમમાં દરવાજા લાગ્યા નથી, ત્યાં પૂરના પાણીથી ધોવાણઃ ઈજારેદારની લાપરવાહીનું પરિણામ

દુધીયા-સૂર્યાવદર રોડ પર ગાબડું પડતા રાજપરાવાળો રસ્તો પણ બંધ

ખંભાળીયા તા. ૮: દ્વારકા જિલ્લાનો સૌથી મોટો સાની ડેમ ચાલુ વર્ષે ભરવાનું સિંચાઈ તંત્રનું આયોજન નિષ્ફળ ગયું છે, જેમાં ઈજારેદારની ઢીલી કામગીરીને જવાબદાર ગણાવાઈ રહી છે.

દેવભૂમિ દ્વારકા જિલ્લાનો સૌથી મોટો સાની ડેમ કલ્યાણપુરના સૂર્યાવદર પાસેનો સાની ડેમ કે જે વિશાળ જળ રાશિ સમાવવાની ક્ષમતા ધરાવે છે, તે સાની ડેમ રૂ. ૩૧ કરોડના ખર્ચે નવો બનાવવા માટે રાજયમંત્રી મૂળુભાઈ બેરા, સાંસદ પૂનમબેન માડમ તથા ધારાસભ્ય પબુભા માણેક દ્વારા જહેમત ઉઠાવાઈ હતી. મે માસમાં ૭૮ ટકા જેટલું કામ પૂર્ણ થઈ જતા સિંચાઈ વિભાગ દ્વારા જુલાઈ પહેલા ગેઈટનું કામ પૂર્ણ થઈ જાય તથા ચોમાસામાં તેમાં પાણી ભરવા આયોજન પણ થયું હતું, પણ કોન્ટ્રાક્ટરની ઢીલી કામગીરીથી તાજેતરમાં ચાલુ સિઝનમાં કલ્યાણપુર પંથકમાં ર૧ ઈંચ વરસાદ પડતા સાની ડેમના દરવાજા સુધી પૂરનું પાણી પહોંચી જતા દરવાજા તો હજુ લાગેલ નથી, તે ડેમની ઉપરથી પાણી વહેતું થતા ખેડૂતોનું સિંચાઈનું કિંમતી પાણી દરિયામાં લાખો લીટર વહી રહ્યું છે...!!

સાની ડેમના દરવાજા ના હોય, ત્યાં સુધી ડેમ ભરાઈ જતા તેની ઉપરથી પાણીનો વિશાળ જથ્થો નીકળતા નદીમાં પૂર આવતા તાજેતરમાં રાવલ - કલ્યાણપુર રસ્તો બંધ થઈ ગયો હતો. જ્યારે દુધીયા રાજપરાથી કલ્યાણપુર જવાનો રસ્તો જે આ ડેમની હેઠવાસમાં થઈને નીકળતો હોય, તેમાં મોટું ગાબડું પડ્યું હોય, તથા આ રસ્તા ઉપરથી પાણીનો વિશાળ પ્રવાહ નીકળતા આ રસ્તો બે દિવસથી બંધ થઈ જતા લોકોને કલ્યાણપુરથી રાવલ જવા માટે મુશ્કેલી ઊભી થઈ છે.

જો આપને આ પોસ્ટ ગમી હોય તો શેર કરો...