બ્રિકસમાં જોડાનાર દેશો પર વધારાનો ૧૦ ટકા ટેરિફ લગાવવાની ટ્રમ્પની ધમકી

Author: નોબત સમાચાર

બ્રિકસમાં જોડાનાર દેશો પર વધારાનો ૧૦ ટકા ટેરિફ લગાવવાની ટ્રમ્પની ધમકી

આતંકવાદ સામે બ્રિકસ દેશો એક જૂથઃ પાકિસ્તાનને ઝટકોઃ યુએનએસસીના વિસ્તારણને ટેકો

વોશિંગ્ટન/રિપો-ડી-જાનેરો તા. ૭: બ્રિકસના સંમેલનમાં પહેલગામ હુમલાને વખોડી આતંકવાદ સામે એક જૂથતા જાહેર કરીને રિયો-ડી-જાનેરો ઘોષણાપત્રમાં આતંકવાદ સામે ઝીરો ટોલરન્સની નીતિ અપનાવીને આતંકવાદ મુદ્દે બેવડા ધોરણો જારી રાખવાની અપીલ કરાઈ છે, તે ભારતની ડિપ્લોમેટિક જીત ગણાય છે. જયારે યુએનએસસીના વિસ્તરણની ભારતની માંગણીને પણ સમર્થન મળ્યું છે. બીજી તરફ અમેરિકાના રાષ્ટ્રપતિ ડોનાલ્ડ ટ્રમ્પે બ્રિકસમાં જોડાનાર દેશો પર વધારાનો દસ ટકા ટેરિફ લગાડવાની ખુલ્લી ધમકી આપતા વૈશ્વિક કક્ષાએ હલચલ મચી ગઈ છે.

બ્રાઝિલમાં આયોજિત બ્રિક્સ સમિટમાં ભારતે આતંકવાદ અને સંયુક્ત રાષ્ટ્ર સુરક્ષા પરિષદમાં સુધારા જેવા મુદ્દાઓ પર મોટી સફળતા મેળવી છે. બ્રિક્સે પહેલગામ હુમલાની સખત નિંદા કરી છે અને આતંકવાદ સામે ભારતના કડક વલણને સમર્થન આપ્યું છે ભારત લાંબા સમયથી યુએનએસસીમાં નવા દેશોના પ્રવેશની માંગ કરી રહૃાું છે. પહેલગામ આતંકવાદી હુમલા પછી, ભારતે આતંકવાદના મુદ્દા પર કડક વલણ અપનાવ્યું છે અને વિશ્વભરમાંથી સમર્થન મેળવવાનો પ્રયાસ કર્યો છે.

ગઈકાલે બ્રિક્સ સમિટની સંયુક્ત ઘોષણામાં આતંકવાદ સામે શૂન્ય સહિષ્ણુતાનું આહ્વાન કરવામાં આવ્યું હતું અને આતંકવાદના દુષ્ટ કૃત્ય સામે લડવામાં બેવડા ધોરણોને નકારી કાઢવામાં આવ્યા હતા. બ્રિક્સ દેશોએ પણ આવા એકપક્ષીય ટેરિફ પર ગંભીર ચિંતા વ્યક્ત કરી છે જે વેપારને નુકસાન પહોંચાડે છે અને ડબલ્યુટીઓ નિયમો અનુસાર નથી.

રિપોબ્રિક્સ દેશો વતી કહેવામાં આવ્યું છે કે, અમે ૨૨ એપ્રિલે કાશ્મીરના પહેલગામમાં થયેલા આતંકવાદી હુમલાની સખત નિંદા કરીએ છીએ, જેમાં ૨૬ લોકો માર્યા ગયા હતા અને ઘણા ઘાયલ થયા હતા. અમે આતંકવાદના તમામ સ્વરૂપો અને અભિવ્યક્તિઓનો સામનો કરવા માટે અમારી પ્રતિબદ્ધતાને પુનઃપુષ્ટ કરીએ છીએ, જેમાં આતંકવાદીઓની સરહદ પારની હિલચાલ, આતંકવાદને નાણાં પૂરા પાડવા અને આતંકવાદીઓને સુરક્ષિત આશ્રયસ્થાનો પૂરા પાડવાનો સમાવેશ થાય છે.

બ્રિક્સ દેશોએ આતંકવાદ સામે એક થઈને લડવાનો સંકલ્પ કર્યો. બ્રિક્સે સંયુક્ત રાષ્ટ્રને આતંકવાદ પર એક વ્યાપક સંમેલનને વહેલી તકે અંતિમ સ્વરૂપ આપવા અને અપનાવવા વિનંતી પણ કરી. ભારત લાંબા સમયથી સરહદ પારના આતંકવાદનો ભોગ બની રહૃાું છે. આવા માં. બ્રિક્સ દેશોનું નિવેદન ભારત માટે એક મહત્વપૂર્ણ રાજદ્વારી જીત છે.

બ્રિક્સ જૂથે પહેલગામ આતંકવાદી હુમલાની સખત નિંદા કરી અને આતંકવાદ પ્રત્યે શૂન્ય સહિષ્ણુતાનો અભિગમ અપનાવવા અને તેનો સામનો કરવામાં બેવડા ધોરણો છોડી દેવાના ભારતના વલણનો પુનરોચ્ચાર કર્યો. બ્રાઝિલના દરિયાકાંઠાના શહેરમાં આ જૂથના બે દિવસીય શિખર સંમેલનના પહેલા દિવસે, બ્રિક્સ રાષ્ટ્રોના ટોચના નેતાઓએ આતંકવાદીઓની સરહદ પારની હિલચાલ સહિત આતંકવાદ સામે લડવા માટે તેમના મજબૂત અભિગમને સ્પષ્ટ કર્યો.

બ્રિક્સ નેતાઓએ રિયો ડી જાનેરો ઘોષણાપત્ર બહાર પાડ્યું, જેમાં આતંકવાદનો ખતરો, પશ્ચિમ એશિયાની પરિસ્થિતિ અને વેપાર અને ટેરિફ સંબંધિત મુદ્દાઓ સહિત અનેક મહત્વપૂર્ણ વૈશ્વિક પડકારો પર જૂથના વલણની રૂપરેખા આપવામાં આવી.

વડાપ્રધાન મોદીએ સમિટમાં ભારતીય પ્રતિનિધિમંડળનું નેતૃત્વ કર્યું. તેમાં કહેવામાં આવ્યું છે કે, અમે આતંકવાદ સામે લડવામાં રાજ્યોની પ્રાથમિક જવાબદારી પર ભાર મૂકીએ છીએ અને આતંકવાદી જોખમોને રોકવા અને તેનો સામનો કરવાના વૈશ્વિક પ્રયાસોમાં તેઓએ આંતરરાષ્ટ્રીય કાયદા હેઠળ તેમની જવાબદારીઓનું સંપૂર્ણ પાલન કરવું જોઈએ.

બ્રિક્સે આતંકવાદ વિરોધી સહયોગને વધુ ગાઢ બનાવવાનો સંકલ્પ કર્યો અને યુએન દ્વારા નિયુક્ત કરાયેલા તમામ આતંકવાદીઓ અને આતંકવાદી સંગઠનો સામે નક્કર કાર્યવાહી કરવા હાકલ કરી.

જૂથના નેતાઓએ એકપક્ષીય ટેરિફ અને નોન-ટેરિફ પગલાંના વધારા અંગે પણ ગંભીર ચિંતા વ્યક્ત કરી હતી. આને અમેરિકાની ટેરિફ અંગેની નીતિના પરોક્ષ સંદર્ભ તરીકે જોવામાં આવી રહૃાું છે. બ્રિક્સે વિશ્વના ઘણા ભાગોમાં ચાલી રહેલા સંઘર્ષો અને આંતરરાષ્ટ્રીય વ્યવસ્થામાં ધ્રુવીકરણ અને વિભાજનની વર્તમાન સ્થિતિ પર પણ ચિંતા વ્યક્ત કરી. તેમાં કહેવામાં આવ્યું છે કે, અમે કબજા હેઠળના પેલેસ્ટિનિયન પ્રદેશની પરિસ્થિતિ અંગે અમારી ગંભીર ચિંતાનો પુનરોચ્ચાર કરીએ છીએ.

બ્રિકસમાં સંબોધન કરતા મોદીએ કહૃાું હતું કે, આજે માનવતા માટે આતંકવાદ સૌથી ગંભીર પડકાર બની ગયો છે. તાજેતરમાં ભારતને એક અમાનવીય અને કાયર આતંકવાદી હુમલાનો સામનો કરવો પડ્યો. ૨૨ એપ્રિલે પહેલગામમાં થયેલો આતંકવાદી હુમલો ભારતની આત્મા, ઓળખ અને ગૌરવ પર સીધો હુમલો હતો. આ હુમલો માત્ર ભારત પર જ નહીં પરંતુ સમગ્ર માનવતા પર પ્રહાર હતો. આ દુઃખની ઘડીમાં, હું તે મિત્ર દેશોનો હ્ય્દયપૂર્વક આભાર માનું છું જેમણે અમારી સાથે ઉભા રહીને સમર્થન અને સંવેદના વ્યક્ત કરી.

રિર્ફોમિંગ ગ્લોબલ ગવર્નન્સ વિષય પર એક સત્રને સંબોધતા મોદીએ કહૃાું ૨૦મી સદીમાં બનેલી વૈશ્વિક સંસ્થાઓમાં બે તૃતીયાંશ માનવતા હજુ પણ યોગ્ય પ્રતિનિધિત્વનો અભાવ ધરાવે છે. આજના વૈશ્વિક અર્થતંત્રમાં મુખ્ય ભૂમિકા ભજવતા ઘણા દેશોને હજુ પણ નિર્ણય લેવાના ટેબલ પર સ્થાન આપવામાં આવતું નથી. તે ફક્ત પ્રતિનિધિત્વ વિશે નથી, તે વિશ્વસનીયતા અને અસરકારકતા વિશે પણ છે. ગ્લોબલ સાઉથ વિના, આ સંસ્થાઓ સિમ કાર્ડવાળા મોબાઇલ ફોન જેવી છે જેમાં કોઈ નેટવર્ક નથી. તેઓ યોગ્ય રીતે કાર્ય કરી શકતા નથી અથવા ૨૧મી સદીના પડકારોનો સામનો કરી શકતા નથી.

દસ ટકા ટેરિફ વધારવાની ટ્રમ્પની ખુલ્લી ધમકી

બીજી તરફ અમેરિકાના રાષ્ટ્રપતિ ડોનાલ્ડ ટ્રમ્પે હવે ટેરિફ લાદવા અંગે ધમકીભર્યા વલણ અપનાવ્યું છે. ટ્રમ્પે તેમના ટ્રુથ એકાઉન્ટ પર એક નવી પોસ્ટ પોસ્ટ કરી છે. આમાં તેમણે લખ્યું છે કે બ્રિક્સમાં જોડાનારા દેશો પર ૧૦ ટકા વધારાનો ટેરિફ લાદવામાં આવશે.

અત્રે ઉલ્લેખનિય છે કે, ભારત પણ બ્રિક્સનો એક ભાગ છે. ટ્રમ્પે લખ્યું છે કે કોઈપણ દેશ જે બ્રિક્સની અમેરિકા વિરોધી નીતિઓનું પાલન કરશે તેના પર વધારાના ૧૦ ટકા ટેરિફ લાગશે. તેમણે આગળ લખ્યું કે આ નીતિમાં કોઈપણ પ્રકારની છૂટછાટ આપવામાં આવશે નહીં. ટ્રમ્પે છેલ્લે લખ્યું, આ બાબત પર ધ્યાન આપવા બદલ આભાર.

ટ્રમ્પની આ નવી જાહેરાત ભારત માટે પણ ચિંતાનો વિષય બની શકે છે. ભારત પણ બ્રિક્સનો એક ભાગ છે. ભારતે અમેરિકા સાથે પણ કેટલાક મહત્વપૂર્ણ વેપાર કરારો કર્યા છે. ભારતે અમેરિકા સાથે પ્રસ્તાવિત વચગાળાના વેપાર કરાર માટે કૃષિ અને ડેરી જેવા ક્ષેત્રોમાં મુખ્ય મુદ્દાઓ પર પોતાની મર્યાદા નક્કી કરી છે. હવે આ સોદાને અંતિમ સ્વરૂપ આપવાની જવાબદારી અમેરિકાના હાથમાં છે. એવું કહેવાય છે કે જો મુદ્દાઓ ઉકેલાઈ જાય, તો ૯ જુલાઈ પહેલા વચગાળાના વેપાર કરારની જાહેરાત થઈ શકે છે.

અત્રે ઉલ્લેખનીય છે કે ૨ એપ્રિલે અમેરિકાએ ભારતીય માલ પર ૨૬ ટકા વધારાની પ્રતિક્રિયાત્મક ડ્યુટી લાદી હતી, પરંતુ તેને ૯૦ દિવસ માટે મુલતવી રાખી હતી. જોકે, અમેરિકા દ્વારા લાદવામાં આવેલી ૧૦ ટકા મૂળભૂત ડ્યુટી હજુ પણ યથાવત છે. ભારત આ ૨૬ ટકા ડ્યુટીમાંથી સંપૂર્ણ મુક્તિ ઇચ્છે છે. જો પ્રસ્તાવિત વેપાર વાટાઘાટો નિષ્ફળ જાય, તો ૨૬ ટકા ટેરિફ ફરીથી લાદવામાં આવશે.

ગયા અઠવાડિયે જ, ભારતીય પ્રતિનિધિમંડળ અમેરિકા સાથે વચગાળાના વેપાર કરાર પર વાટાઘાટો કરીને વોશિંગ્ટનથી પરત ફર્યું. સ્ટીલ, એલ્યુમિનિયમ (૫૦ ટકા) અને વાહનો (૨૫ ટકા) પરની જકાતમાં પણ બંને દેશો વચ્ચે તફાવત છે. નોંધનીય છે કે ટ્રમ્પ દ્વારા વિવિધ દેશો પર ટેરિફ લાદવાની જાહેરાત પહેલા જ ગભરાટ ફેલાયો છે.

ગયા અઠવાડિયે ટ્રમ્પે કહૃાું હતું કે તેમનું વહીવટીતંત્ર ૧૦-૧૨ દેશોના પ્રથમ જૂથને પત્રો મોકલી રહૃાું છે. જેમાં કાઉન્ટર ટેરિફની વિગતો શેર કરવામાં આવશે. તેમણે કહૃાું કે સમગ્ર પ્રક્રિયા ૯ જુલાઈ સુધીમાં પૂર્ણ થઈ શકશે.

જો કે, ટ્રમ્પની મૌખિક જાહેરાતો અને તંત્ર દ્વારા થતી કાર્યવાહી વચ્ચે અંતર હોય છે અને ટ્રમ્પ બોલીને વારંવાર ફરી જતા હોવાથી આ મુદ્દો પણ વૈશ્વિક ચર્ચાનો વિષય બન્યો છે.

જો આપને આ પોસ્ટ ગમી હોય તો શેર કરો...