જિલ્લાની જનતાને સ્પર્શતા મહત્ત્વના પ્રશ્નો ઉકેલવાનું માધ્યમ એટલે દિશા સમિતિઃ સાંસદ

Author: નોબત સમાચાર

જિલ્લાની જનતાને સ્પર્શતા મહત્ત્વના પ્રશ્નો ઉકેલવાનું માધ્યમ એટલે દિશા સમિતિઃ સાંસદ

જામનગર જિલ્લા કક્ષાની બેઠકમાં સરકારી અધિકારીઓને કર્યા ઉપયોગી સૂચનો

જામનગર તા. ૧૮: સાંસદ પૂનમબેન માડમની અધ્યક્ષતામાં જામનગર જિલ્લા કક્ષાની દિશા સમિતિની બેઠક યોજાઈ હતી, જેમાં તેઓએ લોકમાંગણીઓને ધ્યાને લઇ સમયમર્યાદામાં કામો પૂર્ણ કરવા સૂચવીને અધિકારીઓને ઉપયોગી સૂચનો કર્યા હતાં.

જામનગર જિલ્લા કલેકટર કચેરીના સભાખંડમાં સાંસદ પૂનમબેન માડમના અધ્યક્ષ સ્થાને જિલ્લા ગ્રામ વિકાસ એજન્સી દ્વારા આયોજિત ડિસ્ટ્રિક્ટ ડેવલપમેન્ટ કોઓર્ડીનેશન એન્ડ મોનીટરીંગ કમિટી (દિશા)ની બેઠકનું આયોજન કરવામાં આવ્યું હતું. આ બેઠકમાં કલેકટરશ્રી કેતન ઠક્કર તથા ઉપસ્થિત તમામ વિભાગના અધિકારીઓ સાથે સાંસદે કેન્દ્ર સરકાર દ્વારા અમલમા મુકવામા આવેલ વિવિધ યોજનાઓની સમીક્ષા કરી હતી. ઉપરાંત જામનગર જિલ્લામાં વિવિધ વિભાગો દ્વારા થઇ રહેલ યોજનાકીય કામગીરી અને તેમના અમલીકરણની માહિતી મેળવી જરૂરી સૂચનો કર્યા હતા.

આ બેઠકમાં જામનગર મહાનગરપાલિકા હસ્તકના વિભાગોની યોજનાઓની સમીક્ષા અને કામગીરી જેમાં અમુત ૨.૦ હેઠળ જામનગર મહાનગરપાલિકાને વિવિધ કામો જેમાં વોટરવર્કસ શાખા, ભૂગર્ભ ગટર શાખા, સિવિલ(ગાર્ડન શાખા) તથા પ્રોજેક્ટ એન્ડ પ્લાનિંગ શાખાને લગત કામો માટે ફાળવવામાં આવેલ રકમ અને કામોની પ્રગતી, પ્રધાનમંત્રી આવાસ યોજના, સ્વચ્છ ભારત મિશન, સોલીડ વેસ્ટ મેનેજમેન્ટ, પ્રધાનમંત્રી સ્ટ્રીટ વેન્ડર આત્મનિર્ભર નિધિ યોજના,જલ શક્તિ અભિયાન-કેચ ધ રેઇન, આઈસીડીએસ વિભાગની સેવાઓ, પ્રધાનમંત્રી માતૃવંદના યોજના, નમોશ્રી યોજના, નીક્ષય મિત્ર, આયુષ્માન ભારત ડીજીટલ મિશન, આયુષ્માન ભારત પ્રધાનમંત્રી જન આરોગ્ય યોજના, પી.એમ. પોષણ યોજના અંગે લગત વિભાગના અધિકારીઓએ પ્રેઝન્ટેશનના માધ્યમથી સાંસદને માહિતી આપી હતી.

આ ઉપરાંત નેશનલ હાઈવે ઓથોરીટી ઓફ ઇન્ડિયા, રેલ્વે વિભાગ દ્વારા થઇ રહેલ કામગીરી, પ્રધાનમંત્રી ગ્રામ સડક યોજના, ઈન્દિરા ગાંધી રાષ્ટ્રીય દિવ્યાંગ પેન્શન યોજના,નેશનલ ફૂડ સિક્યોરીટી એકટ, નેશનલ હેલ્થ મિશન, ઈન્ટીગ્રેટેડ ચાઈલ્ડ ડેવલોપમેન્ટ સ્કીમ, સમગ્ર શિક્ષા, પ્રધાનમંત્રી ઉજવલ્લા યોજના, પી.એમ.પોષણ યોજના, પ્રધાનમંત્રી કૃષિ સિંચાઈ યોજના, વોટર એન્ડ સેનીટેશન મેનેજમેન્ટ ઓર્ગેનાઈઝેશન, પ્રધાનમંત્રી ખનીજક્ષેત્ર કલ્યાણ યોજના, સ્વરછ ભારત મિશન (ગ્રામીણ), નેશનલ રૂરલ લાઈવલીહુડ મિશન, જિલ્લા વિદ્યુત કમિટી દ્વારા થઇ રહેલ કામગીરી, પ્રધાનમંત્રી ગ્રામીણ આવાસ યોજના, મહાત્મા ગાંધી નેશનલ રૂરલ એમ્પ્લોયમેન્ટ ગેરેંટી એકટ, ઈન્ટીગ્રેટેડ વોટરસેડ મેનેજમેન્ટ પ્રોગ્રામ વગેરે યોજનાઓની સમીક્ષા કરી જામનગર જિલ્લા વહીવટીતંત્ર દ્વારા થઇ રહેલ કામગીરી અંગે સાંસદશ્રીએ માહિતી મેળવી જરૂરી સૂચનો કર્યા હતા. આ ઉપરાંત કેન્દ્ર સરકારની અન્ય યોજનાઓ અંગેનો દિશા મિટિંગમાં સમાવેશ કરવામાં આવ્યો છે જે અંગે પણ ચર્ચા કરવામાં આવી હતી જેમાં અટલ પેન્શન યોજના, નેશનલ ક્લીન એર પ્રોગ્રામ, નેશનલ મિશન ઓફ લાઈબ્રેરી, એગ્રીકલ્ચર ઇન્ફ્રાસ્ટ્રકચર સ્કીમ, જલ સંચય જન ભાગીદારી યોજના, ગ્રામ પંચાયત ડેવલોપમેન્ટ પ્લાન, નેશનલ પ્રોગ્રામ ફોર ડેરી ડેવલોપમેન્ટ, ડીજીટલ ઇન્ડિયા, પ્રધાનમંત્રી ગ્રામીણ ડિજિટલ સાક્ષરતા અભિયાન, પ્રિમેટ્રિક સ્કોલરશીપ, નેશનલ કેરિયર સર્વિઝ, સારથી અને વાહનપરિવહન સેવાનો સમાવેશ થાય છે.

આ બેઠકમાં સાંસદ પૂનમબેન માડમે જણાવ્યું હતું કે, જન પ્રતિનિધિઓ દ્વારા લોકોની વિવિધ માંગણીઓને લઈને જે રજુઆતો કરવામાં આવે છે તેનું યોગ્ય રીતે નિરાકરણ લાવી લોકોની સવલતોમાં વધારો થાય તે પ્રકારે આયોજનબદ્ધ કામગીરી કરવામાં આવે જેથી કરીને જિલ્લામાં વિકાસના કાર્યોને વેગ મળે તથા કેન્દ્ર સરકારની યોજનાઓથી વધુમાં વધુ લોકો માહિતગાર થાય અને છેવાડાના માનવીને પણ આ યોજનાઓનો લાભ મળે તે દિશામાં આયોજન હાથ ધરવા સાંસદે સૂચન કર્યું હતું. તેઓએ વધુમાં જણાવ્યું હતું કે, જિલ્લાના મહત્ત્વના પ્રશ્નોનો ઉકેલ લાવવાનું માધ્યમ દિશા સમિતિ છે. આ બેઠકમાં અગત્યના પ્રશ્નો પર ભાર મૂકી તાલુકા જિલ્લા સ્તરે સમન્વય સાધીને ઝડપથી પ્રશ્નોનું નિરાકરણ લાવી જિલ્લાને વિકાસના માર્ગે આગળ વધારવા માટે સૌએ પ્રયત્નો કરવા જોઈએ. જેથી સર્વાંગી વિકાસ અને લોકહિતના પ્રશ્નોનું હકારાત્મક નિવારણ આવી શકે.

ઉપરાંત તેણીએે આગેવાનો દ્વારા રજુ કરવામાં આવેલા વિવિધ વિભાગોને લગત પ્રશ્નો જેમાં, અમુક જગ્યાએ અંડરબ્રિજમાં ચોમાસામાં પાણી ભરાવવાના પ્રશ્નો, ટ્રેનના સ્ટોપેજ અંગેની લોકોની રજૂઆતો, વાડી વિસ્તારોમાં તેમજ નવા બાંધકામ થયેલા હોય ત્યાં વીજ કનેક્શન આપવા, રોડ-રસ્તાઓ, અંતરિયાળ વિસ્તારોમાં નેટવર્ક આપવા અંગે, ખેતીવાડી વિભાગને લગત પ્રશ્નો, ગામડાઓમાં એસટી બસના સ્ટોપ આપવા અંગેના આગેવાનોના મુદાઓ પર ચર્ચા કરી લોક માંગણીઓને ગંભીરતા પૂર્વક ધ્યાનમાં લઈ પડતર પ્રશ્નોનું કાયમી નિરાકરણ લાવવા જણાવ્યું હતું.

આ બેઠકમાં કલેકટર કેતન ઠક્કરે અધિકારીઓને જણાવ્યું હતું કે, સાંસદ દ્વારા આપવામાં આવેલા સૂચનો ધ્યાને લઇ લોકમાંગણીઓના કામો ઝડપથી પૂર્ણ કરવા તથા જનપ્રતિનિધિઓની રજુઆતોને ધ્યાને લઇ મહત્વના કામોને અગ્રીમતા આપી સુચારુ આયોજન કરી કામગીરી પૂર્ણ કરવામાં આવે.

આ બેઠકમાં જિલ્લા પંચાયતના પ્રમુખ મેયબેન ગરસર, ધારાસભ્ય મેઘજીભાઈ ચાવડા, મ્યુનિસિપલ કમિશનર ડી.એન.મોદી, જિલ્લા વિકાસ અધિકારી અંકિત પન્નું, એ.એસ.પી. પ્રતિભા, નિવાસી અધિક કલેકટરશ્રી બી.એન.ખેર, જિલ્લા પંચાયતની વિવિધ સમિતિના ચેરમેન અને સભ્યો, ડી.આર.ડી.એ. નિયામક શારદા કાથડ, ભાવનગર ડિવિઝનલ રેલ્વે મેનેજર રવીશ કુમાર, રાજકોટ ડી.આર.એમ, જિલ્લા તથા તાલુકા પંચાયતના સદસ્યો, સરપંચઓ, ડિસ્ટ્રીક્ટ ડેવલોપમેન્ટ કો-ઓર્ડીનેશન અને મોનીટરીંગ કમિટીના સભ્યો, આગેવાનો તેમજ પદાધિકારીઓ અને અધિકારીઓ ઉપસ્થિત રહૃાા હતા.

જો આપને આ પોસ્ટ ગમી હોય તો શેર કરો...