ખંભાળિયામાં જિલ્લા કક્ષાનો ભૂલકાંમેળો યોજાયો

Author: નોબત સમાચાર

ખંભાળિયામાં જિલ્લા કક્ષાનો ભૂલકાંમેળો યોજાયો

દ્વારકા જિલ્લામાં પોષણ ઉત્સવની ઉજવણી

ખંભાળિયા તા. ૨૦: દેવભૂમિ દ્વારકા જિલ્લામાં પોષણ ઉત્સવની ઉજવણી અંતર્ગત ખંભાળિયાના ટાઉનહોલમાં જિલ્લા પંચાયત પ્રમુખ શ્રીમતી રિદ્ધિબા જાડેજા અને જિલ્લા વિકાસ અધિકારી એ.બી. પાંડોરની પ્રેરક ઉપસ્થિતિમાં ભૂલકા મેળો યોજાયો હતો.

રાજ્ય સરકારના મહિલા અને બાળ વિકાસ વિભાગના પ્રોજેક્ટ *પા પા પગલી* અંતર્ગત સંકલિત આઈ.સી.ડી.એસ. દેવભૂમિ દ્વારકા દ્વારા જીલ્લા પંચાયત પ્રમુખ રિદ્ધિબા જાડેજાની અધ્યક્ષતામાં ટાઉન હોલમાં જિલ્લા કક્ષાનો ભૂલકા મેળો અને પોષણ ઉત્સવ ઉજવણી કરાઈ હતી.

જિલ્લા વિકાસ અધિકારી એ.બી.પાંડોરે આ પ્રસંગે જણાવ્યું હતું કે, ભુલકાંઓના સર્વાંગી વિકાસમાં આંગણવાડી વર્કરોનો સિંહફાળો છે. બાળકોના ભવિષ્યને ઉજ્જવળ બનાવવા માટે તેઓ સતત કાર્ય કરે છે. તેઓ પોતાના સંતાનોની જેમ ભુલકાંઓને કેળવણી આપીને દેશના ભવિષ્યને દિશા આપવાનું ઉમદા કાર્ય કરી રહૃાા છે.

ભુલકાં મેળામાં જિલ્લાના અને ઘટકના આંગણવાડી કાર્યકર બહેનો દ્વારા બાળકોના અભ્યાસ માટે તૈયાર કરવામાં આવેલી ટી.એલ.એમ. સામગ્રી તથા આંગણવાડીમાં બાળકોને આપવામાં આવતા બાળ શક્તિ તેમજ અન્ય પોષક સામગ્રીઓમાંથી બનાવેલ વાનગીના સ્ટોલ તૈયાર કરવામાં આવ્યા હતા. મહાનુભાવો દ્વારા આ સ્ટોલની મુલાકાત લેવામાં આવી હતી. આંગણવાડીના નાના ભુલકાંઓએ સાંસ્કૃતિક કૃતિઓ પ્રસ્તુત કરી હતી. શ્રેષ્ઠ પ્રદર્શન કરનાર બાળકો, આંગણવાડી કાર્યકરોને અને પી.એસ.ઇ.ને પ્રમાણપત્ર આપીને પ્રોત્સાહિત કરવામાં આવ્યા હતા.

માતા યશોદા એવોર્ડના ઘટક કક્ષાના વિજેતા કાર્યકર અને તેડાગર બહેનોને એવોર્ડ વિતરણ કરવામાં આવ્યું હતું. આંગણવાડીની સેવાઓને વધુ સારી રીતે આપી શકાય તે માટે મદદરૂપ થતી સંસ્થાઓ જેમાં નાયરા એનર્જી સંચાલિત પ્રોજેક્ટ તુષ્ટિ, ટાટા દ્વારા સી.એસ.પી.સી. અને ચેતના જેવી સંસ્થાઓને પણ સન્માનિત કરવામાં આવી હતી.

આ કાર્યક્રમમાં જિલ્લા મહિલા અને બાળ વિકાસ અધિકારી તથા ઇન્ચાર્જ આઈ.સી.ડી.એસ. પ્રોગ્રામ ઓફિસર ડો. ચંદ્રેશકુમાર ભાંભી, દહેજ પ્રતિબંધ સહ રક્ષણ અધિકારી શ્રી પ્રફુલ જાદવ, આંગણવાડી કાર્યકર બહેનો, ભુલકાંઓ,આંગણવાડી કિશોરીઓ અને વાલીઓ ઉપસ્થિત રહૃાા હતા.

જો આપને આ પોસ્ટ ગમી હોય તો શેર કરો...