રાજકોટ રેલવે ડિવિઝનના હાપા યાર્ડમાં રૂ।. ૩૫.૪૧ કરોડના ખર્ચે અત્યાધુનિક સંયુક્ત વેગન શેડ તૈયાર

Author: નોબત સમાચાર

રાજકોટ રેલવે ડિવિઝનના હાપા યાર્ડમાં રૂ।. ૩૫.૪૧ કરોડના ખર્ચે અત્યાધુનિક સંયુક્ત વેગન શેડ તૈયાર

નવી સુવિધાથી દરરોજ ૫- વેગનની મરામત ક્ષમતા વધશે

જામનગર તા. ૧૬: પશ્ચિમ રેલવેના રાજકોટ ડિવિઝન અંતર્ગત હાપા યાર્ડમાં રૂ. ૩૫.૪૧ કરોડના ખર્ચે માલગાડીના વેગનની જાળવણી માટે અત્યાધુનિક સંયુક્ત વેગન શેડનું નિર્માણ ગતિ શક્તિ યુનિટ, રાજકોટ દ્વારા વિક્રમી સમયમાં કરવામાં આવ્યું છે. આ પ્રોજેક્ટ મુખ્ય વહીવટી અધિકારી (રોડ સેફ્ટી, ચર્ચગેટ) અમિત મનુવાલ ના માર્ગદર્શન અને રાજકોટ ડિવિઝનલ રેલવે મેનેજર ગિરિરાજ કુમાર મીના ના દિશાનિર્દેશ હેઠળ મુખ્ય પ્રોજેક્ટ મેનેજર (ગતિ શક્તિ, રાજકોટ) સુધીર દુબે અને તેમની ટીમ દ્વારા પૂર્ણ કરવામાં આવ્યો છે.

વર્તમાનમાં માત્ર દોઢ વર્ષના વિક્રમી સમયમાં આ પ્રોજેક્ટનું લગભગ ૯૫ ટકા કામ પૂર્ણ થઈ ગયું છે અને બાકીનું કામ પણ ટૂંક સમયમાં પૂરું કરી લેવામાં આવશે.

આ નવી સુવિધા શરૂ થવાથી બીટીપીએન, બીસીએન, બીટીપીએલએન સહિત વિવિધ પ્રકારના માલવાહક વેગનનું નિરીક્ષણ, મરામત અને જાળવણીનું કામ હવે વધુ ઝડપી, સુરક્ષિત અને વ્યવસ્થિત રીતે થઈ શકશે.

આધુનિક સુવિધાઓથી સજ્જ નવો વેગન શેડ

નવા વેગન શેડનું કદ ૧૭૨ મીટર સ ૨૫ મીટર છે અને તેની મહત્તમ ઊંચાઈ ૧૬.૫ મીટર છે. તેમાં ટ્રસ વગરની સ્વ-સમર્થિત હળવા વજનની પ્રોફ્લેક્સ રૂફ શીટ લગાવવામાં આવી છે. શેડની અંદર વેગનની જાળવણી માટે ત્રણ રેલવે ટ્રેક ઉપલબ્ધ કરાવવામાં આવ્યા છે અને ભારે સાધનોના ઉપયોગ દરમિયાન ફ્લોરિંગને સુરક્ષિત રાખવા માટે હાર્ડોનાઈટ ફ્લોરિંગ કરવામાં આવ્યું છે.

વેગનના ઉપરના ભાગના નિરીક્ષણ માટે લાઇન નંબર ૧ અને ૩ ની સાથે ઇન્સ્પેક્શન ગેન્ટ્રી અને દર ૧૭ મીટરના અંતરે ઇન્સ્પેક્શન પ્લેટફોર્મ બનાવવામાં આવ્યા છે, જેનાથી કર્મચારીઓ વેગન પર સુરક્ષિત રીતે પહોંચી શકશે. નવા શેડને રાજકોટ દિશા તરફથી લાઇન નંબર ૨૨ દ્વારા જોડવામાં આવ્યો છે, જ્યારે એસી લોકો ટ્રિપ શેડને લાઇન નંબર ૨૪ થી અલગ ઇલેક્ટ્રિફાઇડ કનેક્ટિવિટી પૂરી પાડવામાં આવી છે.

વહીવટી ભવન અને અન્ય સુવિધાઓ પણ વિકસાવાઈ

આ પ્રોજેક્ટ હેઠળ ૭૮ મીટર સ ૯ મીટરનું આધુનિક વહીવટી ભવન પણ બનાવવામાં આવ્યું છે, જેમાં ગ્રાઉન્ડ ફ્લોર પર ૧૦ રૂમ અને પ્રથમ માળે ૧૨ રૂમ બનાવવામાં આવ્યા છે. તેમાં મહિલા કર્મચારીઓ માટે અલગ મહિલા વિશ્રામ ખંડની પણ વ્યવસ્થા કરવામાં આવી છે. આ ઉપરાંત પરિસરમાં અલગ પાર્કિંગ એરિયા, સર્વિસ રોડ (સીસી રોડ) અને પાણી પુરવઠા માટે અંડરગ્રાઉન્ડ વોટર ટેન્કનું નિર્માણ પણ કરવામાં આવ્યું છે, જેને હાલની ઓવરહેડ ટેન્ક સાથે જોડીને વેગન શેડ અને વહીવટી ભવનમાં પાણીની સુવિધા ઉપલબ્ધ કરાવાઈ છે.

માલવાહક વેગનની મરામત ક્ષમતામાં મોટો વધારો થશે

નવી સુવિધા શરૂ થવાથી માલવાહક વેગનની મરામત ક્ષમતામાં નોંધપાત્ર વધારો થશે. જ્યાં પહેલા દરરોજ અંદાજે ૧૨ વેગનની મરામત શક્ય હતી, હવે તે ક્ષમતા વધીને દરરોજ ૫૬ વેગન થઈ જશે. આ સાથે જ (રૂટિન ઓવરહોલિંગ) આઉટટર્ન દર મહિને ૭૦ વેગનથી વધીને ૧૨૫ થી વધુ વેગન થવાની સંભાવના છે.

આ વ્યવસ્થાથી બીમાર વેગનને હવે લગભગ ૩ દિવસમાં ફિટ કરી શકાશે, જ્યારે પહેલા આમાં સરેરાશ ૧૦ દિવસ જેટલો સમય લાગતો હતો. આનાથી યાર્ડમાં ભીડ ઘટશે અને માલ લોડિંગ માટે વેગનની ઉપલબ્ધતા ઝડપથી વધશે. સાથે જ અનેક ટેકનિકલ પરીક્ષણો અને ઓવરહોલિંગના કાર્યો હવે સ્થાનિક સ્તરે જ શક્ય બનશે, જેનાથી સમય અને ખર્ચ બંનેની બચત થશે.

રેલ સંચાલન અને માલ પરિવહનને મોટો લાભ મળશે

રાજકોટ ડિવિઝનલ રેલવે મેનેજર ગિરિરાજ કુમાર મીનાના જણાવ્યા અનુસાર, આ નવી સુવિધાથી હાપા યાર્ડમાં વેગનની મરામત અને જાળવણીનું કામ પહેલાની સરખામણીમાં ઘણું ઝડપી અને વધુ સારું બનશે. આનાથી વેગન જલદી ફિટ થઈને માલ પરિવહન માટે ઉપલબ્ધ થશે, યાર્ડમાં ભીડ ઘટશે અને ટ્રેનોનું સંચાલન વધુ સરળ રહેશે. પરિણામે ઉદ્યોગો અને વેપારીઓને માલસામાનના પરિવહનમાં વધુ સુવિધા મળશે અને રેલવેની માલ પરિવહન ક્ષમતા તેમજ આવકમાં પણ વધારો થશે.

જો આપને આ પોસ્ટ ગમી હોય તો શેર કરો...