ફરવા જવાની લાલચ આપી સગીરા પર દુષ્કર્મ ગુજારનાર શખ્સને ૧૦ વર્ષની કેદ

Author: નોબત સમાચાર

ફરવા જવાની લાલચ આપી સગીરા પર દુષ્કર્મ ગુજારનાર શખ્સને ૧૦ વર્ષની કેદ

સાત વર્ષ પહેલાં સગીરાને રાજકોટ લઈ જવાઈ હતીઃ

જામનગર તા. ૬: જામનગરની એક સગીરા સાથે પરિચય કેળવી પોતે આપેલા મોબાઈલમાં વાતચીત કરાવતા એક શખ્સે સાત વર્ષ પહેલાં તેણીને ફરવા જવાની લાલચ આપી રાજકોટ પોતાની બહેનના ઘરે લઈ જઈ દુષ્કર્મ આચર્યું હતું. સગીરા દ્વારા તેની ફરિયાદ કરાઈ હતી. આ કેસ ચાલી જતાં અદાલતે આરોપીને ૧૦ વર્ષની કેદની સજા અને રોકડનો દંડ ફટકાર્યાે છે.

જામનગરના સી ડિવિઝન પોલીસ સ્ટેશન હેઠળના વિસ્તારમાં વસવાટ કરતા એક પરિવારની સગીર વયની પુત્રી સાથે વર્ષ ૨૦૧૮માં અમિત દિનેશભાઈ પઢીયાર નામનો શખ્સ પરિચયમાં આવ્યો હતો. આ પરિવાર જ્યાં રહેતો હતો ત્યાં ચાલતા કામ પર આવતા અમિતે તે સગીરાને વાત કરવા માટે પોતાના નાનાભાઈની પત્ની હિરલ સાથે મોબાઈલ મોકલાવ્યો હતો અને તેમાંથી આ સગીરા અને અમિત વાત કરતા હતા.

તે દરમિયાન અમિતે તે સગીરાને ફરવા સાથે આવવા માટે કહી ગઈ તા.૨૨-૭-૧૮ ની રાત્રે તૈયાર રહેવા કહેતા અને રાત્રે ઘરેથી નીકળતી વખતે પોતે મોકલેલી ભભૂતી ઘરમાં છાંટીને પાછું વાળીને જોયા વગર આવી જવાનું કહેતા તે સગીરા તેને અનુસરી ઘરેથી નીકળી હતી. તેણીને દિગ્જામ સર્કલ પાસેથી એક બોલેરોમાં બેસાડાઈ હતી જેમાં અગાઉથી અમિતનો ભાઈ, નાનાભાઈની પત્ની હિરલ, કાનો બેઠા હતા. તે પછી કપિલ નામનો શખ્સ પણ સ્કૂટી મૂકીને બોલેરોમાં બેઠો હતો. આ તરૂણીને રાજકોટમાં અમિતના બહેનના ઘેર લઈ જવાઈ હતી. જ્યાં તેણી પર અમિતે દુષ્કર્મ ગુજાર્યું હતું.

ત્યારપછી આ તરૂણીને ગુલાબનગર પાસે ઉતારી મૂકાઈ હતી. ઘેર પહોંચેલી તરૂણીએ જે તે વખતે પોલીસમાં ફરિયાદ નોંધાવતા આઈપીસી તથા પોક્સો એકટ હેઠળ ગુન્હો નોંધાયો હતો.

આ કેસ ચાલી જતાં ખાસ પોકસો અદાલતે સરકારી વકીલ ભારતીબેન વાદીની દલીલો ગ્રાહ્ય રાખી આરોપી અમિત દિનેશભાઈ પઢીયારને તક્સીરવાન ઠરાવી આઈપીસી ૩૭૬ તેમજ પોક્સો એક્ટની કલમ ૪, ૬ના ગુન્હામાં દસ વર્ષની સખત કેદની સજા અને રૂ.૧૦ હજારનો દંડ ફટકાર્યાે છે, ૩૬૩ના ગુન્હામાં ૩ વર્ષની કેદ અને રૂ.ર હજાર દંડ, ૩૬૬ના ગુન્હામાં ૫ વર્ષની કેદ અને રૂ.પ હજારનો દંડ ફટકાર્યાે છે. ભોગ બનનારને કમ્પેઈન્સેશનમાંથી રૂ.ર લાખ વળતર પેટે ચૂકવાશે.

જો આપને આ પોસ્ટ ગમી હોય તો શેર કરો...