ઓખાના દરિયામાં ગેરકાયદે માછીમારી કરતી ચાર બોટ પકડતી ડીવાયએસપી ટીમ

Author: નોબત સમાચાર

ઓખાના દરિયામાં ગેરકાયદે માછીમારી કરતી ચાર બોટ પકડતી ડીવાયએસપી ટીમ

બેટ પોલીસે પણ ત્રણ બોટ સામે કરી કાર્યવાહીઃ

ઓખા તા. ૧૪ઃ ઓખાના દરિયામાં ડીવાયએસપી ટીમે ચેકીંગ હાથ ધરતા ગેરકાયદેસર રીતે માછીમારી કરતી ચાર બોટ મળી આવી હતી. દરિયામાં જવા પર માછીમારો સામે પ્રતિબંધ મૂકતું જાહેરનામંુ અમલી હોવા છતાં તેનો ભંગ કરી આ બોટમાં દરિયામાં ગઈ હતી. ડીવાયએસપી ટીમની કાર્યવાહી પછી હરકતમાં આવેલી બેટ પોલીસે પણ ત્રણ બોટ પકડી પાડી છે.

દ્વારકા જિલ્લાના ડીવાયએસપી સાગર રાઠોડની ટીમ ઓખા વિસ્તારમાં પેટ્રોલિંગ કરતી હતી. તે દરમિયાન ઓખા પોલીસ સ્ટેશનના વિસ્તારમાં પોસીત્રા ગામ નજીક ગેરકાયદે માછીમારી અંગે બાતમી મળતા આ ટીમ દ્વારા બોટથી દરિયો ખુંદવાનું શરૃ કરવામાં આવ્યું હતું.

તે દરમિયાન ગેરકાયદે માછીમારી કરતી વસીલા-એ-કીરમાણી, યા-રૃકનશા, કીરમાણી, વસીલા-સીદ-અલી નામની ચાર બોટ મળી આવી હતી. તેમાં રહેલા ચોવીસ વ્યક્તિ સામે ઓખા મરીન પોલીસ સ્ટેશનમાં ગુન્હો રજીસ્ટર કરાવાયો છે.

ઉલ્લેખનીય છે કે, હાલની ચોમાસાની સિઝનમાં દરિયામાં જોવા મળતા કરંટના કારણે તા.૩૦ જુલાઈ સુધી માછીમારી માટે દરિયામાં જવાની મનાઈ હોય છે અને કલેકટર દ્વારા તેનું જાહેરનામું પણ પ્રસિદ્ધ કરવામાં આવ્યું છે. આમ છતાં ઉપરોક્ત ચાર બોટ દરિયામાં ગઈ હતી. આ બોટોના કાયદા મુજબ ત્રણ મહિના માટે લાયસન્સ મોકૂફ થવા ઉપરાંત રૃા.૧૦ હજાર સુધીના દંડની જોગવાઈ છે.

ડીવાયએસપી ટીમની આ કાર્યવાહીના પગલે બેટ પોલીસ પણ હરકતમાં આવી હતી. તેઓએ પણ ગેરકાયદેસર રીતે માછીમારી કરતી ત્રણ બોટને પકડી પાડી છે.

જો આપને આ પોસ્ટ ગમી હોય તો શેર કરો...