Author: નોબત સમાચાર
પટેલ કોલોનીમાં વીસેક દિવસથી બંધ પડેલા મકાનમાં સોનાના દાગીના, ચાંદીના વાસણ, રોકડની ચોરી
હોટલ સંચાલિકાએ અઢી લાખથી વધુની મત્તા ચોરાયાની કરી રાવઃ
જામનગર તા. ૯: જામનગરના પટેલ કોલોની વિસ્તારમાં આવેલા એક હોટલના સંચાલિકાના બંધ પડેલા મકાનમાં વીસેક દિવસના સમયગાળામાં ચોરી થઈ છે. તે બંગલાના નાના ગેઈટનું તાળુ તોડી નાખી, મુખ્ય દરવાજાનો નકૂચો તોડી ઘૂસી ગયેલા તસ્કરોએ અંદરથી સોનાના દાગીના, ચાંદીના વાસણ, રૂ.૩૦ હજાર રોકડા મળી અઢી લાખ ઉપરાંતની માલમત્તા ચોરી કરી છે. પોલીસે કેટલાક શકમંદોની પૂછપરછ હાથ ધરી છે.
જામનગરના ખોડિયાર કોલોની વિસ્તારમાં આવેલા રોયલ એન્કલેવ સોસાયટીમાં રહેતા અને પંડિત નહેરૂ માર્ગ પર આવેલી એક આરામ હોટલ ચલાવતા હીનાબેન દીપકભાઈ ભટ્ટ (ઉ.વ.૬૩)એ પોતાના માતાના પટેલ કોલોની શેરી નં.૩/૪માં આવેલા અમૃત કુંજ નામના મકાનમાં ગઈ તા.૧૭થી ગયા શનિવાર સુધીમાં ચોરી થયાની ફરિયાદ સિટી બી ડિવિઝન પોલીસ સ્ટેશનમાં નોંધાવી છે.
ફરિયાદમાં જણાવવામાં આવ્યા મુજબ હીનાબેનના માતા-પિતા ઉપરોક્ત મકાનમાં રહે છે. તે મકાન હાલમાં બંધ છે. તેમાં ગઈ તા.૧૭ જુનની સાંજ પછીથી શનિવારની બપોર સુધીમાં કોઈ તસ્કર બહારની લોખંડની નાની ડેલીમાં લગાડવામાં આવેલું તાળુ તોડયા પછી ઘૂસ્યા હતા. તસ્કરોએ લોખંડની ઝાળીવાળી ડેલીમાંથી અંદર જઈ મુખ્ય દરવાજાના નકૂચાને તોડી નાખ્યો હતો અને તે પછી અંદર ખાંખાખોળા કર્યા હતા.
તસ્કરોને એક ઓરડામાં રાખવામાં આવેલી તિજોરી હાથ લાગી હતી. તેમાંથી સોનાની હીરાવાળી એક જોડી બુટી, હાથમાં પહેરવાના સોનાના બે કડા તેમજ સોનાની ચાર વીટી મળી આવવા ઉપરાંત ચાંદીના થાળી, વાટકો, ગ્લાસ, ચમચી તેમજ ચાંદીની ગણપતિજીની મૂર્તિ, ચાંદીના દસ સિક્કા તથા રૂ.૩૦ હજારની રોકડ મળી હતી. તે તમામ વસ્તુઓ ઉઠાવી લઈ તસ્કરો પલાયન થઈ ગયા છે. પોલીસે કુલ રૂ.૨ લાખ પપ હજારની મત્તા ચોરી કરી જવા અંગે અજાણ્યા તસ્કર સામે ગુન્હો નોંધ્યો છે અને પીઆઈ પી.પી. ઝાના વડપણ હેઠળ તપાસનો ધમધમાટ શરૂ કરાયો છે.
આ વિસ્તારમાં મુકવામાં આવેલા કેટલાક સીસીટીવી ફૂટેજ પોલીસે ચકાસ્યા છે અને કેટલાક શકમંદોને ઉઠાવી લઈ સઘન પૂછપરછ કરવામાં આવી રહી છે.
જો આપને આ પોસ્ટ ગમી હોય તો શેર કરો...
Follow us: આ જ પ્રકારની બીજી પોસ્ટ માટે અમારી એપ ડાઉનલોડ કરો.
Android: https://rb.gy/surhtv
Apple ios: https://rb.gy/cee4r9
Social Media
ફોટો સ્ટોરી માટે અમારા ઇન્સ્ટાગ્રામ પેઈજને ફોલ્લો કરો
https://www.instagram.com/nobatdaily?r=nametag
વિડિયો માટે અમારી યુ-ટ્યૂબ ચેનલને સબસ્ક્રાઈબ કરો
https://youtube.com/@Nobatofficial
અન્ય સમાચારો
