મગફળી, મગ, અડદ અને સોયાબીનનું ટેકાના ભાવે વેંચાણઃ ખેડૂતો નોંધણી કરાવી શકશે

Author: નોબત સમાચાર

મગફળી, મગ, અડદ અને સોયાબીનનું ટેકાના ભાવે વેંચાણઃ ખેડૂતો નોંધણી કરાવી શકશે

આગામી તા. ૧ થી ૧પ સપ્ટેમ્બર દરમિયાન

જામનગર તા. ૧: ખેડૂતોને તેઓની ઉત્પાદિત જણસીઓના પોષણક્ષમ ભાવ મળી રહે તે માટે ભારત સરકાર દ્વારા વર્ષ ર૦રપ-ર૬ ના ખરીફપાક મગફળી માટે રૂ. ૭ર૬૩, મગ માટે રૂ. ૮૭૬૮, અડદ માટે રૂ. ૭૮૦૦ તથા સોયાબીન માટે રૂ. પ૩ર૮ પ્રતિક્વિનટલ ટેકાના ભાવો જાહેર કરવામાં આવ્યા છે. બજારમાં જે તે જણસીઓના બજારભાવ ટેકાના ભાવ કરતા નીચા રહે તે સંજોગોમાં ખેડૂતોને આર્થિક રક્ષણ મળી રહે તે માટે ભારત સરકારની પી.એમ. આશા (પ્રધાનમંત્રી અન્નદાતા આય સંરક્ષણ અભિયાન) યોજના અંતર્ગત પીએસએસ હેઠળ રાજ્યમાં આ પાકોની ટેકાના ભાવે ખરીદી કરવા માટેનો નિર્ણય લેવામાં આવ્યો છે.

જે અંગે ચાલુ સિઝનમાં મગફળી, મગ, અડદ અને સોયાબીનની ટેકાના ભાવથી ખરીદવાનું આયોજન રાજ્ય સરકાર મારફત કરવામાં આવ્યું છે. રાજ્યના તમામ જિલ્લાઓમાં ખરીફ પાકો મગફળી, મગ, અડદ અને સોયાબીનની ટેકાના ભાવે ખરીદી માટે તા. ૧-૯-ર૦રપ થી તા. ૧પ-૯-ર૦રપ સુધી ખેડૂતોની નોંધણી કરવા ખેડૂત જાતે અથવા ગ્રામ્ય કક્ષાએ ઈ-ગ્રામ કેન્દ્રોમાં વી.સી.ઈ. મારફતે તેમજ ગ્રામ્ય કક્ષાની સહકારી મંડળીઓ વિનામૂલ્યે ઓનલાઈન નોંધણી નાફેડના ઈ-સમૃદ્ધિ પોર્ટલ મારફત શરૂ કરવામાં આવશે. ગત્ વર્ષે રાજ્યમાંથી કુલ ૮,પ૩,પ૧૪ લાભાર્થી ખેડૂતો પાસેથી રૂ. ૧૬,રર૩.ર૯ કરોડના મૂલ્યની કુલ ર૩,૪૭,૦૭૮ મે.ટન જથ્થાની વિવિધ જણસીઓની ટેકાના ભાવે ખરીદી કરવામાં આવેલ છે.

ચાલુ વર્ષે ખરીફ ઋતુમાં રાજ્ય સરકાર દ્વારા મગફળી, મગ, અડદ અને સોયાબીનની ખેડૂતો પાસેથી પૂરતા પ્રમાણમાં ખરીદી કરવામાં આવશે અને તે માટે સરકાર દ્વારા આગોતરૂ આયોજન હાથ ધરવામાં આવ્યું છે. માટે જામનગર જિલ્લાના ખેડૂતોએ પણ લાભ લેવા માટે જામનગર જિલ્લા ખેતીવાડી અધિકારીએ જણાવ્યું છે.

જો આપને આ પોસ્ટ ગમી હોય તો શેર કરો...