ધ્રોલ તથા કાલાવડ નજીકથી બે બાઈક ઉઠાવનાર પરપ્રાંતીયની કરાઈ ધરપકડ

Author: નોબત સમાચાર

ધ્રોલ તથા કાલાવડ નજીકથી બે બાઈક ઉઠાવનાર પરપ્રાંતીયની કરાઈ ધરપકડ

ધ્રોલ પોલીસે બે ચોરાઉ બાઈક કબજે કર્યાઃ

જામનગર તા. ૭: ધ્રોલના સગારીયા તથા કાલાવડ નજીક નકલંક રણુજામાંથી બે બાઈક ઉઠાવી લેનાર પરપ્રાંતીય શખ્સને ધ્રોલ પોલીસે દબોચી લીધો છે. આ શખ્સે બંને ચોરાઉ બાઈક કાઢી આપતા રૂ.૯૫ હજારના બાઈક કબજે કરી પોલીસે આરોપીની ધરપકડ કરી છે.

ધ્રોલ તાલુકાના સગારીયા ગામમાંથી એક આસામીના રૂ.૬૦ હજારના મોટરસાયકલની ચોરી થયાની પોલીસમાં ફરિયાદ કરવામાં આવી હતી. તેની તપાસમાં પોલીસે કેટલાક સીસીટીવી કેમેરાના ફૂટેજ ચકાસ્યા હતા. તે દરમિયાન ગઈકાલે એક શખ્સ ધ્રોલથી જામનગર મોટરસાયકલ પર જતો હોવાની અને તે મોટરસાયકલ ચોરાઉ હોવાની બાતમી મળતા ધ્રોલના પીઆઈ એચ.વી. રાઠોડ તથા સ્ટાફે વોચ રાખી હતી.

તે દરમિયાન મૂળ મધ્યપ્રદેશના અલીરાજપુર જિલ્લાના વતની નાનકા ઉર્ફે દીપક રેમસીંગ બામણીયા નામનો શખ્સ બાઈક સાથે મળી આવ્યો હતો. તેને અટકાવી પોલીસે પૂછપરછ કરતા આ શખ્સે ઉપરોક્ત વાહન સગારીયા ગામમાંથી ચોર્યાની અને કાલાવડના નકલંક રણુજામાંથી પણ દસેક દિવસ પહેલા જીજે-૧૦-બીએલ ૨૮૩૫ નંબરનું બાઈક ઉઠાવી લીધાની અને તે વાહન ધ્રોલ યાર્ડ પાછળ નદીના કાંઠે સંતાડ્યાની કબૂલાત આપી હતી.

પોલીસે બંને ચોરાઉ બાઈક કબજે કરી નાનકા રેમસીંગની ધરપકડ કરી છે. આ શખ્સ સામે મોરબી તથા પડધરી પોલીસ સ્ટેશનમાં વાહનચોરીના ત્રણ ગુન્હા નોંધાયેલા છે.

આ શખ્સ કોઈ વાહનમાં તેના ચાલક ચાવી ભૂલી ગયા હોય તેવા બાઈક ની ઉઠાંતરી કરી લેતો હતો.

જો આપને આ પોસ્ટ ગમી હોય તો શેર કરો...