જામનગરમાં હર્ષિદા ગરબી મંડળ તથા ચેરી. ટ્રસ્ટના ઉપક્રમે હજારો બાળાઓ-બટુકોએ લીધો સમૂહપ્રસાદ

Author: નોબત સમાચાર

જામનગરમાં હર્ષિદા ગરબી મંડળ તથા ચેરી. ટ્રસ્ટના ઉપક્રમે હજારો બાળાઓ-બટુકોએ લીધો સમૂહપ્રસાદ

સંતો, મહંતો, મહાનુભાવોની ઉપસ્થિતિઃ આ સંસ્થાને પ૦ વર્ષ પૂરા થતા બાળાઓને લ્હાણી અપાઈઃ ભવ્ય કાર્યક્રમ યોજાયો

શ્રી હર્ષિદા માતાજી ચેરીટેબલ ટ્રસ્ટ અને શ્રી હર્ષિદા ગરબા મંડળના સંયુક્ત ઉપક્રમે પ્રતિવર્ષની જેમ આ વર્ષે પણ સંતોના સાનિધ્યમાં મહાપ્રસાદનું આયોજન કરવામાં આવ્યું હતું. જેમાં જામનગર શહેરની તથા આસપાસના ગ્રામ્ય વિસ્તારોની ગરબી મંડળોમાં ગરબે રમતી તમામ કુમારિકાઓ (બાળાઓ) ને ગોરણીયું તરીકે જમાડવામાં આવી હતી. તેમજ બટુકો માટે સમૂહ ભોજન કરાવવામાં આવ્યું હતું. ખંભાળિયા નાકા બહાર આવેલ શ્રી વિસા શ્રીમાળી સોની સમાજની વાડીમાં આયોજીત આ ભવ્ય કાર્યક્રમમાં ર૮,૦૦૦ થી વધુ બાળાઓ-બટુકો, શહેરી વિસ્તારોમાં અભ્યાસ કરતી આશરે પ૦ જેટલી શાળાઓની વિદ્યાર્થિનીઓ, ગરબી મંડળના સંચાલકો, સેવાભાવી કાર્યકરો તથા ધર્મપ્રેમી પ્રજાજનોએ મહાપ્રસાદ ગ્રહણ કર્યો હતો. હર્ષિદા ગરબા મંડળ પરિવાર દ્વારા કટારિયાવારા વાછરાદાદા મંદિરે નૂતન ધ્વજારોહણ કરીને કાર્યક્રમનો પ્રારંભ કરવામાં આવ્યો હતો. ત્યારપછી ઉપસ્થિત સંતો-મહંતો તથા વિવિધ મહાનુભાવોના હસ્તે દીપ પ્રાગટ્ય કરવામાં આવ્યું હતું. આ પાવન પ્રસંગે શ્રી આશાપુરા માતાજી મંદિર (માતાનો મઢ-કચ્છ) ના ગાદીપતિ મહંત શ્રી રાજાબાવા યોગેનદ્રસિંહજી, શ્રી પંચદશનામ જુના અખાડાના થાનાપતિ મહંત શ્રી બુદ્ધગીરી મહારાજ (જૂનાગઢ ભવનાથ તળેટી), બ્રહ્મલીન ગુરુદેવ શ્રી ઈશ્વરલાલજી બાપુનો પરિવાર, રાજુભાઈ પ્રજાપતિ અને શ્રી ભવાની મંડળ-પાટણ (ઉત્તર ગુજરાત) અતિથિવિશેષ તરીકે ઉપસ્થિત રહ્યા હતાં. આ ઉપરાંત ધારાસભ્ય દિવ્યેશભાઈ અકબરી, પૂર્વ સાંસદ વિક્રમભાઈ માડમ, જામનગર મહાનગરપાલિકા વિરોધ પક્ષના નેતા ધવલ નંદા, દંડક કેતન નાખવા સહિતના અગ્રણીઓ ઉપસ્થિત રહ્યા હતાં. આ કાર્યક્રમને સફળ બનાવવા માટે પ્રમુખ રાજુભાઈ જોષી, નટવરસિંહ પઢિયાર, ભરતભાઈ ચૌહાણ, સંદિપભાઈ મકવાણા, મુકેશભાઈ સમિર વાસુ વિગેરેએ જહેમત ઊઠાવી હતી. અત્રે ઉલ્લેખનિય છે કે, શ્રી હર્ષિદા ગરબી મંડળની સ્થાપનાને પચાસ વર્ષ પૂર્ણ થતા તમામ ગરબી મંડળોમાં ગરબે રમતી તેમજ સ્કૂલમાં અભ્યાસ કરતી વિદ્યાર્થિનીઓને લાણી વિતરણ કરવામાં આવી હતી.

જો આપને આ પોસ્ટ ગમી હોય તો શેર કરો...