આઈટી કંપનીના ડેટા ચોરીના આક્ષેપમાં આરોપીને રિમાન્ડ અંગેની અરજી નામંજૂર

Author: નોબત સમાચાર

આઈટી કંપનીના ડેટા ચોરીના આક્ષેપમાં આરોપીને રિમાન્ડ અંગેની અરજી નામંજૂર

આરોપીને જામીનમુક્ત કરવાનો આદેશઃ

જામનગર તા. ૪: જામનગરની એક આઈટી કંપનીએ વડોદરામાં રહેતા કર્મચારી સામે કંપનીના ડેટા ચોરી કરી છેતરપિંડી-વિશ્વાસઘાત આચર્યાની કરેલી ફરિયાદમાં પોલીસે આરોપીના ત્રણ દિવસના રિમાન્ડ માંગ્યા હતા. અદાલતે રિમાન્ડ અરજી નામંજૂર કરી આરોપીને જામીન પર મુક્ત કરવાનો હુકમ કર્યાે છે.

જામનગરની એસએનટીજીઆઈટી સર્વિસીઝ પ્રા.લિ.ના માલિક રાજેશ ભીમાણીએ જામનગર સાયબર ક્રાઈમ પોલીસ સ્ટેશનમાં ફરિયાદ નોંધાવી જણાવ્યું હતું કે, તેમની કંપનીના કર્મચારી અને વડોદરામાં રહેતા મહેશ ડાયાભાઈ ભરડવા કોમ્પ્યુટર ઈજનેર તરીકે નોકરી કરતા હતા. તેઓએ વર્ક ફ્રોર્મ હોમ કરવાનું કહેતા તેમને કોમ્પ્યુટર સિસ્ટમ કોડ અપાયો હતો.

આ કર્મચારીએ કંપનીના સોફ્ટવેરમાંથી ડાટા ઉઠાવી લઈ ફરિયાદીની કંપની જેવી જ બીજી કંપની બનાવી ધંધો શરૂ કરી લીધો હતો. જેની ચકાસણી રાજેશભાઈ દ્વારા કરવામાં આવ્યા પછી મહેશ ડાયાભાઈએ ગોળ ગોળ જવાબ આપતા તેની સામે પોલીસમાં ફરિયાદ કરવામાં આવી હતી. પોલીસે ગુન્હો નોંધી આરોપીની ધરપકડ કર્યા પછી ત્રણ દિવસના રિમાન્ડની માગણી સાથે આરોપીને અદાલતમાં રજૂ કર્યાે હતો.

ત્યાં બંને પક્ષ દ્વારા રજૂ થયેલી દલીલો સાંભળ્યા પછી આરોપી પક્ષે દલીલ કરી હતી કે, ફરિયાદીની કંપનીનો ડાટા પેટન્ટ કરવામાં આવ્યો નથી અને રજીસ્ટર ડાટા નથી તે ઉપરાંત સિસ્ટમ પોલીસે કબજે કરી લીધી છે. તેથી પોલીસને આરોપીની કસ્ટડીની જરૂર નથી. અદાલતે તે દલીલ ગ્રાહ્ય રાખી આરોપીને રિમાન્ડ પર લેવાની અરજી નામંજૂર કરી તેને જામીન પર મુકત કરવાનો હુકમ કર્યાે છે. આરોપી તરફે વકીલ રાજેશ ગોસાઈ, વિશાલ જાની, એચ.આર. ગોહિલ, રજનીકાંત નાખવા, નિતેશ મુછડીયા, કરણ પટેલ રોકાયા હતા.

જો આપને આ પોસ્ટ ગમી હોય તો શેર કરો...